راپۆرتی/ عەبدولڕەحمان بامەڕنی
دھۆك ب سرۆشتێ خوە یێ چیایی، دشێت ببیتە ئێك ژ باژێرێن هەرە گرنگێن گەشتیاری و چەندین ھاڤنیگەھـ و جهێن گەشتیاری لێ هەنە و ئەگەر بەراوردییەكێ بكەین، بەری سەرھلدانێ كەرتێ گەشتیاری گەلەك باشتر بوو ژ نوكە، ئەڤە گوتنێن ئێك ژ ھاوولاتییان بوو و زێدەتر گوت: «ئەگەر نموونا ھاڤینگەھا سەرسنكێ بینم، چ جارەكێ ئەم نەشێین بەراوردیا پێشكەفتنا ڤێ ھاڤینگەهێ ل بەری و پشتی سەرھلدانێ بكەین».
سەرسنكا ناهێتە بەراوردكرن
سەرسنكا بەری سەرھلدانێ چ جارەكێ ب یا پشتی سەرھلدانێ ناھێتە بەراوردكرن، ئەڤە گوتنێن ھاوولاتییەكێ د ژیێ خوە یێ 53 سالیێ دابوون، گوت: «بیرا من ل بەری سەرھلدانێ دھێت، سەرسنكێ ئێك ژ ھاڤینگەھێن هەرە پێشكەفتی بوو ل پارێزگەھا دھۆكێ و خەلكەكێ زور قەستا وێ دكر و هەمی گاڤان جادێن وێ ژ گەشتیاران تژی بوون و بەردەوام خەلكی ژ باشوور و ناڤەراستا عیراقێ د ھاتنێ و جهێن نڤستنێ تێرا گەشتیاران نەدكرن و خەلكی خانیێن خوە ب كرێ ددان».
ئەحمەد باپیر زێدەتر گوت: «بەری سەرھلدانێ مە ناسیارەك ل سەرسنكێ هەبوو و خانیێ وی ژ شەش ژووران پێكدھات و ل وەرزێ ھاڤینێ، ئەو خێزانا خوە د چوونە د ژوورەكێڤە و ئەڤێن دی هەمی ددان ب كرێ و نە بتنێ ئەو، بەلكو ئەگەر كەسەكی تۆڤك فرۆشتبانە یان چایدانكەكێ چایێ و چا فرۆشتبایە یان هەر جورەكێ فێقی (میوە)، د شییا خێزانەكێ ب خودان بكەت، لێ نوكە سەرسنكێ یا چۆل بووی و مخابن ھاڤینگەهەكا ھوسا یا بێ خودان بیت».
ئەگەر مە بڤێت هاڤینگەها سەرسنكێ پێشبكەڤیت، دڤێت حكومەت هاریكاری و رێخوشكرنێ بۆ وەبەرھێنەر و سەرمایەداران بكەت و ئەو پرۆژێن گەشتیاری یێن سەردەم دروست بكەن و لدووماھیێ و بەراهیێ خەلكێ دهۆكێ هەمی دێ یێ سودمەند بیت
لدوور كا ئەگەرێن ڤێ پیتەپێنەدانێ چنە؟ ڤی ھاوولاتی گوت: «هەرچەندە ئەڤە ئەركێ حكومەتێ و رێڤەبەریا گەشتیارییە، لێ بەشەكێ وێ بۆ خەلكێ ڤێ ھاڤینگەهێ بخوە ژی دزڤریت و ئەز دشێم بێژم مە عەقلیەتا گەشتیاری نینە، دڤێت جوداھیێ دناڤبەرا جهێن گەشتیاری و دابونەریتاندا دروست بكەین، ئەگەر مە بڤێت ئەم ل دەڤەرەكا گەشتیاری بژین، نابیت ئەم رێگریێ بكەین و ژخوە ئەگەر ئەم ب دابونەریتانڤە گرێدایی بین، دڤێت مالێن خوە ببەینە جهەكێ دی».
ئەگەرێ پێشنەكەفتنا گەشتوگوزاری ل دهۆک
ھاوولاتییەك دبێژیت: «بەری سەرھلدانێ من كۆشكەكا فرۆشتنا چایێ ل سەرسنكێ هەبوو و رۆژێن بێهنڤەدان و پێنج شەمبی و ئەینیان من دوو تا سێ بەردەستك ژی هەبوون و ب زوری ئەم ڤێرا د گەھشتین و نە بتنێ بۆ من، بەلكو چەندین ھوتێل و موتێل و خوارنگەھـ و خورانگەھێن سەفەری لێ هەبوون و هەمیان ژی كار دكر». ئەرێ بۆچی نوكە سەرسنكێ وەسانا ھێتە دیتنێ؟ چیایی نەبی گوت: «ئەگەرێ پێشنەكەفتنا گەشتوگوزاری لدەف مە گەلەكن و دا كو كەرتێ گەشتیاری پێش بكەڤیت، دڤێت ئێكەم جار پشتەڤانیا حكومەتێ بۆ هەبیت و خالا دووێ و گرنگ، دڤێت خەلكی ژی ئەو بەرهەڤییە هەبیت و خەلك یێ ھاریكار بیت، بۆ راكێشانا گەشتیاران، ئەو ژی چ ب راگرتنا پاقژیا باژێری و پێشكێشكرنا خزمەتگوزاریان و پێشوازیەكا جوان ل گەشتیاران».
هاڤینگەها مەلەكی
عەبدولرەزاق نهێلی پسپورەك د زانستێن گەشتیاریدا دبێژیت: «گەلەك ھوكار هەنە كو رەوشا ھاڤینگەھا سەرسنكێ یا بەری سەرھلدانێ ب یا پشتی سەرھلدانێ نەھێتە بەراوردكرن و ھوكارێ سەرەكی ژی، پشتی سەرھلدانا سالا 1991ێ و ل سەر دەمێ بەرەیێ كوردستانی، ئەڤ ھاڤینگەهە و گەلەك جهێن دی ژی ژ لایێ ھاوولاتییانڤە ھاتنە وێرانكرن و كەسەكێ دیڤچوونەك بۆ ڤێ چەندێ نەكر و پشتی ھینگێ و حكومەتا هەرێما كوردستانێ و كابینێن ئێك لدویڤ ئێك ژی، ئەو گرنگیا جاران ب ھاڤینگەھا سەرسنكێ نەدان و ئەڤە ژی بۆ ئەگەر كو خەلك خوە د گوندێن گەشتیاری، ئاڤاھیێن گەشتیاری و ھوتێل و موتێلانڤە ڤە ئاسێ بكەن.
دھۆك ب سرۆشتێ خوە یێ چیایی، دشێت ببیتە ئێك ژ باژێرێن هەرە گرنگێن گەشتیاری و چەندین هاڤنیگەھـ و جهێن گەشتیاری لێ هەنە و ئەگەر بەراوردییەكێ بكەین، بەری سەرهلدانێ كەرتێ گەشتیاری گەلەك باشتر بوو ژ نوكە
عەبدولرەزاق نهێلی زێدەتر گوت: «ھوكارەكێ دی ئەگەر بەحس بكەین، وەبەرھێنەر و سەرمایەدارێن دھۆكێ دڤێت خوە ل پێشخستنا ڤان جهان بكەنە خودان و ئەگەر ئەو بەرێ خوە بدەنێ و ئاڤەدانیێ تێدا بكەن و بێخنە د خزمەتدا، دێ گەشتیار ژ هەمی پارێزگەھان قەست كەنێ و ئەو دێ سودمەندێن ئێكێ بن و ب مخابنیڤە ئەڤە نەھاتیە كرنێ و سەرسنكێ ب ھوتێلا بەری یا ناڤدارە و ئەڤە بۆ ماوێ چار بۆ پێنج سالانە كار د نووژەنكرنا وێدا دھێتەكرنێ و چ نەمایە دێ كەڤیتە كاری و ئەڤ ھوتێلە روویەكێ گرنگێ ھاڤینگەھا سەرسنكێ یە».
گوت ژی: «ئەگەر مە بڤێت ھاڤینگەھا سەرسنكێ پێشبكەڤیت، دڤێت حكومەت ھاریكاری و رێخوشكرنێ بۆ وەبەرھێنەر و سەرمایەداران بكەت و ئەو پرۆژێن گەشتیاری یێن سەردەم دروست بكەن و لدووماھیێ و بەراھیێ خەلكێ دھۆكێ هەمی دێ یێ سودمەند بیت».
جهێ ئاماژێ یە كو سەرسنكێ ددەمێ خوەدا ب ھاڤینگەھا مەلەكی دھاتە ب ناڤكرنێ، ژبەر هەبوونا قەسرا مەلكی و دیسان ھوتێلا حەجەری و چەندین كۆشك و ئاڤاھیێن دی یێن گەشتیاری و ئەگەر ئەو بكەڤنە كاری و رێخوشكرن بۆ هەبیت، دێ گەشتیارەكێ زێدە قەست كەتێ و دێ ئابوورێ وێ دەڤەرێ هەمیێ پێشكەڤیت.
