سەرۆک بافڵ جەلال تاڵەبانی: ئەرکی ئێمەیە ژیانێکی شایستە بۆ هاووڵاتیانمان دەستەبەر بکەین

‏‎بافڵ جەلال تاڵەبانی، سەرۆکی یەکێتیی نیشتمانیی کوردستان لە بارەگای مەکتەبی سیاسی لە ھەولێر پێشوازیکرد لە باربارا لیف، یاریدەدەری وەزیری دەرەوەی ئەمریکا بۆ کاروباری رۆژھەڵاتی ناوەڕاست و وەفدێکی یاوەری کە پێکھاتبوون لە ئەلینا رۆمانۆسکی، باڵیۆزی ئەمریکا لە عیراق و ئێرڤن ھیکس کونسوڵی گشتیی ئەمریکا لە ھەرێمی کوردستان.

‏‎سەرۆک بافڵ جەلال تاڵەبانی لەبارەی کۆی پرس و پێشهاتەکانەوە هەڵوێستی نیشتمانی و بەرپرسیارانەی یەکێتی خستەڕوو و وتی، لە سەرەتاوە هەوڵەکانمان لەپێناوی یەکخستنەوەی نێوماڵی کورد و یەکڕیزیی نێوان هێز و لایەنە کوردییەکاندا بووە. چونکە پێمانوایە یەکگوتاریی کورد لە بەغدا فاکتەری پاراستن و بەدەستهێنانی مافە یاسایی و دەستوورییەکانی کورد و بەهێزترکردنی قەوارەی هەرێمە. لەسەر ئاستی عیراقیش دەستوور بنەمای کارکردنمانە و باوەڕی نەگۆڕمان بە تەبایی و پێکەوەژیانە و دەمانەوێت هەموان پێکەوە لەپێناوی بونیادنانی داهاتوویەکی گەشتردا کار بکەین.

‏‎سەبارەت بە پرسی نەوت و غاز لە نێوان ھەرێم و بەغدا، سەرۆکی یەکێتی راشکاوانە روونکردنەوەی پێشکەشی وەفدی ئەمریکا کرد و وتی، پابەندنەبوون بە دەستوور و یاسا بەرکارەکان و ململانێ سیاسییەکان ھۆکاربووە بۆ رێکنەکەوتن و پێنەدانی شایستە داراییەکانی خەڵکی کوردستان. هەرچەندە پێمانوابووە نابێت کێشەسیاسییەکان ببەسترێتەوە بەقووتی خەڵکەوە و دەبێت سامانی ئەم وڵاتە لە خزمەت هەموواندا بێت. بەردەوام لە ھەوڵیشدا بووین تاوەکو کێشەکان لە رێگای گفتوگۆوە چارەسەر بکەین و تیمی یەکێتیش لە حکومەت رۆڵی گرنگی لەوبارەیەوە گێڕاوە.

‏‎لە کۆتایی کۆبوونەوەکەدا رووبەڕوونەوەی گەندەڵی و سەرخستنی پڕۆسەی چاکسازی لە هەرێم گفتوگۆی لەبارەوەکرا و سەرۆک بافڵ جەلال تاڵەبانی رایگەیاند، بەهەمووشێوەیەک دژی گەندەڵی و تەمبەڵی دەوەستمەوە. ئەرکی ئێمەیە ژیانێکی شایستە بۆ هاوڵاتییانمان دەستەبەر بکەین و بۆ ئەمەش رێگە بەهیچ کەسێک نادەین دەست بۆ ماف و موڵکی گشتی ببات .