قوباد تاڵەبانی، جێگری سەرۆک وەزیران لەگەڵ ئەحمەد داودئۆغڵو، سەرۆک وەزیرانی پێشووتری تورکیا و سەرۆکی پارتی ئایندە کۆبووەوە و پێکەوە پرۆسەی ئاشتی لە تورکیا و چونییەتی بەهێزترکردنی پەیوەندییەکانی نێوان هەردوولایان تاوتوێ کرد.
لە دەستپێکی کۆبوونەوەکەدا کە رۆژی دووشەممە (19/5/2025) بەڕێوەچوو، داودئۆغڵو باسی لە هاوڕێیەتی ٢٠ ساڵەی خۆی لەگەڵ سەرۆک مام جەلال کرد و پەرۆشی و هەوڵە بەردەوامەکانی سەرۆک مام جەلالی بۆ چارەسەرکردنی ئاشتییانەی کێشەکان لە کوردستان و عیراق و ناوچەکە و بە تایبەتیش پرۆسەی ئاشتی لە تورکیا بیرهێنایەوە.
لە تەوەرێکی کۆبوونەوەکەدا ئاڵۆگۆڕی بیروڕاکرا سەبارەت بە پرۆسەی ئاشتی لە تورکیا. هەردوولا هاوڕابوون لە ئاشتیدا هیچ لایەنێک دۆڕاو نییە و جەختیشیان کردەوە لە گرنگیی پابەندیی لایەنە پەیوەندیدارەکان بە هەنگاونانی پێویست بۆ سەرخستنی پرۆسەکە. لەمبارەیەوە قوباد تاڵەبانی ئاماژەی بەوەدا سەرکەوتنی پرۆسەی ئاشتی نەک تەنها بۆ هەردوو گەلی کورد و تورک لە تورکیا بەڵکو لە بەرژەوەندی هەموو ناوچەکەدایە، هەربۆیە پێویستە هەموو لایەنێک یارمەتیدەر و هاوکاربن لە سەرخستنی پرۆسەکەدا.
لە بەشێکی دیکەی کۆبوونەوەکەدا باس لە پێویستیی کاری هاوبەش کرا بۆ بەهێزترکردنی پەیوەندییەکانی نێوان هەرێمی کوردستان و تورکیا. جێگری سەرۆک وەزیران ئاماژەی بەوەکرد هەرێمی کوردستان خوازیارە لە هەموو روویەکەوە پەیوەندییەکانی لەگەڵ تورکیادا بەهێزتر بکات و وتیشی، لە بەرژەوەندی هەردوولادایە کە هەرچی زووتر ئاسمانی تورکیا بەڕووی گەشتە ئاسمانییەکانی فڕۆکەخانەی نێودەوڵەتیی سلێمانیدا بکرێتەوە.
