بەبۆنەی یۆبیلی زێڕینی یەکێتیی نیشتمانیی کوردستانەوە

پێشانگەیەكی تایبەت بە وێنەكانی سەرۆك مام جەلال، لە هەولێر كرایەوە

دوێنێ، پێشانگەی 200 وێنە، 200 درەوشانەوە، لەلایەن بۆردی راگەیاندنی یەكێتیی نیشتمانیی کوردستان، لە هەولێر کرایەوە. لە پێشانگەکەدا کە كۆمەڵێك وێنەی دەگمەنی سەرۆك مام جەلال-ی تێدا نمایش کرابوو، ژمارەیەك لە لێپرسراوانی حزبی و حكومی و ئەندامانی پەرلەمان و خەڵکی شاری هەولێر ئامادەبوون.
پێشانگەی 200 وێنە، 200 درەوشانەوە تایبەت بوو بە كۆمەڵێك وێنەی دەگمەنی سەرۆك مام جەلال و لەلایەن مەریوان مەسعود راگەیاندنكار و جێگری سەرنووسەری كوردستانی نوێ-وە، ئامادەكرابوو.
دوای كردنەوەی پێشانگەكەش، سەعدی ئەحمەد پیرە وتەبێژی یەکێتی رایگەیاند: مام جەلال یەكێك لەو کەسانە بوو، رۆژانە لەسەر مێزەكەی لیستێك هەبوو بەدواداچوونی بۆ دەكرد، كە پەیوەندی بە ژیانی رۆژانەی خەڵكەوە هەبوو، لەوانە دۆخی ئاو و كارەبا و نرخی خۆراك، بۆیە بڕوا ناكەم لە رابردوو و ئێستا و داهاتووش، لێپرسراوێكی سیاسی هەبێت، ئەوەندە گرنگیدانەكەی فراوان بێت كە پەیوەندی بە ژیانی رۆژانەی خەڵكەوە هەبێت.
وتیشی: مام جەلال تەنیا لە یەكێتی و خێزانەكەی نەڕۆیشت، بگرە لە هەموو تاكێكی كورد و عیراق چوو، تەنانەت بەمدواییە بوو بە سەرۆكی فەخریی سۆسیال ئەنتەر ناسیۆناڵ، كە زۆربەی وڵاتانی ئەوروپا و باشووری رۆژهەڵاتی ئاسیا، دەگرێتەوە.
جێگەی ئاماژە بۆکردنە، لە پێشانگەکەدا بەشێکی زۆر لەو وێنانەی مام جەلال نمایشکرا، کە دەگەڕێنەوە بۆ سەرەتاکانی ژیانی سیاسی و دامەزراندنی یەکێتی و ژیانی شاخ و قۆناغەکانی دوای راپەڕین و پرۆسەی ئازادیی عیراق و ماوەی سەرۆکایەتیی کۆمار، کە هەریەکەیان گوزارشت لە قۆناغێک دەکات.
هەولێر، تەها عەبدوڵڵا