سیستمی یەك پەنجەرە، ئامانجێكی گەورە

11:05 - 2023-03-16
مەریوان عەبدوڵڵا
313 خوێندراوەتەوە

سیستمی كلاسیكیی مامەڵەی كاغەزی، نزیكەی چارەكە سەدەیەكە لە زۆرینەی وڵاتانی پێشکەوتووی جیهان، نەماوە و بۆتە بەشێك لە مێژووی پڕۆسەی بەڕێوەبردن و كارگێڕی بۆ قۆناغی پێش گەشەسەندنی تەكنۆلۆژیا و سیستمی دیجیتاڵی.
بۆ ئەو سەردەمانەی پێشوو مامەڵەی کاغەز و مۆرکردن، تاكە ئامڕاز و رێگە بووە بۆ راییكردنی كاروباری رۆژانە و ئاڵوگۆڕ و پەیوەندییە دیپلۆماسییەكان.
هەرچەندە بۆ جیهانی  پێشكەوتوو و گەشەسەندووی ئەمڕۆی بواری تەكنۆلۆژیا، سیستمی دیجیتاڵی یان ئەلیكترۆنی كارێكی نوێ نییە، بەڵام بۆ هەرێمی كوردستان هەنگاوێكی نوێ و جێی بایەخە. 
لەم رۆژانەدا جارێكی دیكە سیستمی «یەك پەنجەرەیی» بە ئەلیكترۆنیكردنی كاروباری فەرمانگەكان، چەند هەنگاوێكی دیكەی ناوە و وا دەردەكەوێت زۆر نەبات لە ساڵانی ئایندەدا هەرێم ببێتە خاوەنی سیستمێكی پێشكەوتووی دیجیتاڵی، كە ئەمە تاڕادەیەكی زۆر گرنگیی هەیە بۆ كارئاسانی رایكردنی مامەڵەی هاووڵاتییان و نەهێشتنی بەشێک لە بەهەدەردان و رۆتین کە هەیە.
هێنانەکایەی سیستمی یەك پەنجەرە بیرۆكە و هەوڵی بێوچانی جێگری سەرۆكی حكومەتی هەرێم قوباد تاڵەبانی بوو، دوای ماندووبوونی زۆر و كۆڵنەدان توانی پڕۆژەكە بخاتە سەرپێ. ساڵانێكی زۆرە فەرمانگە و دامەزراوەكانی هەرێم رووبەڕووی گرفتی گەورە بوونەتەوە و ئاستەنگی گەورە لەبەردەم مامەڵە و ئیشوكاری رۆژانەی خەڵكدا دروستبووە، ئەمە جگەلەوەی هەزاران دەرگای بە رووی گەندەڵی و رۆتین و كاری ناڕەوا و بەرتیلدا كردۆتەوە. 
لەگەڵ بەکارخستنی ئەم پڕۆژەیە لە هەموو دامودەزگاکانی هەرێم، هاووڵاتییان دەتوانن لە ماوەیەكی كەمدا و بەبێ ئەم ژوور و ئەو ژوورکردن و تەکلیف و پاڕانەوەیەک مامەڵەكانیان تەواوبکەن.

 

كاتی ئەوە هاتووە سیستمی یەک پەنجەرە لەسەرتاسەری هەرێمی كوردستان جێبەجێبكرێت و ئەركی حكومەتی هەرێمە بەرپرسیارێتی بخاتە ئەستۆی خۆی و بودجەی پێویستی بۆ دابینبكات

 

بەدڵنیاییەوە دوای ئەمە دۆخەكە جیاواز دەبێت لەو فەرمانگانەی كە سیستمەکەیان تێدا جێبەجێدەکرێت.
هەنگاوەكانی جێبەجێكردنی لە چەند فەرمانگەیەكی كەم لە پارێزگای سلێمانی چۆتە بواری جێبەجێكردنەوە و سەركەوتنی بەدەستهێناوە.
كاتی ئەوە هاتووە سیستمی یەک پەنجەرە لەسەرتاسەری هەرێمی كوردستان جێبەجێبكرێت و ئەركی حكومەتی هەرێمە بەرپرسیارێتی بخاتە ئەستۆی خۆی و بودجەی پێویستی بۆ دابینبكات و بیكاتە یەكێك لە پێشینەی كارەكانی داهاتووی.
ئەوەی روونە سیستمی یەك پەنجەرە تێڕوانینێكی فراوانی لە پشتەوەیە كە ئەویش ئەوەیە هەرێمی كوردستان ببێتە خاوەنی سیستمێكی ئەلیكترۆنی پێشكەوتوو.
ئەگەر بە دیدێکی بنیاتنەرانە كار لەسەر ئەم پڕۆژەیە بكرێت، ئەوا ئەنجامی باشی دەبێت و رەنگە زۆر نەبات هەرێمی كوردستان لە چەند ساڵی نزیكی داهاتوودا بە یەكجاری ماڵئاوایی لە سیستمی كۆنی كاغەزی بكات.
ئەگەر ئەمە كرا گومانی تێدا نییە شانازییە گەورەكە بەر قوباد تاڵەبانی دەكەوێت، چونكە ئەو تەنیا لێپرسراوی باڵایە كە بەكردەیی هەنگاوی بۆ پڕۆژەكە ناوە و لە بیرۆكەوە كردییە راستییەكی بەرجەستەكراو. 

وتارەکانی نوسەر