هەمواركردنەوەی پەیڕەوی ناوخۆی یەكێتیی نیشتمانیی كوردستان تەواو بووە، كۆمەڵێك مەكتەب و ئۆرگانیش بەپێی هەمواركردنەوەكە گۆڕانكاریی تێدا دەكرێت و سزا و پاداشتیش بەروونتر دیاریكراوە "هەر لێپرسراو و كادرێكی یەكێتی توندوتیژی بەرامبەر ژن بكات، سڕ دەكرێت".
هەمواركردنەوەی پەیڕەو بەلیژنەیەك سپێردرا، دوای ئەوەی 88 ئەندامی ئەنجومەنی سەركردایەتی داوایەكیان پێشكەشكرد و ئێستا كاری هەمواركردنەوەكە تەواو بووە، پەیرەوی پێش هەمواكردنەوە لە 80 ماددە پێكهاتبوو كە لە لایەن ئەنجومەنی سەركردایەتییەوە ئامادەكرا كە لە كۆنگرەی چوارمی یەكێتیی نیشتمانیی كوردستان هەڵبژێردرابوون، كە لە رۆژانی (21-25/12/2019) بەڕێوەچوو.
گۆڕانكارییەكان یاسایین
تەلار لەتیف لێپرسراوی ناوەندی كاروباری یاسایی ی.ن.ك، لە دیدارێكی PUKMEDIA دا، باس لە هەندێك گۆڕانكاری و پەیڕەوەكە دەكات و دەڵێت:" هەموار و گۆڕانكارییەكان تەواو پەیڕەویی و یاسایی بووە" و گرنگترین گۆڕانگاریی هەڵوەشاندنەوەی سیستمی هاوسەرۆكی و دانانی "سەرۆك"ە بۆ یەكێتی و لەسەر ئەو بنەمایە رێكخراوەتەوە.
رۆژی 28-8-2022 ئەنجومەنی سەركردایەتی یەکێتیی نیشتمانیی كوردستان كۆبوونەوەی خۆی كرد و بەزۆرینەی دەنگی 121 ئەندامی سەركردایەتی بافڵ جەلال تاڵەبانی بە سەرۆكی یەكێتی هەڵبژارد و لیژنەی هەمواركردنەوەی پەیڕەویش پەسەندكرا.
لێپرسراوی ناوەندی كاروباری یاسایی ی.ن.ك دەڵێت: "هەموو رێوشوێنەكانی كۆبوونەوەكە و هەڵبژاردنی سەرۆك و هەمواركردنەوەكەش یاسایی و پەیڕەوی بوون" بەو پێیەی پێشتریش دەسەڵاتی نووسین و ئامادەكردنی پەیرەوی حزب بە 121 كەسەكەی ئەنجومەنی سەركردایەتی سپێردراو بۆ هەمواریش بەهەمانشێوە ئەندامانی سەركردایەتی دەسەڵاتی هەمواركردنەوەی بەلیژنەیەك سپارد.
88 ئیمزا
بۆ گۆڕانكاریی پەیرەو پێویستە 50+1 ئەندامی سەركردایەتی داواكاری ئیمزابكەن، بەڵام بۆ ئەم 88 ئەندام داوایان ئیمزاكرد.
بەوتەی لێپرسراوی ناوەندی كاروباری یاسایی بەگوێرەی پەیڕەو پێكهاتە و ژمارەی ئەندامانی مەكتەبی سیاسی گۆڕانكاریی بەسەردا هاتووە و وتی: "پێشتر هەر لێپرسراوی مەكتەبێك دەبوو بە ئەندامی مەكتەبی سیاسیی، لە هەموارەكەدا ئەو مەرجە لابراوە و ئەو هەڤاڵەی دەبێتە ئەندامی مەكتەبی سیاسیی مەرج نییە مەكتەب و ئۆرگانی لە لابێت".
ئاشكرایكرد كە ژمارەی ئەندامانی مەكتەبی سیاسیی و دەستەی كارگێریی زیاددەكات لە بەر پێویستی و زیادكردنی ئەرك و ئیشوكارەكان.
رێژەی ژنان بەرزكرایەوە
بەش و رێژە و رۆڵ و بەشداری ژن، لە پەیڕەوەی هەمواركراودا چەسپێندراوە و رێژی ژن لە 20% لە ئەنجومەنی سەركردایەتی و ئۆرگانەكانی تریشدا بۆ 25% بەرزكراوەتەوە، ئەوەش وەك پاراستنی رێبازی سەرۆك مام جەلال لە پشتیوانی ژنان و هەروەها هێنا پێشەوەیان بۆ ناوەندی بڕیاردانی سیاسیی و ئەرك و بەرپرسیارێتی.
سڕكردن و دەركردن لە هەمواردا
تەلار لەتیف لەو بارەیەوە رایدەگەیەنێت: "رۆڵ و پێگەی ژن پارێزراو و چەسپێندراوە و رێژەكە بۆ 25% زیادكراوە، لەوەش گرنگتر هەر كادرێكی یەكێتی لە هەر ئاستێكی لێپرسراوێتیدا بێت، ئەگەر توندوتیژی بەرامبەر بەژنان بكات، ئەوا بەپێی هەمواری پەیڕەو "سزا دەدرێت و سڕدەكرێت".
"ئاگاداركردنەوە، سەرنجراكێشان، هەڵپەساردن و دەركردن، پلە داگرتن، سڕكردنی مانگ و ساڵ و تا كۆنگرە لە هەمواركردنەوەكەدا روون و دیاریكراوە" تەلار لە تیف وا دەڵێت.
ئەندامی مەكتەب بەدانان دەبێت
هەندێك مەكتەب و ئۆرگان بەگۆێرەی هەمواری پەیڕەوەكە رێكدەخرێنەوە لەوانە (مەكتەبی ئیدارە و دارایی، رێكخراوە دیموكراتییەكان، پەیوەندییەكان، بۆردی وەرزشی و بانكی زانیاری) .
لێپرسراوی ناوەندی یاسایی دەڵێت: "مەكتەبی ئیدارەو دارایی كراوە بە بۆردی خەزنەی گشتی بۆ كۆكردنەوەی داهات و بۆردی خەرجییەكان، بۆردی وەرزشی خراوەتەسەر مەكتەبی رێكخراوە دیموكراتییەكان، مەكتەبی پەیوەندییەكانیش لە 4 بۆردەوە كراوە بە 2 بۆرد، بانكی زانیاریش خراوەتەسەر مەكتەبی رێكخستن".
"لەمەو دوا ئەندامی مەكتەب بەهەڵبژاردن نابێت و بەپێی مەرج و پسپۆریی و پێویستی و كۆمەڵێك مەرج و تایبەتمەند بەدانان دەبێت و میكانیزمی بۆ دانراوە" تەلار لە تیف وایوت.
مەڵبەند و كۆمیتەكانیش بەدانان دەبێت
بۆ رێكخستنەوەی مەڵبەند و كۆمیتەكانیش پەیڕەو میكانیزمی دیاریكردوە و سیستمی هەلێبژاردن دیاریكراوە، بەڵام ئەم سیستمە بۆ كۆنفرانسی داهاتووی یەكێتی كاری پێدەكرێت.
لێپرسراوی ناوەندی كاروباری یاسایی دەڵێت: "رێكخستنەوەی مەڵبەند و كۆمیتەكان بۆ ئەمجارە بە دانان دەبێت، بەڵام بۆ كۆنگرەی داهاتوو بەهەڵبژاردن دەبێت".
