دناڤ گەلێ مەیێ ئێزدیدا، چەندین هەلكەفت و جەژنێن ئاینی یێن تایبەت هەنە و دڤان هەیامێن بوریدا، چەند هەلكەفت هەبوون ژوان (سەفەرا نان و ماستی) و دیسان (سەفەرا قولان). ئەڤ هەردوو سەفەرێن هەنێ ژی دكەڤنە د هەیڤا ئادارێ دا لدویڤ حسابا شەرقی. نڤیسەر و ڤەكولەرێ ئێزدی (داود موراد خەتاری لدوور سوفورا نان و ماستی بۆ كوردستانی نوێی بادینان گوت: «سەفەرا نان و ماستی دڤێت د هەیڤا ئادارێ دا بیت، ئادارا شەرقی نە یا زایینی و ئەڤ نەریتە هەر ژ كەن وەرە دناڤ ئێزدیاندا هەیە. وەك دھێتە زانین، دڤێت چرا بھێنە ڤێخستن و ژمارا وان (366) چرانە و ئەو نیشانگەھن و دڤێت ئەو چرایێن هەنێ هەموو ئێڤاریێن چارشەمبووا و ئینییا بھێنە ڤێخستن و فەتیلێن وان ژ پەمبی یان ھریێ دھێنە دروستكرن و وان فەتیلان د زەیتێ دھلینن و بەرێ دارێن زەیتوونان هەبوون، لێ ئەو زەیتوونێن هەنێ تێرا چراكا نەدكرن، نەچاردبوون دگوتنە خەلكێ (وەلات شێخ) ڤێ چەندێ بكەن و وەلات شێخ ژڤان دەڤەران پێكدھێت (باسكێ شێخابوو، مەهەت و ئەو دەڤەرە هەتا بەعشیك و بەعزانا و هەتا دھێتە بەرئاڤێ ل گوندێ بابیرێ و موشرفێ و هەتا دچیتە دەڤەرا دنا و قایدیێ). ئەڤێن هەنێ دڤێت هەر سال ھندەك زێتێ و نانی و ماستی بینن و زێت بۆ فتیلایە و و خەزینا نانی یا هەی و ئەو ماستە د مەشكاندا دكییان دا نیڤشك ژێ چێببیت و ئەو نیڤشكە د كلۆسكاندا دهاتە ھلگرتنێ بۆ رۆژێن تەنگاڤییێ، ژبەركو پرانییا سالان بەفر ل لالشێ دكەفت و رێ و رێبار دهاتە گرتنێ و خلمەتكارێن ل لالشێ نە چاردبوون خوارنەكێ بۆ خوە پەیدا بكەن،ڤێجا د خەزینێدا نانێ تەنك و نیڤشك هەبوون و ئەڤە دبوو خوارنا وان ئەڤێن خزمەتێ دكەن، دیسان ئەڤ كەسێن كاروانی یان رێڤینگ و رێیا وان كەفتبا ڤێ دەڤەرێ دزانین پەرستگەهەك یا لڤێرە هەی و پێنەڤێت دێ خوارن ژی لێ هەبیت». د (سەفەرا قولان) ژی دا، كو سێ رۆژان بەردەوام دبیت، ئەڤ سەفەرە ژی ژ دەمێ شێخادی وەرە یا بەردەوامە و دو رۆژان دچن قولان/ دارا دئینن بۆ گرزا شێخادی و رۆژەكێ ژی بۆ شێشم. بۆ دەستپێكرنا ڤێ سەفەرێ ژی بابەشێخ دگەل خلمەتكارا د روینیت و ژڤانەكێ دەستنیشاندكەن و خلمەتكار و گوندییان پێ دحەسینن و دچن داران دئینن و ئەڤ دارێن هەنێ بۆ (سماتا) مالا شێخادی دھێنە سوتنێ. سمات خوارنەكا پیرۆزا ئێزدیاتیێ یە و نابیت ئەو سماتە ل سەر ھیچ تشتەكێ دی بھێتە دروست كرن ئەگەر ئەو قول نەبن و ئەڤ دارە بۆ (شیلانێن شێخادی و مەحفەلێ و سماتێ) دھێنە بكارئینان و تشتێ جوان ژڤێ (سەفەرا قولان)، ب ھیچ رەنگەكێ نابیت دارێن تەر بھێنە برینێ، بتنێ دارێن ھشك و كەفتی نەبن.
راپۆرت: رۆژیار
