ئه‌یاز محه‌مه‌د سه‌لیم هه‌ركی
شه‌هید دلیڤان سلێمان قاسم، له دایكبووی رۆژی 1/1/1991ی خێزانێكی كوردپه‌روه‌ری عه‌شیره‌تی(مه‌ندكانی)ی ئێزدیی گوندی(كۆچۆ)ی قه‌زای شنگاله.
ساڵی 2006 به بنه‌ماڵه‌وه په‌یوه‌ندییان كردووه به رێكخستنه‌كانی یه‌كێتیی نیشتمانیی كوردستانه‌وه له كۆمیته‌ی رێكخستنی شنگال، ئه‌ندامێكی چالاكی رێكخستن بووه له سنووری كۆمیته‌كه‌ی.
ساڵی 2013 بووه به پێشمه‌رگه له‌ده‌سته‌ی پاسه‌وانیی مه‌ڵبه‌ندی شنگال، دواتر گوازراوه‌ته‌وه بۆ لیوای 8ی هاوبه‌شی وه‌زاره‌تی پێشمه‌رگه.
بۆ به‌شداریكردن له چه‌ند خولێكی راهێنانی سه‌ربازیی، چۆته سلێمانی و دواتر له سنووری پارێزگای موسڵ و شنگال، وه‌ك پێشمه‌رگه‌یه‌كی چالاك درێژه‌ی به خزمه‌تی پێشمه‌رگایه‌تی داوه.
دوای ئه‌وه‌ی رۆژی 3/8/2014، كه چه‌كدارانی داعش شنگال و ده‌وروبه‌ریان داگیركرد و له 15ی مانگیشدا خه‌ڵكی گوندی (كۆچۆ) جینۆساید كرا، له‌و سه‌روبه‌نده‌دا ئه‌ویش گه‌ڕابۆوه بۆ شنگال و له‌گه‌ڵ كه‌سوكاره‌كه‌یدا كه بریتی بوون له پێنج برا و دایك و باوكیان، شه‌هیدكران.
هاوسه‌ره‌كه‌شی به‌ناوی (نوره خه‌یرو خه‌له‌ف) و هه‌ردوو كچه‌كه‌یان به‌ناوه‌كانی سیدرا و سندر، كه‌وتنه ده‌ستی داعش.
شایه‌نی بیرهێنانه‌وه‌یه‌وه، شه‌هید دلیڤان و ئه‌ندامانی خێزانه‌كه‌ی و به‌شێكی زۆری خه‌ڵكی شنگال، سه‌ر به رێكخستنه‌كانی یه‌كێتیی نیشتمانیی كوردستان بوون، هه‌ر بۆیه جینۆسایدی گوندی كۆچۆ، زیانێكی زۆربوو به پێگه‌ی یه‌كێتی كه‌وت له قه‌زای شنگال و سنووری پارێزگای موسڵ.
