پۆلیسی سلێمانی سێ کەسی دەستگیرکردووە کە تۆمەتبارن بە دزینی زیاتر لە 80 ملیۆن دیناری عیراقی لە ماڵی هاووڵاتییەکی سەیدسادق.
پۆلیسی سلێمانی رایگەیاندووە، هاووڵاتییەک سکاڵای تۆمارکردووە کە دزی لە ماڵەکەی کراوە و پارەی لێ براوه، دوای بەدواداچوون، مەفرەزەکانی نووسینگەی نەهێشتنی تاوانی سەیدسادق تۆمەتبارەکانیان دۆزیوەتەوە و دەستگیریان کردوون.
بەپێی راگەیاندراوەکەی پۆلیسی سلێمانی، ئەو سێ کەسەی دەستگیر کراون، بڕی 50 ملیۆن دیناری عیراقی و 22 هەزار و 500 دۆلاری ئەمریکییان لە ماڵی سکاڵاکار دزیوە.
لە راگەیاندراوەکەدا ئەوەش خراوەتەڕوو، لەکاتی دەستگیرکردنی تۆمەتبارەکاندا دەستگیراوە بەسەر دوو چەک لە جۆری دەمانچە و دوو ئۆتۆمبێل و بڕێک لە پارە دزراوەکەدا.
پۆلیسی سلێمانی دەشڵێت، لە ئێستادا تۆمەتبارەکان بە بڕیاری دادوەر راگیراون و لێکۆڵینەوە لە رووداوەکە بەردەوامە.
