زۆرێك لە ئێمە لە ململانێیەكی ناوەكی درێژخایەندا دەژین، ئەم ململانێیە رەنگدانەوەی لەسەر دنیابینی و پێناسەمان دەبێت بۆ خۆمان و ئەوانەی لە دەورمان دەژین، بگرە زۆرێك لەو ململانێیانەی لە كۆمەڵگەدا رووبەڕووی دەبینەوە، یان لەگەڵیدا دەژین، لە بنەڕەتدا پشت بەو ململانێ ناوەكییە دەبەستێت كە لەنێو خودی خۆماندا مەڵاسمان داوە.
ئاشتبوونەوە لەگەڵ خوددا ئەو وشەیەیە كە دەبێ هەموومان پەی پێ ببەین و بیكەینە هۆكاری ژیانێكی باشتر و بنیادنانی پردی پەیوەندی لەگەڵ خۆمان و ئەوانی تردا.
كەواتە پرسیارە گرنگەكە لێرەدا ئەوەیە چۆن بتوانم لەگەڵ خۆمدا ئاشتبم؟
سەرەتا دەبێت سوپاسگوزاریی و رازیبوون لەخۆد بكەینە خویەكی رۆژانە، كە مەبەست لێی قبووڵكردن و رازیبوونە لە هەردوو شێوەی دەرەكی و ناوەكی خوددا بە هەموو كەموكووڕییەكانییەوە، بەڵام هەرگیز مەبەستمان ئەوە نییە كە مرۆڤ بیر لە گۆڕانكاری لە خوددا نەكاتەوە و بڕیاری كۆنترۆڵكردنی خاڵە لاوازەكانی نەدات و تا كۆتایی لەگەڵ كەموكووڕییەكاندا بژی، هەرچەندە زۆرن ئەوانەی بەردەوام لە خۆیان ناڕازین و لە هەوڵی ئەوەدان بگەنە پلەی كەماڵ.
لە راستیدا هەنگاوەكان بۆ گەیشتن بە پلەی كەماڵ پێوەر و كۆتاییەكی دیاریكراوی نییە و هەرگیز مرۆڤ ناگاتە پلەی رەزامەندیی تەواو بەرامبەر خوی، كەواتە رێگە راستەكە ئەوەیە بڕوا بەخۆت بهێنیت و تێبگەیت كەماڵبوون پلەیەكی مەحاڵە. بەمجۆرە هێدی هێدی لەگەڵ خۆتدا دەگەیتە پلەی ئاشتەوایی.
خاڵێكیتر بۆ گەیشتن بە ئاشتبوونەوە لەگەڵ خوددا، پێویستە مرۆڤ لەگەڵ خۆیدا راستگۆبێت، واتە مەرج نییە كەموكورتییەكانی بۆ خەڵك باسبكرێت، بەڵام لانیكەم خۆ دەتوانێت لەگەڵ خۆیدا دان بە هەڵەكانی خۆیدا بنێت، واتا نابێ بڵێت من لە هیچ ناترسم و بشترسێت، من پەشیمان نیم و پەشیمانیش بێت، بە پێچەوانەوە دەبێت لەگەڵ خۆیدا راستگۆبێت، بەوەی لە چی دەترسێت و لە چی پەشیمانە، بەمجۆرە دەتوانێت لەگەڵ خۆیدا ئاشت بێت.
ئێستا با باسی دەنگی ناوەكی بكەم، ئەو دەنگە ناوەكییەی هەموومان لە ناخەوە دەدوێنێت، لە راستیدا دەروونناسان دەڵێن ئەو دەنگە وزە لە ژیریی ناوەكی (العقل الباطن) وەردەگرێت، زۆرجار ئەم دەنگە لە ناخی ئەو تاكەی كە لەگەڵ خۆیدا ئاشت نییە، شەڕانگێزە و تاك بەرەو هەڵدێر دەبات و هێندە رەخنەی لێدەگرێت، تا وایلێدەكات خۆشیی لە سەركەوتنەكانی نابینێت.
جا بۆئەوەی مرۆڤ لەگەڵ خۆیدا ئاشتبێت، پێویستە كۆنترۆڵی ئەو دەنگە ناوەكییە بكات و رووبەڕووی ببێتەوە. بەو هۆیەشەوە ململانێ لەگەڵ خوددا هەرگیز كۆتایی نایەت.
باشترە كاربكەین بۆ گۆڕینی دەنگە شەڕانگێزە نەرێنییە ناوەكییەكان، بۆ هێزێكی ئاشتیخوازی ئەرێنی، بە جۆرێك هاندانی زیاترمان بداتێ و بمانكاتە كەسایەتییەکی پۆزەتیف لە ژیاندا، بەڵام چۆن؟ هەڵبەتە ئەمەش بە گۆڕینی ئەو دەستەواژە خراپانەی كە لە عەقڵی ناوەكیدا جێگیربوون بۆ دەستەواژەی باش و ئەرێنی.
لە جیهانداو بەتایبەتی لە كۆمەڵگە خۆرئاواییەكاندا، زۆرن ئەو كەسانەی لەگەڵ خۆیاندا لە ململانێدان و پڕن لە رستە و دەستەواژەی خراپ و نەرێنی و لەسەر بچووكترین رق، بڕیاری توندوتیژی تا كۆتاییهێنان بە ژیانی خۆیان یان ركابەرەكانیان دەدەن.
بەداخەوە ئێستا بە جیاوازیی كلتورەكان ئەم پەتایە رووی لە كۆمەڵگەی كوردیش كردووە، بۆ نموونە لە دۆسێی بەناو شتنەوەی شەرەفدا، ئەو دەنگەی لە ناخەوە فەتوا بە نێرینەكان دەدات و رشتنی خوێنی مێینەكان حەڵاڵ دەكات، هەمووی بەهۆی ئەو دەستەواژە نابووت و نەشیاوانەوەیە كە رۆژانە لە شوێنە گشتییەكاندا بەر مێشكی نێرینەكان دەكەوێت و لە ژیریی ناوەكییدا جێگیر دەبن و سەرەنجام تاواتی گەورەیان لێ دەكەوێتەوە.
بەشێوەیەكی گشتی دەكرێت بووترێت زۆربەی ململانێ و كێبركێ حزبی و حكومی، عەشیرەت و ناوچەیی، دراوسێیەتی و هاوڕێیەتی و خێزانی، لەم سۆنگەیەوە سەرچاوەی گرتووە.
کەوایە با هەوڵ بدەین دەستەواژە نەرێنییەكان لە ژیریی ناوەكیماندا وەدەرنێین و لە جێگەیاندا ئەو دەستەواژانە بچێنین كە بەرەو ئاشتبوونەوە لەگەڵ خوددا دەمانبات.
