یەکبێژ

چاوتان لەسەر فڕۆکەخانەی کەرکوک بێت

09:33 - 2022-12-08
هیوا محەمەد
146 خوێندراوەتەوە

لە وڵاتێکداین لە هیچی کەم نییە، تەنها هزری زیرەک و دڵسۆز بۆ بنیاتنانی کەمە. 
لەسەروبەندی گۆڕینی کابینەیەکی حکومیدا، لەپڕێکدا دەڵێن چەند ملیار دۆلارێک دیار نەماوە، حکومەتە نوێیەکە دەست دەکات بە پشکنین بە شوێن دزەکاندا دەگەڕێت، ناوی یەک دوانێک دەڵێن کە دەستگیرکراون، سەرەنجام لە چەند ملیارێک چەند سەد ملیۆنێک دەدۆزنەوە و  دەڵێن هەوڵی جدیمان داوە، دزەکانیش لەبری سزای گەورە دەرباز دەبن.
تورکیا لە ئاسمان و زەوییەوە لێمان دەکوژێت، بەناوماندا شۆڕبۆتەوە و هەژموونی داناوە، دەروازەی گەورەی هەرێمی کۆنترۆڵکردووە، ساڵانە کۆمپانیاکانی تورکیا دەیان ملیار دۆلار قازانج دەکەن، رێکەوتنی ژێربەژێری 50 ساڵەی لەگەڵ پارتی کردووە، دەیان سەربازگە و خاڵی سەربازیی و هەواڵگریی لە بادینان داناوە، رۆژانە دەیان بارهەڵگری سەربازی تانک دەهێنێت و دەبات.
زۆرێک لە سیاسیی و رووناکبیرانی عیراقییش وێڕای ئێمە لە هەرێم، رایان وایە کە تورکیا نەک هەر لە عیراق، بەڵکو لە زۆر وڵاتی دیکەش لە هەوڵی چەسپاندنی هەژموونی خۆیدایە. بە دیوێکی تردا دەیەوێت هەژموونی ئیمپراتۆریی عوسمانی بگەڕێنێتەوە، ئێمە هەموو ئەم شتانە درک پێ دەکەین، بەڵام لێی بێدەنگین هەروەک دزەکانی قەرن بۆی دەردەچن.
بۆ تورکیا ئاسان بووە لەماوەی 30 ساڵی رابردووەوە کە چۆنی بوێت بێتە ناو خاکی هەرێمەوە لە چوارچێوەی عیراقی فیدراڵیدا، بەڵام لەوە ئاسانتر و خێراتر ئەو پردە ئاسمانییەیە کە فڕۆکەخانەی کەرکوکە و یەکەم گەشتی بۆ ئەنقەرە بوو، ئەمەش مانای خۆی هەیە.
رەنگە ئەو هێزە ئەمنییەی کە ئەرکی پاراستنی فڕۆکەخانەکەیان لە ئەستۆدایە، هەموویان جێی متمانە نەبن کە لەوێدا بڵاوبوونەتەوە، هەر لە پاککەرەوە  و کارگوزارەوە تا دەگاتە بەڕێوەبەری بەش و پلەداری تر، چونکە کەرکوک لەڕووی ئیقلیمییەوە ناوچەیەکی هەستیارە.
مەترسیی ئەوە هەیە کەسانی ئاژاوەچی دزە بکەنە ناویانەوە و خوانەکردە کەلوپەلی نایاسایی وەکو چەک و پێداویستیی لۆجستی لەو فڕۆکەخانەیەوە ئاڵووێر بکرێت، بەمەبەستی کاری تێکدەری.
میدیاکانی ئۆپۆزسیۆنی تورکیا لە سەرەتای سەرهەڵدانی داعشدا چەند بەڵگەیەکیان خستەڕوو سەبارەت بە هاوکاریی و چاوپۆشیی خاڵە سنوورییەکانی تورکیا لە دزەکردنی چەکدارانی داعش، بۆیە زۆربەمان رامان وابوو کە تورکیا هاوکاریی ئەو چەکدارانە دەکات بۆ دزەکردنە ناو عیراق و سوریاوە، ئێستاش ناهەقمان نییە کە گومانی ئەوەمان هەبێت کە لە رێگەی ئەم فڕۆکەخانەیەوە کاری نایاسایی رووبدات، ئەگەر بێت و ئەمنییەتی فڕۆکەخانەکە غافڵ بکرێت.
کەرکوک بەهۆی ئەوەی هێشتا ناسنامەکەی ساغ نەکراوەتەوە بەیاسا، هێشتا ئەمنییەتی لەژێر مەترسیدایە، ئەوەش دەبێتە مەترسیی بۆسەر هەرێم و عیراقیش و سەرەوەریی خاکی عیراق زیاتر دەکەوێتە مەترسییەوە، ئێمەش سەرقاڵی کێشەکانمانین لە ناوخۆی هەرێم و لەگەڵ بەغدا، کە مەترسییەکەش هەموانی گرتەوە دەبێت بە سەرسووڕمانەوە بۆ یەک بڕوانین، ئەوەش لە غیابی نەبوونی هەڵوێستێکی یەکگرتووی عیراقیدا سەبارەت بە پێشێلکردنی سەروەرییەکەی و پەیوەندییەکانی لەگەڵ درواسێکانیدا بۆیە پێویستە وریابین.

وتارەکانی نوسەر