هەردوو ویستی خێر و شەڕ لە مرۆڤێکەوە بۆ مرۆڤێکی دیکە جیاوازن، خێزان، خوێندنگە، کۆمەڵگە و لە سەرووی ئەوانەشەوە سیاسەتی دەوڵەت دەتوانن ویستی خێر و شەڕ لە مرۆڤدا بگۆڕن، رەنگە ئەوە وابکات کۆمەڵگەی شەڕخواز و ئاشتیخوازیش دروستبن و ئیتر ژیان تیایاندا ئاڕاستەی جیاواز وەربگرێت و کاریگەری لەسەر کۆمەڵگەکانی دیکەش هەبێت.
لە مێژوودا زۆرینەی کات کۆمەڵگەی داگیرکراو ناچار بەکاردانەوەی تووند دەکرێت، دەسەڵاتی داگیرکەر دەرفەت دەڕەخسێنێ بۆ روودانی و دواتریش دەیکاتە هۆکارێک بۆ سەرکوتکاریی زیاتر، لەو رێگەیەوە دەیەوێت شەرعیەت بداتە تووندوتیژییەکانی خۆی بۆ ئەوەی بەردەوام بێت لە پڕۆسە ناشەرعییەکانی.
کۆمەڵگەی کوردی بەردەوام ئەو سیاسەتەی لەسەر تاقیکراوەتەوە، بەتایبەت لە عیراقدا لە ساڵی 1921ەوە بەزۆر خۆی کردووەتە خاوەن کۆمەڵگەی کوردی و چەندین جۆر سیاسەتی دڵڕەقانەی لەسەر تاقیکردووەتەوە، هەمیشە شۆڕشەکانی کوردیشی بەبیانووی کردنی تووندوتیژییەوە سەرکوت کردووە، دەیان نموونەی زیندوو هەن لەو رووەوە.
داگیرکردنەوەی زەوی جووتیارانی کورد لە سنووری کەرکوک بەبیانوی جۆراوجۆر لە سەرویانەوە دروستکردنی سەربازگە، شەرعیەتدانە بە داگیرکاریی سەردەمی رژێمی بەعسی روخاو، بەڵام عەقڵیەتێک هەر ئامادەیی هەیە کە کوردی قبوڵ نییە، زەوییەکەی دەبات و ناسنامەکەی دەگۆڕێت، دەسەڵاتیش راستەوخۆ و ناڕاستەوخۆ پشتیوانی دەکات، کاتێک کورد دەیەوێت بەرگری بکات، ئەوا بە ئاژاوەچی و تێکدەر ناوی دەبات، یاساکانیش دەخاتە خزمەتی پڕۆسەی داگیرکارییەوە، بەکارهێنانی زەبروزەنگیش دەکاتە کارێکی ئاسایی.
داگیرکردنی زەوی جووتیارە کوردەکان لە تۆپزاوا بە رۆژی رووناک، بەشێکە لە پڕۆسەی ئەبدەیتکردنەوەی ویستی شەڕخوازی عەرەبە هاوردەکان، ئەوانەی سەدام حسێن هاوردەی سەر خاکی کوردی کردن و ئێستایش بوونە بەڵای سەر ژیان و مانەوەی کورد، سوپای عیراقیش هاوکاریانە لە زیندوکردنەوەی ئەو ویستە شەڕخوازانەیە.
بەرەنگاری کورد بەشێک نییە لە ویستی شەڕخوازی، بەڵکو قۆناغی بەرگری رەوایە لە بوون، شوناس و مانەوە لەسەر خاکی خۆی، ئەوەی کورد دەیکات بەرهەمهێنانەوەی تووندوتیژی نییە، بەڵکو رێگرییە لەوانەی دەیانەوێت لە رێگەی تووندوتیژییەوە کورد بێدەنگ بکەن، ئایا رێگەیەکی دیکە هەیە کورد لێیەوە درێژە بەمانەوەی خۆی بدات؟
ئێستا کە عیراقێک هەیە و کورد لە بەرزترین ئاستەکاندا لە پڕۆسە حوکمڕانییەکەیدا بەشدارە، کەچی هێشتا مەترسییەکانی سەری گەورە دەبن، یاسا و سوپا و هێزی سیاسی لە پەرلەمانەکەیەوە ویستی شەڕخوازانەیان بەرامبەر کورد زیاتر دەکەن، رەنگە بەلایانەوە بوونی کوردی ئازادیخواز و نەترس، مەترسی بێت بۆ پڕۆژە سەرکوتکارییەکەیان، ئاوا بڕوات بۆشیان دەچێتە سەر.
جووتیارانی تۆپزاوا، نموونەی بەرەنگاری نوێی کوردن لەگەڵ عەقڵیەتێکی شۆڤێنی ئەبدەیتکراو کە دوور دەڕوانێ بۆ ماڵ و حاڵی کورد، دەیەوێت جوگرافیای نیشتمانی کوردستان بچووک بکاتەوە، بوون و مانەوەی کورد لەقاڵب بدات.
دەورەدانی کورد لە هەموو لاکانەوە، سیاسەتی نوێی دوژمنەکانێتی، دوژمنی ئاشکرا و دوژمن لە بەرگی خۆپیشاندەردا، هەردوو جۆرەکەیان مەترسی گەورەن لەسەر کورد و شوناس و خاک و زمانەکەی، بە قورسی رێگەی لێ نەگیرێ، کوردستان تەواو بچووک دەکرێتەوە.
