با دەرچەی دەربازبوون بە کراوەیی بمێنێتەوە

11:18 - 2024-01-08
هەستیار مارف ئاغا
188 خوێندراوەتەوە

ستراتیژی شەڕکردن گرنگە بە هەند وەربگیرێت، نەوەک تەنها رق و کینە بەتاڵبکرێتەوە و بۆ مەرامێکی کاتی دوژمنایەتییەکی کۆن تازەبکرێتەوە، چونکە رەنگە بە هۆی هەڵەیەکەوە گەورەترین شەڕ بەرپابێت کە رەنگە راگرتن و وەستانەوەی زۆر ئەستەم بێت.
 ترسناکترین ئاکام لە شەڕدا ئەوەیە هیچ پلانێک بۆ بابەتی شوێنی شەڕ، گیانی هاووڵاتی مەدەنی، جیۆپۆلەتیک و جوگرافیای ناوچەکە و مەیدانی شەڕ، نەخرێتەڕوو. 
دەبێت ئەگەرەکانی هێرشی زەمینی، ئاسمانی، دەریایی لێکبدرێتەوە و هیچ ئەگەر و زانیاری و پێشهات و مەترسییەک، پشتگوێ نەخرێت.
بۆ لێکدانەوەی دەرەنجامەکان و درێژەپێدان بە شەڕ، دەبێت لایەنە کاریگەرەکانی وەک میدیا و زانیاری، ئامێر و کەل و پەلی شەڕ و هێزی یەدەگ، پەیوەندییە دەرەکییەکان، دەستکەوت و سەرکەوتن و پاڵپشت و پشتیوانی مادی و مۆراڵی ناوخۆیی و دەرەکی، بە هەند وەربگیرێن.
پاش دەستپێکردن و قوربانیدان و چەندین دەستکەوتی گەورە، بەداخەوە شۆڕشی کورد، بە پلانێکی نێودەوڵەتی مەترسیدار، لە ساڵی 1975 دا دووچاری هەرەس بوو.
لە دوای کۆتایی هاتنی شەڕی هەشت ساڵەی نێوان عیراق- ئێران، لە دوای شاڵاوی ئەنفال و کیمیاباران و کاولکردنی زۆربەی گوندەکانی کوردستان، رژێمی دیکتاتۆریی عیراق توانی زۆربەی ناوچە ئازادکراوەکان داگیربکاتەوە و دەنگی شۆڕش و بەرخۆدان بۆ ماوەیەک کپبکاتەوە.
خۆرهەڵاتی ناوەڕاست، ناوچەیەکی نا ئارام و هەمیشە پڕ لە کێشە و بابەتی چارەسەرنەکراو و هەڵپەسێراوە، چونکە سەرەڕای کێشەی فەلەستین، میللەتی کوردیش خاکی داگیرکراوە و وڵاتەکەی دابەشکراوە.
هەر کاتێک کورد لە جێیەکی کوردستاندا داوای مافی خۆی و داوای سەربەخۆیی و ئازادیی بکات، دەیان هێز و وڵات لێی راستدەبنەوە و بەلادەر و جوداییخواز لە قەڵەمی دەدەن. 
ئەو هێزە پۆپۆلیستە داگیرکەرانە هەمیشە هەوڵدەدەن کورد تێکبشکێنن و قەوارەکەی بخەنەوە بندەستی خۆیانەوە، هاوپەیمانان و وڵاتە زلهێزەکانیش زیاتر دوای بەرژەوەندیی و ئەجێندای خۆیان دەکەون و هەر سەردەمە بە شێوازێک مامەڵە دەکەن و دەدوێن.
دەبێت میللەتی کورد کەڵک لە رووداوەکان وەربگرێت و تەنها میللەت و خەڵکەکەی خۆی بە دڵسۆز بزانێت و لە ناوخۆدا تەبا بێت، پێویستە بڕیار بەدەست و سەرکردەکانی کورد، زۆر بە وریایی هەنگاوبنێن و نەبنە لایەنگری هیچ هێز و لایەنێکی دەرەکی.
دەبێت سەرکردەکانی کورد خوێندنەوەی زیرەکانەیان بۆ رووداوەکان هەبێت چ لە کوردستان و ناوخۆی عیراقدا یاخود لە ئاستی ئیقلیمی و نێودەوڵەتیدا، چونکە میللەتی کورد زۆر  جیاوازە لە لایەنە شیعە و لایەنە سوننەکان و تەنانەت لەو وڵاتە خاوەن پێگە و هەژموندارانەش کە لە عیراقدا کاریگەریان هەیە.
لەبەرئەوەی دۆزی رەوای نەتەوەی کورد، تایبەتمەندیی خۆی هەیە و چەندین ساڵە خەبات دەکات و قوربانیی گەورەی داوە و رێز لە پێگە و بوون و قەوارەی دەگیرێت، لەبەرئەوەی زۆربەی زۆری وڵاتان و هەموو لایەنەکانی عیراق بارودۆخی کورد و داواکارییەکانی دەزانن و لە دەستووری عیراقدا مافەکانی دانیپیادانراوە و هەرێم شێوەیەک لە سەربەخۆیی خۆی هەیە، بۆیە سەبارەت  بە جووڵە و هەڵسوکەوت و حکومڕانی و سیاسەتکردنی لایەنە کوردییەکان چ لە ئاستی هەرێم یاخود لە عیراقدا، دەبێت بەرپرسیارانە بێت و هەمیشە دەرچەیەک یان دەروازەیەک بۆ دەربازبوون بە کراوەیی بهێڵنەوە، نەوەک قەتیسببن و لە کێشە و گەندەڵی و گیروگرفتی خەڵکانی ترەوە بگلێن و سەرەنجام گۆڕانکاری و دەستوەردانی گەورە رووبدات و ئەوەشی هەیە لەدەست بچێت.

وتارەکانی نوسەر