ساڵێکی تر..

بەیان ئەحمەد


دیوارەکان پاک دەکەینەوە
دیواری تر هەڵدەچنین

تەونی جاڵجاڵۆکەیەک ژیانە
ئێمە تێکی دەدەین

ساڵێکی تر دێت
گوێ لە فەلەکناسەکان دەگرین
ئەستێرەکان سوڕانەوەیان پێچەوانە دەبێتەوە
ئەستێرەی بەختی من و تۆ دوورتر دەکەونەوە لەیەک

ژیان تەواو
زەوی بۆتە مەنزڵی ڤایرۆسەکان
تەفسیری خەونەکان
لەماڵی جەلادێکە،
جەلاد بەتامی سەرۆک

دارپرتەقاڵەکە وشک بوو
مناڵەکان لەسەر دیوار وێنەی پرتەقاڵ دەکێشن
باران دەیشواتەوە

لە شەوێکدا
تەفسیری رۆژ دەکەین
بەدیار مۆمێکەوە
هەموومان دەفتەری یادەوەریەکانمان
دەسووتێنین
یادەوەریش پەتایەکی کوشندەیە
بەسووتانیش سووتوەکەی لەسەر گوڵدانێک دەنیشێتەوە
گوڵەکان وشک دەکات

نۆتەکان دەدڕێنین
ئەو ئاوازانە لەیادەکەین
کە بەشێک بوون لە گوێگرتنی من و تۆ
ژیان شێدارە
بۆنی  کەڕووی لێدێت
هەموو وەرزێک یۆتۆبیایەک
بۆ ئینجانە دروست دەکەین
پێی دەڵێین ژیان جوانە
ئێستا زەردبوون نییە

پاوانەیەک لەقاچی ئەو منداڵەدایە
هەست دەکەم خەبەری رۆشتنی 
پێیە

نوێنەکان پڕ بوون لە زیندەوەری بچووکی
ترسناک هێرش دەبەن، ئارامی دەدزن
ناهێڵن بنووین

ژیان دەکەینە زەرفێکی نامەوە
بۆیەکتری رەوانە دەکەین
وەک ژەهر
لەمەوە بۆ ئەو دەڕوات
ژیان جوانە
بەپێی رۆژمێری ساڵی نوێ