هەرێم كەمال ئاغا، سەرۆكی فراكسیۆنی یەكێتی لە ئەنجومەنی نوێنەرانی عیراق بەدەنگی ئەمریكای راگەیاندووە، هیچ هەوڵێك بۆ لەتكردنی هەرێمی كوردستان لە ئارادانییە. جگە لەو دوو بڕگەیەی باسی گەڕاندنەوەی پاشەكەوت و مافی پارێزگاكان دەكات، تێبینیان لەسەر پڕۆژەیاسای بودجە هەیە.
هەرێم كەمال ئاغا ئاشكرایكردووە، كۆمەڵێك كاری نادادپەروەری وایكرد یەكێتی هەڵوێستی هەبێت، ئەوەش ناتەبایی هەرێم دەخاتە مەترسییەوە نەك شتی تر، هیچ یاسایەكیش ناتوانێت كاریگەری لەسەر پێگەی هەرێم دروست بكات. وتیشی، مەسرور بارزانی سەرۆكی حكومەتی هەرێم و قوباد تاڵەبانی جێگری سەرۆكی حكومەت پێكەوە دانیشتوون و لەیەكتر نزیكبوونەوەكان قۆناغی باشیان بڕیووە.
سەرۆكی فراكسیۆنی یەكێتی دەڵێت، ئەو بڕگەیەی لە پڕۆژە یاسای بودجە كە باس لە پێدانی شایستەی دارایی هەر پارێزگایەك دەكات لەلایەن حكومەتی عیراقەوە گەر گازندەی هەبێت، بڕگەیەكی ئاساییە و كاریگەریی نابێت. پێشی وایە ئەگەر ستەم لە دهۆك بكرێت ئەم بڕگەیە دەیگرێتەوە و دەتوانێت سكاڵا تۆمار بكات، كەواتە بڕگەكە تایبەت نییە بە سلێمانی.
وتیشی، تیبینییان لەسەر پڕۆژەیاسای بودجەی عیراق هەیە و تەنها دوو بابەت پێشنیاری ئەوان بووە، بابەتی گێڕانەوەی پاشەكەوتی موچەی فەرمانبەران و بابەتی دادپەروەری لە نێوان پارێزگاكاندا، تا گەرەنتی هەبێت پارێزگایەك هەست بە مافخوراوی نەكات.
بەوتەی هەرێم كەمال ئاغا، لە پڕۆژەیاساكەدا هەرێمی كوردستان پابەند كراوە بەفرۆشتنی 400 هەزار بەرمیل نەوت لە رۆژێكدا، لە كاتێكدا رێگریشیلێكراوە لە دەرهێنانی نەوت لە كێڵگە نەوتییەكانی خورمەڵە و شێخاندا كە پێشتر دوو سەد هەزار بەرمیل نەوتییان لە لایەن هەرێمەوە لێ دەرهێنراوە، بۆیە ئێمە تێبینیمان لەسەر ئەم مادەیە هەیە، چۆن داوای 400 هەزار بەرمیل لە نەوت بكرێت و لەولاشەوە دەرهێنانی نەوتی لە بیرە نەوتییەكانی لێ قەدەغە بكرێت، دەكرێت ئەم كێشانە چارەسەر بكرێن.
ئەوەشی خستووەتەڕوو، بەهۆی بایكۆتكردنی تیمی یەكێتی لە حكومەتەوە، تیمی پارتی گفتوگۆیان لەگەڵ عیراق كردووە و ئەوان بەرپرسیارن، بۆیە دەبێت هەوڵی هەمواركردنەوەی ئەم مادانە بدەین. سەبارەت بەو بڕگەیەی تایبەتە بە سەرپەرشتیكردنی دەروازە سنوورییەكان لە لایەن عیراقەوە، هەرێم كەمال ئاغا وتی، "فڕۆكەخانە و دەروازە سنوورییەكان بابەتی دەستوورین، بەڵام ئەو لیوا كوردانەی پۆلیسی سنوور كە سەر بە عیراقن و ناوچە سنورییەكان دەپارێزن، كوردن".
