حزبی دیموکراتی پێشکەوتنخوازی کورد لە سوریا هەڵوێست و پشتگیرییەکانی سەرۆک بافڵ جەلال تاڵەبانی لە رۆژئاوای کوردستان بەرزدەنرخێنێت و پشتگیری خۆیشیان بۆ دوا پەیامی سەرۆک بافڵ دەردەبرن.
پەیامی سەرۆک بافڵ جەلال تاڵەبانی لەبارەی رێککەوتنەکەی دیمەشق کاردانەوەی ئەرێنی لێکەوتۆتەوە و لە هەموو لایەکەوە پشتگیریی لێدەکریت، ئەمڕۆش حزبی دیموکراتی پێشکەوتنخوازی کورد لەسوریا لە چوارچێوەی سەردانێکدا بۆ بۆردی راگەیاندنی یەکێتیی نیشتمانیی کوردستان پەیام و پشتیوانی سەرۆک بافڵ جەلال تاڵەبانی-ان بەرز نرخاند.
وەفدی باڵای میوان کە پێکهاتبوو لە ئەحمەد سلێمان جێگری سکرتێری حزبی دیموکرات و عەلی شەمدین ئەندامی مەکتەبی سیاسی و نوێنەری حزبەکە لەهەرێمی کوردستان ئەمڕۆ سەردانی بۆردی راگەیاندنی یەکێتیی نیشتمانیی کوردستانیان کرد و لەلایەن هەڤاڵ لەتیف نێروەیی لێپرسراوی بۆرد و ژمارەیەک لە هەڤاڵان ئەندامانی مەکتەب پێشوازیکران.
لەو دیدارە دۆستانەیە وەفدی میوان سوپاس و دەستخۆشیان لە میدیای یەکێتی کرد کە بە روحیەتێکی بەرپرسیارانە و نیشتمانیانەوە رووماڵی رووداوەکانی رۆژئاوای کوردستان دەکەن، پاش دوپاتکردنەوەی پەیوەندییە مێژووییەکانی نێوان هەردوولا، لەسەر دۆخی سوریاو رێکەوتنی نێوان ژەنەراڵ مەزڵوم عەبدی و سەرۆکی کاتی سوریا هەردولا هاورابوون، کە بۆ ئەم قۆناغە رێککەوتنێکی گرنگەو سوریا و بەتایبەتی رۆژئاوای کوردستان پێویستی بە سەقامگیری ئەمنی و سیاسی هەیە.
هەر لەو دیدارەدا وەفدی میوان پشتیوانی و خۆشحاڵی خۆیان بۆ پەیامی سەرۆک بافڵ جەلال تاڵەبانی دەربری کە تیایدا پشتگیری لە رێککەوتنەکە دەکات و پێشتریش لەچەند پەیامێکدا پشتیوانی خۆی بۆ رۆژئاوای کوردستان دەربڕیوە.
