دلوڤان گورگیس
سەرەرایی ئێزدیان تایبەتمەندیەکا رۆحی دگەل ئاخا خۆ هەینە، گەلەک ب ئاخێ ڤە هاتینە گرێدان، بەلێ پشتی ئەوێ فەرمانا ل سەردەمێ جیهانیا نوو ل سالا 2014ێ ژ ئالیێ رێکخراوا تیرۆرستیا داعش ڤە، پتریا خەلکێ ئێزدی کۆچبەری وەلاتێن ئەوروپی و ب تایبەتی وەلاتێ ئەلمانیا بوون، ژبۆ پاراستنا گیانێ خوە
کۆچکرن ژ ئاخێ ژ پێناڤ هەبوونا ژیانەکا شایستە یان ژی ژبۆ پاراستنا گیانێ خۆ ژ ئەگەرێ شەر و شۆرا، ژ کەڤندا هەبوویە و مێژوویەکا دوور و درێژ هەیە. ئەگەر ئەم بهێین بەرێ خۆ بدەینە ئاوارە و دەربەدەربوونا ئێزدیان، ژبەر وان فەرمان و قرکرنێن ب سەرێ وان هاتین ژ دەڤەرەکێ بۆ دەڤەرەکا دی، بەردەوام بوویە. سەرەرایی ئێزدیان تایبەتمەندیەکا رۆحی دگەل ئاخا خۆ هەینە، گەلەک ب ئاخێ ڤە هاتینە گرێدان، بەلێ پشتی ئەوێ فەرمانا ل سەردەمێ جیهانیا نوو ل سالا 2014ێ ژ ئالیێ رێکخراوا تیرۆرستیا داعش ڤە، پتریا خەلکێ ئێزدی کۆچبەری وەلاتێن ئەوروپی و ب تایبەتی وەلاتێ ئەلمانیا بوون، ژبۆ پاراستنا گیانێ خوە. چەندین رێکێن مەترسیدار بۆ ئەڤێ کۆچبەریێ گرتینەبەر، مینا دەربازبوون ژ دەریایێ و دارستانێ وەک رێکا مرنێ و فرۆتنا مال و ملکێ خۆ، هێلانا کارۆ پیشێ خوە و کارمەندیا خوە وەک کارمەندێ حكومەتێ، ...هتد. بەلێ پشتی ئەڤ نەخۆشی یە هەمی دیتین و گەهیشتنە ئەوان وەلاتان، ل ئەڤان چەند سالێن دوماهیێ ب ناڤێ هەبوونا یاساییێن وەلاتی، گەلەک ژ ئەوان پەنابەرا بۆ وەلاتێ وان ڤەگەراندینە. هەڤدژیەک هزری هەیە، ئەو ژی ژ ئالیەکی ڤە، وەلاتێ ئەلمانیا دانپێدان ب جینۆسایدا ئێزدیان کریە، ژ ئالیەکی دیڤە ئێزدیان دیپۆرت دکەن بۆ وی جهێ جینوساید ب سەرێ وان هاتی. د دەمەکیدا پێدڤییە ئێزدیان تایبەتمەندیا خوە هەبا، وەک میللەتکی زولملێکری. د ئەنجامدا، ئەڤێ دیپۆرتکرنێ باندۆرەک خراب کریە سەر ژیانا ئەو کەسێن هاتینە دیپۆرتکرن، هەر وەکی:
ـ ژ ئالیێ پەیوەندیێن جڤاکی ڤە، ژبەر کو دناڤ ئێک خێزانی نیڤەک ژ ئەندامين وێ ل ڤەگەراندینە و نیڤەک ل مافێ پەنابەریێ داینە، ئەڤە ژی دبیتە کێشەیەکا خێزانی چ ژ ئالیێ سۆزداری و پەیوەندیان ڤە.
ـ ژ ئالیێ ئابۆری ڤە، ژبەرکو لدەمێ کۆچکرنێ ئەوان کەسان مال و سامانێ خوە فرۆتینە و گەلەک کارمەندیا خوە ژ دەستدایە، ئەڤچا د بارودۆخەکی ئابوری یێ ئالۆزدا دژین.
ـ ژ ئالیێ دەروونی ڤە، ئەڤێ دیپۆرتکرنێ نەخوشیێن دەرونی لدویڤ خۆ هیلاینە.
ژبۆ لبەرچاڤگرتنا ئەڤێ باندۆرا دژوار، فەرە حكومەتا مە لسەر بنمایێ هاریکاریێن مرۆڤایەتی، هندەک رێکێن تایبەت بۆ ئەوان کەسان بهێنە دیار کرن، ژبۆ بکارن ب ژیانەکا ئاسایی بژین.
