سەمیر ھەورامی وتەبێژی قوباد تاڵەبانی جێگری سەرۆک وەزیرانی هەرێم رایگەیاند، سبەینێ قوباد تاڵەبانی لە چەند فەرمانگەیەکی سلێمانی سیستەمی یەکپەنجەرەیی رادەگەیەنێت.
لەبارەی سیستمەکەوە ئاماژەی بەوەکرد، یەکپەنجەرە، لەچوارچێوەی بەئەلکترۆنیکردنی کاروباری فەرمانگەکانە و بەشێکە لەپڕۆژەی خزمەت، کە بریتییە لە باشتر پێشکەشکردنی خزمەتەکان بۆ ھاووڵات و راییکردنی مامەڵەکانیان لە فەرمانگەکان بەئاسانترین شێوە و بەنەھێشتنی رۆتین و رێگرتن لە گەندەڵی.
سەمیر هەورامی ئاشکراشیکرد، قۆناغی یەکەم لە پێنج فەرمانگەی پارێزگای سلێمانی جێبەجێدەکرێت و دواتر فەرمانگەکانی تریش دەگرێتەوە، بڕیارە لە پارێزگا و ئیدارە سەربەخۆکانیتریش ئەم پڕۆژەیە جێبەجێبکرێت.
وتەبێژی قوباد تاڵەبانی راشیگەیاند، سیستەمی یەکپەنجەرە سوودەکەی ئەوەیە کە ھاووڵاتی خزمەتخواز لەڕێی یەکپەنجەرەوە مامەڵەکەی پێشکەش دەکات، دەرئەمجامەکەشی وەردەگرێتەوە، ئەوکاتە فەرمانبەرێک دەستدەکات جێبەجێکردنی ھەموو مامەڵەکە و پێویست ناکات ھاووڵاتی چەند ژوورێک بکات، بێگومان ئەمەش رۆتین ناھێڵێت و کە رۆتینیش نەما بەر بەگەندەڵی دەگیرێت.
وتیشی، ئەم هەنگاوانە ھەمووی لەچوارچێوەی پڕۆژەی خزمەتە کە ساڵی 2013 قوباد تاڵەبانی لەگەڵ پاکێجێک لە پڕۆژەی چاکسازی و بەئەلکترۆنیکردنی کاروباری حکومەت پێشکەشیکردوون و دواتر کاریان لەسەر کراوە وەک بایۆمەتری و خزمەت و تۆماری کۆمپانیاکان و یاسای کار و بەئەلکترۆنیکردنی بەشێک لە دامودەزگاکانی حکومەت.
سەرچاوە:
کوردسات نیوز
