لە مەنەلۆجەوە بۆ دیالۆگ لە بازنەی داخراوەوە بۆ بازنەی پەیوەندی لە مینبەری گشتییەوە

09:00 - 2022-11-09
ستران عەبدوڵڵا
129 خوێندراوەتەوە

ئەزموونی سیاسیی حزبایەتی لە كوردستان هەروا بووە. لەپێشدا دیالۆگ و گفتوگۆی ناوخۆیی و تێگەیشتنی هەڤاڵانە و ئینجا گەڵاڵەی بیروبۆچوونەكان بۆتە بەرنامەی كار و خەبات. بۆتە بزووتنەوە و كرداری شۆڕشگێڕی.
ئێمە نا، دێرینەكانی پێش ئێمە و هەڤاڵانی تێكۆشەری مامۆستامان باسی ئەڵقە رۆشنبیرییەكان، رێكخستنی پتەو و پۆڵایین و هێشویی دەكەن. یانی باسی ئامادەكاری بۆ تاودان دەكەن.
ئەم كارە دەروون حزبییە بۆ ئەوەی مانا پەیدا بكات و ببێتە كردەیەكی كۆمەڵایەتی لە كوردەواریدا، دوای ماوەیەك هەر دەبێ رووی لە دەرەوە بێت. رووی لە جەماوەر و خەڵك و رووی لە دروستكردنی رای گشتی بێت، چونكە ئەم خەباتە بۆ ئەوان دەكرێت. بۆنە و موناسەبەی هەبوون و نەبوونی هەر حزب و كۆمەڵێكی سیاسیی دەربەست بۆ كۆمەڵانی خەڵكە، ئەگینا خۆ حزبایەتی یانەیەكی فیكری یان ژوانی دڵداری نییە. خۆ دڵداریش بۆ ئەوەی رەوایەتی گشتی پەیدا بكات، هەر دەبێ ئیشهار پەیدا بكات. لەسەر ئەمەیە كورد وتوویەتی: بانگی محەمەد بە ئاشكرا خۆشە.
ئەسڵ لە هەموو تێكۆشانەكان خەڵكە، ئەگەرنا گفتوگۆی ناوخۆیی دەبێتە مەنەلۆج و گروپبەندییەكە لە گروپی داخراوی پاڵتاك و ماسنجەر تا ڤایبەر و وەتساپ و گردبوونەوەی كلۆپ دەبێتە (گیتۆی كەمینەكان) كە لە ترسی دەرەوە هەر لە ناوخۆدا گینگڵ دەدەن. یاخود دەبن بە تەقییە؛ ئەوەی لە رازدایە نایەتە سەر زار.
لەگەڵ گەشەی تەكنۆلۆجیا و ئامرازەكانی گروپبەندی وەك دیاردەی تەنهایی سەركزكردن بە دیار مۆبایل و بە دیار ژیانی گریمانییەوە خەریكە گروپبەندی حزبیش وای لێدێت. گروپەكان هەر روویان لە ناوخۆیە و دەنگیان هی دیالۆگ نابێت، دەبێتە سەداو دەنگدانەوە. وەك دویتی فلكلۆری ئەوەی ئەیڵێن نایڵێنەوە. بەڵام گۆرانییەكی چرپە و فسكەفسكە و نابێتە كۆنسێرت و ئاهەنگی میللی.
تێكۆشانی حزب، هەڤاڵبەندی سیاسی، دەبێ رووی لە دەرەوە بێت. رووی لە كۆمەڵ و رووی لە ئاڕاستەكردنی رای گشتی بێت. حزبایەتی لە ماڵی خۆمان، لە بارەگای خۆمان مەنەلۆجێكی ناوخۆییە، ناتوانێ سیاسەتگەلێك بۆ كۆمەڵگە دروست بكات. گروپەكان بۆ ئەوە باشن گەڵاڵەی سیاسەت دابڕێژن و هێز و وزەی مەعنەوی و مادی كۆبكەنەوە و لە پانتایی گشتیدا جاڕی لێ بدرێت، نەك هەر بە مەنەلۆجی ناوخۆیی بێ سەمەر بمێنێتەوە و یەكتری لەو شتانە ئاگادار بكرێنەوە كە هەموان دەیزانین و پێویستە دەرەوە پێی بزانێت.
رووی نموونەكان لەسەر حزبی خۆمانە، لەسەر یەكێتیی نیشتمانیی كوردستان و دیارە مادام وتارەكەش لە مینبەری گشتی بڵاودەبێتەوە، لە ئیختیاری حزبی دیكەشدایە، ئەگەر گەرەكێتی.
بیروڕا جوانەكان، ئەندێشە چاك و پاكە یەكێتییەكان هەڵقوڵاوی ئەدەبیاتی یەكێتی، ئەدەبیاتی مام جەلال و رێبازە رۆشنەكەیەتی وا دەوڵەمەندە كە هی ئەوەیە تیشك باوێ.
لەهەر كوێیەك مینبەرێك دەخرێتە بەردەستی هەڤاڵێكی یەكێتی، پێویستە بیروباوەڕی یەكێتی تیا بڵاوبكاتەوە. لە كۆڕی ناو چایخانەكانەوە كە دەگوترا یەكێتییەكان بە نۆرماڵی هەر سەرزەنشت و رەخنەی تیا دەڵێن، بەڵام هەر كاتێك هێرش بۆ سەر رێبازی یەكێتی دەكرێت ئیتر بە یەك دەستی داكۆكی لێ دەكەن تاوەكو بەرپەرچی نەیاران بدەنەوە . 
ئینجا لە بۆنەی كۆمەڵایەتییەوە بۆ كۆڕ و كۆبوونەوە گشتییەكان تا سەكۆكانی میدیا هی میدیای یەكێتی و هی سەكۆ گشتییەكانی میدیای كوردستان كە دێتە بەردەست، دەرفەتە بۆ بڵاوكردنەوەی فیكری یەكێتی، بۆ خستنەڕووی ئەندێشەی یەكێتی لە چارەسەركردنی كێشەكانی وڵاتدا . ئێ خۆ دیارە تا ماڵ هەبێ بە مزگەوت حەرامە و گەرەكە لە مینبەری میدیای ترەوە زیاتر رەوانبێژ و هەقبێژەكان داكۆكی بكەن تا قازانجی لە زەرەر زیاتر بێت.
مینبەری كۆڕ و كۆبوونەوەی گشتی، ئەو دەیان میتینگ و كۆڕە سیاسی و گشتی و رووناكبیرییانەی لە وڵاتەكەمان دەكرێت دەرفەتە بۆ ئاڕاستەكردنی رای گشتی كوردستان بە لای دیدی یەكێتییانەوە.
بەڕاستی هەڵسەنگاندنی وردی دەوێ داخۆ بۆچی بە لێكدانەوەی هەڵەی كرانەوە و سینگ فراوانییەوە بەدەم بیروبۆچوونی چەوت و ناڕاست و هەڵەوە پێبكەنین كە دەزانین چارەسەری پێ نییە و لە لێكدانەوەدا كورت دەهێنێ.
بۆچی تێكۆشەری یەكێتی بەناوی نەرمونیانی، شەرم و لەڕوودامان و گوایە سینگفراوانییەوە بوختان بەڕاستی و رەوانی قبووڵبكات و چاوپۆشی لە ژەهراوی سەدان بیروباوەڕی ناڕاست بكات و لێگەڕێ وڵاتەكەمان بەم دەرد و بەڵایانە ئالودە بێت و ئینجا بە نرخی گران لەسەر میللەتەكەمان، لەسەر پێشكەوتن و ئایندەكەی بكەوێت.
وا لەم چەند ساڵەی دواییدا دەیان ئەزموونی تاڵ و ترشمان بینی كە هاتن و چوون و بە ناوی جیاجیاوە كۆمەڵی كوردەواری و وڵاتی ئێمەیان كردە (مشكی تاقیكردنەوە) و سەرەنجام وتارەكانیان خاوەنانی قسە و شان راوەشانێنانیان هیچیان راستی نەكرد و هیچیان راستی نەفەرموو. ئێ خۆ دیارە رای گشتی وەك فەزای گشتی وایە كە بنەما فیزیاییەكەی بەسەردا جێبەجێ دەبێت ئەگەر بوار بە هەوای پاك پڕنەكرێتەوە، هەوای پیس جێی دەگرێتەوە.
جا ئیتر بۆچی یەكێتییەكان، هەڤاڵانمان لە هەموو ئاستەكاندا ئیحمێكی یەكێتییانەی لێناكەین و هیممەتی مام جەلالانەی لێنەكەینەوە؟
كاتێتی یەكێتییە بە هیممەتەكان زیاتر لە جاران و وەكو جاران، بەڵام بە دەرفەتە تازەكانی دیموكراسی و دەرگاكانی تەكنۆلۆژیای نوێوە بێنەوە سەر هێڵی دیالۆگ و داكۆكی و دەستپێشخەرییەوە.
كاتێتی قۆناغی مەنەلۆجی ناوخۆیی تێپەڕێنین و پێشبڕكێی قەڵغانسازی و داكۆكی رەوا لە بیروباوەڕ و سیاسەتی راستی یەكێتی بكەنە كاری رۆژ و سەعاتیان. پێشبڕكێ بكەن لە گیانبازی داكۆكی لە یەكێتی.
كەس لە یەكێتی باشتری ناكات و كەس لە یەكێتییەكان باشتری لێ نازانن و (دەور دەوری ئێوەیە).
وەكو هەڤاڵانیشتان لە راگەیاندن، ئێمەش خوا بمانگرێ ئەگەر مینبەرەكان ئاواڵە نەكەین و بە كردەوە ماڵ و مزگەوتی خۆمان ئاوەدان نەكەینەوە، پێش ئەوەی مینبەری تر زەنگین بكەین كە كەس مایكرۆفۆنی خۆی ناكاتە بەردەستی كەس، مەگەر هەر گۆرانی داواكراومان پێ بڵێتەوە.

وتارەکانی نوسەر