وەزارەتی بەرگریی توركیا، لە راگەیەنراوێكدا ئەوەی خستۆتەڕوو كە «بە هاوكاریی دۆستەكانمان، ئۆپەراسیۆنی (كلیلی چنگ)مان بۆ سەر چەند ناوچەیەكی هەرێمی كوردستان دەستپێكردووە».
لە راگەیەنراوەكەی وەزارەتی بەرگریی توركیادا، هاتووە: ئۆپەراسیۆنەكەیان بە هاوكاریی دۆستەكانیان بۆ سەر ناوچەكانی مەتینا، زاب، ئاڤاشین و باسیان-ە و لە هەرێم دەستپێكردووە و وەزیری بەرگرییش خۆی راستەوخۆ سەرپەرشتی ئۆپەراسیۆنەكە دەكات.
هەروەها، دوێنێ، خلوسی ئاكار وەزیری بەرگریی توركیا، لە وتەیەكدا رایگەیاند: «ئۆپەراسیۆنەكەمان لە رێگەی هێزی ئاسمانی و وشكانییەوە دەستپێكردووە و ئەو ئامانجانەشی دیاریكرابوون بەدیهاتوون».
لە بەرامبەریشدا، هێزەكانی پاراستنی گەل (هەپەگە) راگەیەنراوێكی بڵاوكردۆتەوە و ئاماژەی بەوەكردووە كە لە روبەڕوبونەوەكانیاندا لەگەڵ سوپای توركیا، 28 سەربازیان كوشتووە و نۆ سەربازی تریش برینداربوون و دوو هێلیكۆپتەری سوپای توركیاشیان خستووەتەخوارەوە.
