راپۆرت: رەڤەند
جڤاتا رەوشەنبیریا ئازاد ل بەرلینێ ئێك ژ جڤاتێن چالاكە و لدویڤ نەخشەیێ چالاكیێن وان، هەمی رۆژێن چوارشەمبی چالاكیەكێ دگێرن و ئەڤ چالاكیێن هەنێ سمینارن و بابەتێن تێدا دهێنە پێشكێشكرن ژی هەمی جورێن بابەتان بخوەڤە دگرن، ژبۆ وێ چەندێ ژنزیك ڤێ جڤاتێ و كارۆچالاكیێن وان بزانین، نڤیسەر (تارق حەسۆ) دگەل مەدایە، گوت: «لدەستپێكێ ئاڤاھیەك ل بەرلینێ هەبوو و یێ یەكێتی نیشتیمانی كوردستان بوو و جڤاتێ چالاكیێن خوە ل وێرێ رێكدخستن، لێ پشتی ئاڤاھی نەمایی، كومبوون و روونشتنێن جڤاتێ ل چایخانەكێ بوون و پاشی پێشنیار هاتەكرنێ، كو جڤاتەك بهێتە دروستكرن و ئەڤ جڤاتە یا رێكخستی بیت و ئەو بوو ل سالا 2009ێ ل سەر دەستێ چەند نڤیسەرێن بسپور وەكی (د. عەبدولرەحمان مزووری و د. سالمێ جاسم و ئەحمەد بالایی..... ھتد) و چەند كەسێن دی ئەڤ جڤاتە لبن ڤی ناڤی هاتە دامەزراندن و ل دەستپێكێ ل رۆژێن ئەینی ئەم خرڤەدبووین، پاشی بریار هاتەدان رۆژا چارشەمبییێ ئەم بۆ خرڤەبوون و چالاكیێن خوە تەرخان بكەین، ژبەركو هەم نیڤا حەفتیێ یە لدەف مە و دیسان ئەو جهێ ئەم لێ خرڤەدبین، بكرێ وی كێمترە لڤێ رۆژێ و ئەم ئازادترین». سەبارەت جڤاتی و وەرگرتنا ئەندامان و دەستەیا برێڤەبرنێ، ڤی نڤیسەری گوت: «مە چارشەمبیا دەستپێكا هەمی سالەكێ یا تەرخانكری، كو ئەم تێدا كومیتا رێڤەبرنێ هەلبژێرین و كومیتە ژ سێ كەسان پێكدهێت و ژبەركو ئەم سەربەخوینە و ئەم ب چ حزب و ئایدولوژیان ڤە دگرێدایی نینین، ئەم پشتبەستنێ ل سەر وەرگرتنا ئابوونا دكەین و ئەم چالاكیێن خوە پێ بەردەوام دكەین، ئەگەر كەسەك بهێت و سمینارەكێ بۆ مە پێشكێش بكەت و ژدویر بهێت، ئەم خوارن و ڤەخوارنێن وی دمەزێخین، لێ ژبەركو بتنێ داهاتێ مە ئابوونەنە، ئەم نەشێین مەزاختییێ رێكێ ب ستوخوڤەبگرین، ئەگەر كەسەك ژدویر بهێت». سەبارەت گرنگیا ڤێ جڤاتێ، تارق حەسۆ گوت: «ئەڤ جڤاتە بۆ مە گەلەك یا گرنگە، رەوشەنبیرێن ڤێرە لئێك خرڤەدبن و ئەم دانوستاندنێ ل سەر بابەتان دكەین و مەرجێن مە ژی بۆ سمیناران، بتنێ ناڤزراندن نەبیت، وەك د دەرگەهێ رەخنێ یێ ڤەكریە و هەر كەسەك ئازادە چ بێژیت و دیسان سمینارێن مە برێكا ئونلاین ژی دهێنە بلاڤكرن و هەر كەس لكیرا جیهانێ بیت دشێت دیڤچوونێ بۆ بكەت».
