قوباد تاڵەبانی: كەرتی تایبەت دەتوانێت هاوكارێكی باشی گەشتوگوزار بێت

قوباد تاڵەبانی جێگری سەرۆكی ئەنجومەنی وەزیران، سەردانی دەستەی گەشتوگوزاری كرد لە هەولێر و لە كۆبوونەوەیەكدا جەختی لەسەر گرنگی پێشخستنی كەرتی گەشتوگوزار كردەوە.
لەو كۆبوونەوەیەدا كە ساسان عەونی وەزیری شارەوانی و گەشتوگوزار، ئەمەل جەلال سەرۆكی دەستەی گەشتوگوزار و بەڕێوەبەرانی سەر بە دەستەكە ئامادەیبوون، گفتوگۆكرا لەبارەی دۆخی ئێستای گەشتوگوزار و ئامادەكاری و پلانەكانیان بۆ چۆنێتی بەرەوپێشبردنی لە هەرێمی كوردستان، جێگری سەرۆكی ئەنجومەنی وەزیران ئاماژەی بەوەدا: زەمینەیەكی لەبار هەیە بۆ بەرەوپێشبردنی گەشتوگوزار لە هەرێمی كوردستان، جەختیشی كردەوە "دەبێ پلان هەبێت تا گەشتوگوزار بكرێتە ئامرازێك بۆ زیادكردنی داهات بۆ كەرتی گشتی و كەرتی تایبەتیش، چونكە كەرتی تایبەت دەتوانێ هاوكارێكی باش بێت بۆ بەرەوپێشبردنی كەرتی گەشتوگوزار"، وتیشی: یەكێك لە ئەولەویەتەكانی حكومەت پێشخستنی ئەو كەرتەیە و پلانی هەیە بۆ ئەم بابەتە.
 جێگری سەرۆك وەزیران راشیگەیاند: دەبێ گەشتوگوزار كاربكات بۆ راكێشانی سەرنجی وەبەرهێنەران، بۆ ئەو مەبەستەش داوایكرد ئاسانكاری بكرێت بۆ كەرتی تایبەت تا وەبەرهێنان بكەن لە بوارەكەدا، وتیشی: پێویستە لەسەر ئاستی پەروەردە و خوێندنی باڵا گرنگی بدرێت بە پێگەیاندنی كادری پێویست بۆ پەرەپێدانی ئەو كەرتە گرنگە.