دوای چەند سەعاتێک لە چەقبەستوویی لەسەر بڕیاردان سەبارەت بە پەسەندکردنی پرۆژەیاسای ناسراو بە پرۆژەیاسا گەورە جوانەکەی ترەمپ، کۆمارییەکان لە ئەنجومەنی پیران پرۆژەیاساکەیان پەسەندکرد کە باس لە باج و خەرجییەکان دەکات، بەمەش یاسا پێشنیازکراوەکە یەکێک لە بەربەستە سەرەکییەکانی پەسەندکردنی تێپەڕاند.
ئەم پرۆژەیاسایە بڕگە سەرەکییەکانی یاسای کەمکردنەوەی باج و زیادکردنی داهات و هەلی کاری ساڵی 2017 درێژدەکاتەوە کە بڕیارە لە کۆتاییەکانی ساڵی 2025 کۆتایی بێت.
پرۆژەیاساکە دوای پرۆسەیەکی درێژخایەن و 24 سەعاتی تەواو لە مشتومڕ لە قۆناغی یەکەمیدا بەزەحمەت پەسەندکرا. ئەنجومەنی پیران بە یەکسانی دابەشبوون بۆ (50-50) و جەی دی ڤانس جێگری سەرۆک دەنگی یەکسان شکێنی دا و لە ئەنجومەنی پیران پەسەندکرا.
لە ئێستادا پرۆژەیاساکە بە فلتەرێکی تردا دەڕوات کە ئەویش یاسادانەرانن لە ئەنجومەنی نوێنەران، واتە هێشتا ئەگەر هەیە کە بەتەواوی پەسەندنەکرێت و رووبەڕووی پاشەکشە ببێتەوە.
جێی ئاماژەیە ترەمپ وادەی 4ی تەمموزی بە کۆنگرێسی ژێر دەسەڵاتی کۆمارییەکان دابوو بۆ ئەوەی ئەنجامی کۆتایی پرۆژەیاساکەی بخەنە بەردەست، تا ئیمزای بکات و ببێتە یاسا.
کوردستانی نوێ، باهۆز ئاسۆ
