خۆپیشاندان و ناڕ‌ه‌زاییه‌كانی توركیا له‌ئه‌سته‌نبوڵه‌وه ده‌ستیپێكردو له‌كۆی 81 پارێزگا 55 پارێزگای توركیای گرتۆته‌وه‌و به‌هۆیه‌وه هه‌زارو 300 كه‌س له‌خۆپیشانده‌ران ده‌ستگیر كراون.
رۆژی 19ی3ی2025 له‌سه‌ر داوای داواكاری گشتی ئه‌سته‌نبوڵ ئه‌كره‌م ئیمام ئۆگلۆ سه‌رۆكی گه‌وره شاره‌وانی ئه‌سته‌نبوڵ به‌تۆمه‌تی " تیرۆر و گه‌نده‌ڵی" ده‌ستگیركراو دواتر به ره‌سمی فه‌رمانی ده‌ستگیركردنی بۆ ده‌ركرا، له‌كاردانه‌وه‌كانیشدا خۆپیشاندان و ناڕه‌زایه‌تی له ئه‌سته‌نبوڵ ده‌ستیپێكردو دواتر زۆربه‌ی پارێزگاكانی توركیای گرته‌وه، به‌شێوه‌یه‌ك له‌كۆی 81 پارێزگا، 55 پارێزگا خۆپیشاندانی تێداكراوه.
شه‌وی رابردووش جارێكی دیكه ئۆپۆزسیۆنی توركیا خۆپیشاندانێكی فراوانیان رێكخست و خوێندكارانیش چوونه نێو خۆپیشانده‌رانه‌وه، به‌مه‌ش ناڕ‌ه‌زایه‌تییه‌كان فراوانتربوو كه ماوه‌ی شه‌ش رۆژه ئه‌و وڵاته‌ی گرتۆته‌وه ، هه‌روه‌ها به‌هۆی توندوتیژی و ئاڵۆزییه‌كانه‌وه تاوه‌كو ئێستا هه‌زار و 300 كه‌س له خۆپیشانده‌ران ده‌ستگیركراون و له به‌رامبه‌ریشدا 123 پۆلیس بریندار بوون.
