هێرۆ كەمال بەرزنجی*
راپەرین تەنیا رووداوێكی سیاسی و سەربازیی و ئەمنی نەبوو، تەنیا گۆڕانكارییەك نەبوو لە شێوازی حوكمڕانی، بەڵكو وەرچەرخانێك بوو لە كۆمەڵگای كوردستاندا، چەندین گۆڕانكاریی هێنایە كایەوە، كە رەنگە ئەگەر راپەڕین نەبوایە ئەو گۆڕانكارییانە نەدەهاتنایەتەدی.
هەر كۆمەڵگایەك ئەگەر ئازاد نەبێت، بەدڵنیاییەوە ناتوانێت پێشبكەوێت و شان بەشانی میللەتان هەنگاو بنێ، بۆیە لەگەڵ رووخانی رژێمی بەعس و رزگاربوونی بەشی زۆری خاكی كوردستان، گۆڕانكاریی ریشەیی لەكۆمەڵگای كوردستان هاتەكایەوە، لەوانە ئازادیی رادەربڕین و ئازادیی رۆژنامەنووسی و كردنەوەی دەیان زانكۆ و پەیمانگا و دامەزراندنی ژمارەیەكی زۆر لە رێكخراوی مەدەنی، كە هەموو ئەوانە لەژێر سێبەری حكومەتێكی دیكتاتۆریی وەك بەعس ئەستەم بوو.
بۆیە گۆڕانكاریی لەو جۆرە، بەدڵنیاییەوە كاریگەریی لەسەر بیركردنەوە و روئیای كۆمەڵگا دەبێت، بەتایبەتی لە تێڕوانینی بۆ مافەكانی ژنان، هەر ئەمەش وایكردنی ئاستی بەشداریی ئەو رەگەزە لە بونیادنانەوەی وڵات و رۆڵیان لەپێشكەوتن و گۆڕانكارییەكاندا دەربكەوێت، بەتایبەتی دوای پڕۆسەی ئازادیی عیراق لە2003 و نەمانی یەكجاری رژێمی پێشوو، هەرێمی كوردستانیی زیاتر بەڕووی دەرەوە كرایەوە، توانی سوود لە ئەزموونی وڵاتان وەربگرێت.
راپەڕین، دەستكەوتی زۆر بوو ئەگەر ئەو ئاستەنگانەی نەبوایە، كە لە چەند وێستگەیەكی حوكمڕانی هەرێم هاتە پێشەوە، ئەوا زیاتر بەرەو پێش دەچوو، بەتایبەتی شەڕی ناوخۆ كە تا ئێستا ئاسەوارەكانی هەرماوە، بەهۆیەوە زیانێكی زۆری لە ئەزموونی هەرێمی كوردستاندا و پڕۆسەی ئاوەدانكردنەوە و پرۆژە خزمەتگوزارییەكانی زۆر دواخست، هەروەها شەڕی داعش و بڕینی بودجەی هەرێم لە بەغدا و ناكۆكییە سیاسییەكانی نێوان لایەنەكانی پێكهێنەری حكومەتی هەرێم، وایكرد هەرێمی كوردستان لەچەند روویەكەوە پاشەكشە بكات، بەتایبەتی لە شارێكی وەك هەولێر كە پایتەختی كوردستانە، پاشەكشەیەكی تەواو لە ئازادیی رادەربڕین و ئازادیی رۆژنامەنووسی بەدیكرا.
ئێستاش كە یادی 34 ساڵەی ئەو رۆژە مێژووییە دەكەینەوە كە یادی راپەڕینە، لەسەر هەردوولایەنی سەرەكی هەرێمی كوردستان( ی ن ك) و ( پ د ك) پێویستە، بەرۆحیەتی راپەڕین و بەهەستكردن بە بەرپرسیاریەتییەوە، كار بۆ پێكهێنانی كابینەی تازەی حكومەتی هەرێم بكەن، حكومەتێك قەرەبووی هەموو ئەو زیانانە بكاتەوە كە بەهۆی هەڵەكانی رابردوو بەر هەرێم كەتووە.
