ئەو تەوژمەی ئێستا وا لە کەرکوک کوچە و کۆڵانەکانی شارەکەی گرتۆتەوە: هەمووی مەشغوڵی سیاسەت و هەڵبژاردن، یەکێتی و هاوپەیمانی، وەرگرتنەوەی دەسەڵات و مانەوەی دەسەڵاتی خۆسەپێن، کردووە، تەوژمێکی زیاترە لە تای هەڵبژاردن و کاردانەوەی ململانێی لیستەکان. ئەمە شتێکە لە بابەت بوژانەوەی بزووتنەوەی سیاسی و کاردانەوەی قووڵی کەرکوکییەکان پاش شەش ساڵ لە سەبری شۆڕشگێڕی و دانبەخۆداگرتن.
ئەم بۆنەی هەڵبژاردنە بۆتە بیانووی ئەپدەیتکردەوەی سیاسەت و کوردایەتی و خاوەندارێتی لە مەسەلەی کەرکوک، گەنجەکان، کچان و کوڕان لەم تابلۆیەدا رەنگی زاڵن و دیمەنەکەیان رەونەقدارتر کردووە. رەنگە هەبن بڵێن جا خۆ ساڵی پێشتر هەڵبژاردنی تر لە کەرکوک کرا (هەڵبژاردنی ئەنجومەنی نوێنەران لە پایزی 2021) و هیچی نوێی تیا نەبوو، بەڵام خەڵک بە سەلیقە دەزانن ئەمەی ئەنجومەنی پارێزگای کەرکوک پەیوەستە بە دیزاینکردنەوەی ئیدارەی شارەکە و پێدانەوەی کەسێتی سیاسی و مەعنەوییە بە کەرکوک، پەیوەستە بە سەنتەرکردنی سیاسەت لە هەستیارترین شاری کوردستان و عیراق لە وەختێکدا هەم سیاسەتی بەغدا بۆ کۆی عیراق درز و کەلێنی تێدایە و هەم سیاسەتی کوردستانیش لە ناوخۆدا پڕ گرفتە. لە ئیدارە و حکومڕانییەوە تا ژیان و گوزەرانی خەڵکەکەمان، بۆیە جوڵەی بە تەوژمی کەرکوک وەک گەڕان وایە بەدوای گۆڕەپانی نوێی کارکردن کە سییەکانی سیاسەت لە کوردستان و عیراق پاک بکاتەوە و چانسێکی تر بداتەوە بە هەموان، ئەمما بە ستایلێکی نوێوە.
لەبەر ئەمەیە دەتوانین جوانترین بەرجەستەی عیراقە بچووکەکە و کوردستانە گەنجەکە لە پێگەیشتنی پردی خاسەی کەرکوک و گرێدانەوەی جەمسەرەکان ببینینەوە.
روویداوە لە مێژووی هاوچەرخی عیراقدا بزووتنەوەی چەپ، دەورانێکی تر بزووتنەوەی شۆڕشگێڕی کوردستان، یان ماوەیەکی کەم بزووتنەوەی بەهاری عەرەبی و دوایی بزووتنەوەی دیموکراتی عیراق و تشرینییەکانی، دەبوونە ناوکی سیاستێکی چڕوخەست. یانی ئەوەی بە زمانی گیڤارییەکانەوە دەوترا (بوئرەی شۆڕشگێڕی)، پێدەچێت کەرکوکی دەمی هەڵبژاردنی پارێزگاکان لە بەرزەخێکی وادا بژی. ببێتە پردێکی پتەو، یان ترافیکێکی چالاکی هامشۆی سیاسەت و دەرهاویشتەکانی.
راستە دیمەنی جەمسەرگیرییەکە وەک جەمسەرگیری نەتەوەیی و مەزهەبی دەردەکەوێت، بەڵام راستییەکەی ئەمە بابەتە رووکەشەکەیە و لە ناوەڕۆکدا ستایلە سیاسییە جیاوازەکان، کە خۆیان لە جەمسەرە نەتەوەییەکانەوە پێچاوە، لە قەرەباڵغی ململانێدا خەریکن شوێن بۆ خۆیان دەکەنەوە. ئێمە باسی بەشەکەی کورد دەکەین کە وەسفی مام جەلالی بەسەردا جێبەجێ دەبێت: ئەژدیهاکە، یان قومقومەکە، لە ملی شووشەکە هاتۆتە دەرەوە و تازە بە پاڵەپەستۆش ناچێتە ناوەوە.
لەو کاتەی پەیام و پێدراوەکانی لە هەرێمی کوردستانەوە دێن کاڵ بوونەتەوە و لەو کاتەی بەغداش لەبەر سەرقاڵی بە ململانێکانی جەمسەرەکانی پایتەخت چیتر ناتوانێت کەرکوک وەک باخچەی ئەمن و ئومانی عیراقی نیشان بدات، رەنگە ئێستا دەرفەتێکی زێڕین بێت کە کەرکوک خۆی سیاسەتێکی تەوەر کەرکوکیانە کەڵەکە بکات و چەقی شارەکە ببێتە داینەمۆی چانسی تاقینەکراوەی توخم و پێکهاتەکان بەرەو دەوڵەمەندکردنی ئەزموونی هەرێم و بەغدا و پێدانی چانسێکی نوێ کە متبوون و پێکوتەی ئێستا تێپەڕێنێت.
بۆ نا؟ شار هەموو شتێکی تیا دەقەومێت و کەرکوکیش شارە و لە سەد ساڵی رابردوودا قسەی هەبوو.
زۆر زەحمەتە ئەم دۆخە گەشاوەیە هەر لە تەداروکاتی ویستی خزمەتگوزاری و ئەرکی ئاوەدانی یاخود لە ویستە نەتەوەییەکەدا قەتیس بکرێت. بۆ کەرکوک و لە کەرکوک هەردووکیان پێکەوەن.
