لەزیزا جەلالەددین
بابەتێ خواستنا كچان و دانوشوویا كچان، بوویە ئێك ژ بابەتێن سەرەكی د ئەڤرویا مەدا. ژلایەكیڤە كچ یێ قەیرە دبن و ژلایەكێ دیڤە كور زگورد دمینن و كی بەرپرسە ژڤێ چەندێ؟ ئەڤە ئەو پرسیار بوون یێن من و هەڤالەكا خۆ دانوستاندن ل سەر دكر و ئەوا دناڤبەرا مەدا هاتیە بەحسكرن، ئەز دێ كەمە نڤیسین و هیڤیدارم كچێن مە و دایكێن مە و مالباتێن كچا بۆ خوە مفای ژێ وەبگرن.
كوری گوتە مالباتا كچێ من مەرجەكێ هەی؟ ئینا مالباتا كچێ گوتە كوری، هندی مە دیتی كچ مەرجان ددانە بەر كوران! ئینا كوری گوتێ ژبەركو ئەڤە دێ ژیانا من و وێ بتنێ بیت، ئەز حەز دكەم هین دەرفەتێ بدەنە من، ئەز و كچ چەندەكێ دگەل ئێك باخڤین
هەڤالا من بەحسا دوو رویدانێن هەڤژینیێ كر، ئێك: گوت ل بازارێ دهۆكێ و ل بەر چاڤێن خەلكی دەما كەس و كارێن زاڤای دگەل بیكێ چووینە بازارێ زێرنگران بۆ كرینا زێرێ داخوازكری، بویكێ داخوازیێن خوە زێدەكرن و بۆ شەرە دەف دناڤبەرا واندا و كەس و كارێن زاڤای بیك و دەیكا بیكێ ل بازاری هێلان و قەستا مالێن خوە كرن ڤە و دووماهیێ مە نەزانی بابەتێ وان چ لێهات، ئایا پێكهاتن یان بابەتێ تەمامكرنا شەهیانا وان ب ئێكجاری ب دووماهی هات؟. رویدانا دوێ: دەما چووینە خوازگینیێن كچەكێ بۆ كورەكی و كور و كچ پێكهاتین، كوری گوتە مالباتا كچێ من مەرجەكێ هەی؟ ئینا مالباتا كچێ گوتە كوری، هندی مە دیتی كچ مەرجان ددانە بەر كوران! ئینا كوری گوتێ ژبەركو ئەڤە دێ ژیانا من و وێ بتنێ بیت، ئەز حەز دكەم هین دەرفەتێ بدەنە من، ئەز و كچ چەندەكێ دگەل ئێك باخڤین و بابێ كچێ ژی رازی بوو و كورتیا وێ كوری گوتە كچێ، ژبەركو ئەز و تو دێ خێزانەكێ پێكئینین و ئەم هەردو پێكڤە دێ بینە بەرپرس ژ رێڤەبرنا وێ خێزانێ، بوویە باشترە مەزاختیێ خوە یێ داوەتێ كێم بكەین، ئەو پارێن بۆ سالونێ دچن ئەم دشێین بەفرگرەكێ و تیڤیەكێ پێبكرین، ئەو پارێن بۆ دو دەستێن جلكان دچن ئەم دشێین هندەك پێدڤیێن دی یێن مالێ بكرین و شوینا ئەم ژ خالا سفرێ دەستپێبكەین و ب مینینە ل هیڤیا كا دێ چ دیاری بۆ مە هێن ئەم پێدڤیێن مالێ بۆ خوە بكرین، شوینا ئەم خوە قەردار بكەین، دێ مالا مە یا دروست بیت! كچێ گوتی ئەز یا رازیمە و ئەز دێ دەستان ژ داخوازیێن زێدە بەردەم و بتنێ یێن پێدڤی نەبن و ئەڤێن بهایێ وان ئەرزان و كەیفا بابێ كچێ ژی هات.
هەردوو نموونێن هەڤالا من ئیناین گەلەك دجوان و سەردەمیانە بوون، ئایا مە ئەو كور و كچ و مالبات هەنە ڤێ هزرێ بكەن، شوینا مەزاختیەكێ زێدە، دەستپێكەكێ بۆ كور و كچێن خوە دروست بكەن و ئەڤە ژبلی نوكە ب سەدان كچ یێ بەرەڤ قەیرەبوونێ دچن، ژبەركو كور نەشێن داخوازیێن وان بجه بینن و ب سەدان كور هێشتا زگوردن، ژبەركو بارێ وان یێ ئابوری یێ هاریكار نینە كو پرۆسا هەڤژینیێ پێكبینن.
