هەڵبژاردنی پێشوەختە لە عیراق

11:55 - 2022-08-09
دووتوێ
194 جار خوێندراوەتەوە

ئاوێنەی عیراق

موقتەدا سەدر رابەری سەرەوتی سەدر، هەڵوەشاندنەوەی پەرلەمان و هەڵبژاردنی پێشوەختە بە رێگەچارەی تەنگژەی سیاسی ئێستای وڵات دادەنێت، داواش لە لایەنگرانی دەكات، بەردەوامبن لە خۆپیشاندان و مانگرتنەكانیان كە ماوەیەكە لە ناوچەی سەوز و لە بارەگای پەرلەمان دەستییان پێكردووە. 

چۆڵكردنی پەرلەمان و گردبوونەوە لە دەرەوەی بارەگاكەی 
ساڵح محەمەد عیراقی كە وەك كەسێكی نزیكی رابەری رەوتی سەدر دەناسرێت و «وەزیری قائید» ناودەبرێت، داوای لە لایەنگرانی رەوتی سەدر كردبوو كە لەنێو بارەگای ئەنجومەنی نوێنەراندا مانگرتییان راگەیاندبوو، بارەگای پەرلەمان چۆڵ بكەن. 
وەزیری سەدر لە تویتێكیدا لەسەر تۆڕی كۆمەلایەتی «تویتەر» رایگەیاندبوو»لە دوای رزگاركردنی ئەنجومەنی نوێنەران و ئەنجومەنی گەل بە پشتیوانی خودا و هەوڵ و كۆششی شۆڕشگێڕە نەبەردەكان، بڕیاردرا:
یەكەم: چۆڵكردنی بارەگای پەرلەمان و سازدانی مانگرتنەكان لەدەوروبەری پەرلەمان و ناوچە نزیكەكانی. 
دووەم: گەر شوێنی تر هەبوو پێویستی كرد مانگرتنی تێیدا رابگەیەنرێت، ئەوا یەك لەدوای یەك رێنماییەكانتان پێدەگات. 
سێیەم: بەردەوامبوونی مانگرتنەكان زۆر گرنگە بۆ هێنانەدی داواكارییەكانتان، بۆیە پێویستە مانگرتنەكان وەجبە بە وەجبە رێكبخرێن، لەگەڵ مانەوەی چۆشدان و ئامادەكاریی لە كاتە دیاركراوەكاندا. 
چوارەم: سازدانی نوێژی هەینی یەكگرتوو بۆ بەغدا و كوت و كەربەلا و نەجەف لە گۆڕەپانی ئاهەنگەكان لە كۆتایی هەفتەدا. 
لە كۆتایی تویتەكەشدا نوسیبوی»لەقۆناغی پێكهێنانی لیژنەیەكدان لەلایەن خۆپیشاندەران، بۆ بەڕێوەبردن و رێكخستن و بایەخدانی بە خۆپیشاندانەكان و دابینكردنی پێداویستییەكانیان». 

هەڵوەشاندنەوەی پەرلەمان و هەڵبژاردنی پێشوەختە 
هەر لەو چوارچێوەیەدا، موقتەدا سەدر رابەری رەوتی سەدر، داوای هەڵوەشاندنەوەی پەرلەمان و هەڵبژاردنی پێشوەختەی كرد، لە هەمان كاتدا داوای لە خۆپیشاندەران كرد، بەردەوامبن و درێژە بە مانگرتن بدەن. 
سەدر لە وتارێكی تەلەفیزڤیۆنیدا رایگەیاند»دووژمنایەتی كەس ناكەم، تەنانەت ئەوانەش كە دەیانەوێت بمكوژن وەك لە نامە دەنگییە دزەپێكراوەكاندا هاتووە، دیالۆگ لەگەڵ ئەواندا تاقیكراوەتەوە و ئەزموونمان وەرگرتووە كە جگە لە ماڵوێرانی و شوێنكەوتەیی چی دی لێنەكەوتەوە ، بۆیە دیالۆگ لەگەڵیاندا بێ‌ سودە»، ئاماژەی بە هەوڵە گوماناوییەكانیش كرد كە بە وتەی ئەو»بونە مایەی لەگەڕخستنی پێكهێنانی حكومەتی زۆرینە». 
سەدر لە قسەكانیدا كە رووی دەمی كردە هاووڵاتیان وتی»گەلی عیراق، گەر گۆڕانكاریتان دەوێ‌ منم چاوەڕێی ئێوەم، بڕیارم لەسەر چوونە نێو هەڵبژاردنی نوێ‌ یان بەشدارینەكردن نەداوە، داوای هەڵبژاردنی پێشوەختە دەكەم، لە دوای هەڵوەشاندنەوەی پەرلەمانی ئێستا، خۆپیشاندەرانیش پێویستە بەردەوامبن و لەخشتەنەبرێن بەوەی كە شۆڕشەكە ململانێیە لەپێناو دەسەڵاتدا». 
سەدر پێیوایە»چاكسازیی بەبێ‌ قوربانیدان سەرناگرێت، ئەو تەواو ئامادەیە بۆ شەهیدبوون لەپێناو چاكسازی، شۆڕش بە سەدرییەكان دەستییان پێكرد كە بەشێكن لە گەل، شۆڕش گەندەڵەكانی نێو رەوتی سەدریش بەدەرناكات». 
سەدر دەڵێت»هەرگیزا و هەرگیز بە خوێنڕشتن رازیی نابم، زۆربەی گەلی عیراق لە تەواوی توێژی فەرمانڕەواكان بێزارن، بۆیە بوونی من بەكاربهێنن بۆ كۆتایی هێنان بە گەندەڵی». 

كاردانەوەكان بەرامبەر بە وتارەكەی سەدر
لە دوای وتارەكەی موقتەدا سەدر، نوری مالیكی سەرۆكی هاوپەیمانی دەوڵەتی یاسا رایگەیاند»گفتووگۆكان لە گەڕانەوە بۆ دەستورەوە دەستپێدەكەن». 
مالیكی لە وتارێكیدا كە لەڕێی تۆڕی كۆمەڵایەتی «تویتەر»ەوە بڵاویكردەوە رایگەیاند»ئەو دیالۆگە راستگۆیانەی هیواخوازین ببێتە مایەی یەكلایی كردنەوەی ناكۆكییەكان و گێڕانەوەی كاروبارەكان بۆسەر راستەڕێی خۆیان، لە گەڕانەوە بۆ دەستور و رێزگرتن لە دامەزراوە دەستورییەكانەوە دەستپێدەكات». 
هەر لەو چوارچێوەیەدا، حەیدەر عەبادی سەرۆكی هاوپەیمانی نەسر، پێشوازیی لە وتارەكەی موقتەدا سەدر رابەری رەوتی سەدر كرد كە داوای هەڵوەشاندنەوەی پەرلەمان و هەڵبژاردنی پێشوەختەی كردبوو. 
عەبادی لە تویتێكیدا لە دوای وتارەكەی سەدر رایگەیاند»پێشوازیی لە وردەكاریی وتارەكەی برامان سەید موقتەدا سەدر دەكەم كە لە زۆر رووەوە لەگەڵ دەستپێشخەرییەكەی ئێمەدا یەكانگیرە بۆ چارەسەركردنی تەنگژەكان، دەستخۆشی لە سەدر و هەموو برایان دەكەم بۆ پارێزگاریی لە خوێنی عیراقییەكان و هێنانەدی چاكسازیی»، داواشی لە هەموو لایەنەكان كردبوو»دەست لەناودەست بۆ خزمەتكردن بە گەل و چاكسازیی سیستمی سیاسی و پشتیوانی لە دەوڵەتی دەستوری كاربكەن، لەڕێی پڕۆسەیەكی دیموكراتی و تەندروست و ئاشتیخوازانە». 
بە هەمان شێوە محەمەد تۆفیق عەللاوی سیاسەتمەداری عیراقی، لەبارەی دوایین وتاری موقتەدا سەدر رابەری رەوتی سەدەرەوە رایگەیاندبوو»كاتێك سەید موقتەدا سەدر لە پەرلەمان پاشەكشەی كرد بە مەبەستی داخستنی دەرگاكان لەبەردەم بەردەوامبوونی پڕۆسەی سیاسی، بەداخێكی زۆرەوە هەندێك وەك سەركەوتن بەسەر رەوتی سەدردا مامەڵەیان كرد، سەدر هەلێكی زێڕینی پێبەخشین بۆ پێكهێنانی حكومەت لەسەر بنەمای یەكسانی، بگرە ئەوانی خستەپێش خۆیەوە لەپێناو بەرژەوەندی وڵاتدا، بەڵام لە ئامانجەكانی تێنەگەیشتن بۆ هێنانەدی بەرژەوەندییە نیشتمانییەكان». 
بە وتەی عەللاوی»ئەوان ویستییان وا مامەڵە بكەن وەك ئەوەی سەركەوتوون و سەدر و رەوتەكەی دۆڕاون، ئەوەی پێویستە لەم قۆناغە چارەنوسساز و كاتە ناسكەدا بكرێت ئەوەیە كە براوە و دۆڕاو نەبێت، جگە لە گەڕانەوەش بۆ مێزی دیالۆگ و هاتنەدەرەوە بە یدێكی هاوبەش هیچ چارەسەرێكی ترمان لەبەردەمدا نییە، تا لێوەی بتوانیین وڵات رزگاربكەین و لەم رەوشە خراپە دەربچین كە عیراقی پێدا تێدەپەڕێت و هاووڵاتیانی عیراقی بگەیەنینە ئەو پێشكەوتن و پەرەسەندن و گەشەكردنەی شایەنیانە». 
هەر لەو بارەیەوە، خەمیس خەنجەر سەرۆكی هاوپەیمانی (عەزم) رایگەیاند»پشتیوانی لە هەموو هەوڵێكی دڵسۆزانە دەكەین بۆ رزگاركردنی عیراق و چارەسەكردنی چەقبەستنی سیاسی كە دەوڵەت و بەرژەوەندی گەلی لەگەڕخستووە. پشتیوانی لە ناوەرۆكی وتارەكەی سەماحەتی سەید موقتەدا سەدر دەكەین بەرەو هەڵبژاردنی پێشوەختە، بەپێی پێوەری نوێ‌ و یاسایەكی دادپەروەرانە كە رێگە بۆ كێبڕكێیەكی راستەقینە خۆش بكات». 

#ئاوێنەی عیراق

بابەتە پەیوەندیدارەکان