بافڵ جەلال تاڵەبانی، سەرۆکی یەکێتیی نیشتمانیی کوردستان لە بەغدا پێشوازیکرد لە مارتین یێگەر، باڵیۆزی ئەڵمانیا لە عیراق.
لە دیدارێکدا جەخت لە پەرەپێدانی پەیوەندییەکان و فراوانکردنی هەماهەنگییەکانی نێوان هەردوولا کرایەوە بەتایبەت لە بوارە ئابووری و کەلتورییەکان و بەردەوامی هاوکارییەکان بۆ هێزی پێشمەرگەی کوردستان لە چوارچێوەی رێکخستن و یەکخستنەوەی هێزەکە.
تێپەڕاندنی ناکۆکییەکانی نێوان هەرێم و عیراق تەوەرێکیتری دیدارەکە بوو و هەردوولا هاوڕابوون چارەسەرێکی گونجاو بۆ کێشەکانق بدۆزرێتەوە بەشێوەیەک کە مافی هەموولایەک پارێزراوبێت.
سەرۆک بافڵ ئاماژەی بە بڕیارە بوێرانەکەی پەرلەمانی ئەڵمانیا کرد بۆ بەجینۆسایدناساندنی کۆمەڵکوژیی خوشک و برا ئێزیدییەکان و وتی، یەکێتیی نیشتمانیی کوردستان پێشوازی لەم بڕیارە گرنگ و بوێرانەیە دەکات و هیوادارین وڵاتانی تریش هاوشێوەی ئەڵمانیا هەنگاوی لەمشێوەیە بگرنەبەر.