ته‌مه‌نی هه‌ر مرۆڤێك سه‌ره‌تایه‌كی بێ ده‌ستكه‌وتی هه‌یه، ئه‌گه‌رچی خودی ته‌مه‌ن ده‌ستكه‌وتێكی مه‌زنی ژیانه، به‌ڵام ژیان ده‌ستكه‌وتی زیاتری ده‌وێت، هیچ مرۆڤێك توانای به‌رده‌وامیدانی ژیانی نییه به‌بێ به‌ده‌ستهێنانی ده‌ستكه‌وت به ژیان و پاراستنی ده‌ستكه‌وته به‌دیهاتووه‌كان، هه‌ر وه‌ستانێك له‌به‌ده‌ستهێنانی ده‌ستكه‌وت به‌واتای كۆتایی هاتنی ته‌مه‌ن و بێ سوودبوونت به‌ئاسۆی ژیانه‌وه، ژیان مه‌یدانی كێبڕكێیه، بێ سووده‌كان دۆڕاون و ئه‌وانه‌ش ناتوانن پارێزگاری له‌وه بكه‌ن كه به‌ده‌ستیان هێناوه خه‌ساره‌تمه‌ندن.
له‌گه‌ڵ هه‌ڵكشانی ته‌مه‌ندا پێویستیه‌كانی ژیانیش زیاتر ده‌بن و ته‌مه‌ن قورستر ده‌كه‌ن، به‌هه‌وڵ و كۆششی نه‌بڕاوه ده‌ستكه‌وته‌كان به‌ده‌ست دێن، ئه‌گه‌رچی ئه‌سته‌م و گران بێت به‌ڵام پاراستنیان قورستره، زۆر كه‌من ئه‌و مرۆڤانه‌ی توانای پاراستنی ئه‌و ده‌ستكه‌وتانه‌یان هه‌یه كه به‌ده‌ستیان هێناوه، چ ده‌ستكه‌وتی ماددی بێت یان مه‌عنه‌وی.
به‌ده‌ست هێنانی ده‌ستكه‌وت، خولیا و ئاوات، گه‌یشتن به ئامانجه‌كان، داهێنان و به‌رهه‌مهێنانی مه‌زن و به‌سوود، هه‌وڵدان بۆ به‌ده‌ستهێنانی نه‌مریی دوای مردن، پێویستیه‌كی گرنگه و نیشانه‌ی به‌توانایی و كارامه‌یی كه‌سه‌كانه، به‌ڵام به‌رده‌وام بوون له‌سه‌ر مانه‌وه و پاراستنی ئه‌م ده‌ستكه‌وتانه، هێز و توانای مرۆڤ، زیره‌كی و بلیمه‌تی ده‌رده‌خات و سه‌لمێنه‌ری كه‌سایه‌تییه.
ته‌مه‌نی بێ ده‌ستكه‌وت نه‌بوونی باشتره، ئه‌وانه‌ی له‌ژیان ده‌ستكه‌وتیان نییه هه‌میشه گله‌یی له‌چاره‌نووس ده‌كه‌ن، بێ ئاگا له‌وه‌ی چاره‌نووس هه‌ر به‌و هه‌وڵ و كۆششانه به‌دی دێت كه له‌ژیان ده‌یده‌ن، چاره‌نووسی باش قۆستنه‌وه‌ی ده‌رفه‌ته‌كانه، نه‌ك له‌ده‌ست دانی ده‌رفه‌ت، درووستكردنی ده‌رفه‌ته نه‌ك دۆشدامان به‌دیار ئه‌و دۆخه نه‌خوازراوه‌ی تێیداین، راسته درووستكردنی ده‌رفه‌ت و قۆستنه‌وه‌ی هه‌له‌كان گرنگه، به‌ڵام گرنگتر له‌ده‌ست نه‌دانی ده‌رفه‌ت و پاراستنی هه‌له‌كانه له‌به‌رژه‌وه‌ندی خۆت، به‌واتایه‌كی تر، پاراستنی ده‌رفه‌ته‌كانی ژیان گرنگتره له‌خوودی ده‌رفه‌ته‌كه، چونكه ژیان ده‌رفه‌تی زۆرت پێده‌به‌خشێت، به‌ڵام كه‌من ئه‌و ده‌رفه‌تانه‌ی ده‌قۆزرێنه‌وه.
مه‌زنه‌كان ئه‌وانه‌ن به هێز و تواناوه به‌ره‌نگار ده‌بنه‌وه و ده‌سته‌ودامانی قه‌ده‌ر نین، لای ئه‌وان هه‌موو دۆخێك ده‌رفه‌تێكی گونجاوه بۆ قۆستنه‌وه و سه‌ركه‌وتن، به‌ڵام مه‌زنترن ئه‌وانه‌ی ده‌توانن پارێزگاری له‌وه‌بكه‌ن كه به‌ده‌ستیان هێناوه و ده‌ست كه‌وته‌كان له‌ده‌ست ناده‌ن.
