ئەمساڵ وا رێکەوت، ساڵوەگەڕی بەیاننامەی 11ی ئازاری 1970 بکەوێتە یەکەم رۆژی مانگی رەمەزانی پیرۆزەوە، هەردوو بۆنەکە لەسەر ئاستی نەتەوەیی و ئایینی پەیوەندییەکی زۆر و راستەوخۆیان بە ژیانی کوردستانیانەوە هەیە. دەکرێ وەکو رۆژی نوێبوونەوە و هەڵوەستەکردن و بەخۆداچوونەوە سەیریان بکەین، زیاتر لەوەی رووداوی ئایینی و نەتەوەیی ئاسایی بن و هەر بیرهێنانەوەیەکی پێویست بێت.
بەیاننامەی 11ی ئازار بۆ کورد وەکو نەتەوە دەستکەوتێکی گرنگە، داننانی راستەوخۆ بوو بە راستیی خەباتی بزووتنەوەی رزگاریخوازیی و نەتەوەیی کورددا، یەکەمجار بوو عیراق بەو شێوەیە مامەڵەی راستەوخۆ و گفتوگۆ لەئاستی بەرزدا لەگەڵ نوێنەرانی شۆڕشی کورددا بکات، دەرەنجام بەشێکی زۆری مافە نەتەوەیی و کەلتورییەکانی کورد دانی پێدانرا.
54 ساڵ دوای ئەو رێکەوتننامەیە کە تەمەنێکی کورتی هەبوو و ئەنجامەکەی نسکۆی شۆڕشی ئەیلولی بەدوادا هات، ئێستا هەرێمی کوردستان لەبەردەم کۆمەڵێک گۆڕانکاریی گەورەدایە، ئاماژەکانی ئەوە دەرکەوتوون، مەترسیی زۆر گەورە هەن، لەسەر ئاستی گوتاری سیاسیی کوردستانیش نەسازان و دوورگری لەیەکتر هێندەی دیکە مەترسییەکانی گەورە کردووە.
هێزی سیاسیی دەربەستدار خاوەن بەرنامەی کاری نزیک و دوورە، خۆگونجێنە لەگەڵ ئەو گۆڕانکارییانەی روودەدەن، ئەمە جگە لەوەی پشتبەستن بە ئەزموون و خوێندنەوە واقیعییەکان ئامادەساز دەبێت بۆ هەر ئەگەرێک کە ئاماژەکانی روودانی دەربکەون.
لە مێژووی سیاسیی دوور و نزیکدا هەر رێککەوتنێکی سیاسی وەکو ئەوەی لەنیوان دوو هێزی سیاسیی یان زیاتر کرابن، یان ئەوەی بووبێتە پەیمانی سیاسی و کۆمەڵایەتیی نێوان خەڵک و دەنگیان بۆ دابێت، وەکو خۆی جێبەجی نەکراون.
جێبەجێکردنی رێکەوتن هێزی پێویستە، هەمیشە بێهێزەکان لەو رێکەوتنانەدا مافیان دەخورێ، خۆ ئەگەر لەسەر ئاستی نێودەوڵەتیش بێ پشتیوان بن، ئەوا باری سەرشانیان قورستر دەبێت.
زۆر ئاماژە هەن وایانکردووە هەست بەوە بکرێت هەرێمی کوردستان پێگەکەی لاواز بووە و بەمەترسیی گەورە دەورەدراوە، ئەوە سەرەتایەکە بەرەو گەمارۆدانی زیاتری، گوشارەکانی هەرێمایەتیش زیاتر دەبن و بوونی هێزەکانی پارچەکانی دیکە کراونەتە بیانوو بۆ دەستوەردان و سنووربەزاندن، ئەوەش بۆ ناوبانگی سیاسیی کوردستان زیانی گەورەی هەیە.
چۆن عیراق پابەندییەکانی بەرامبەر هەرێمی کوردستان جێبەجی نەکردووە، بەهەمان شێوە حکومەتی هەرێمی کوردستانیش بەشی زۆری پابەندییەکانی بەرامبەر هەرێمی کوردستان جێبەجێ نەکردووە، راستە بەشێکی بیانووەکە ئەوەیە کە عیراق هۆکارەکەیەتی، بەڵام ئەوە تەواوی راستییەکە نییە و دەرفەتی داوە کە هاووڵاتییانی کوردستان متمانەیان بە دەسەڵاتی خۆماڵی زۆر لاوازبێت.
لەگەڵ هەموو ئەو هۆکار، گوشار، مەترسی و نەسازانەی هەیە، بۆنەی نەتەوەیی مانگی ئازار و هاتنەوەی مانگی رەمەزان، زۆرینەی گوتار و بەیاننامەی سەرکردەکانی پڕکردووە لە داوای تەبایی و یەکڕیزیی لەپێناو بوونی کوردستانێکی درەوشاوە، ئەوە دەرفەتێکی باشە بۆ بەدەستهێنانەوەی متمانەی خەڵک و باشکردنی بارودۆخیان، کەمکردنەوەی گوشارەکان لەسەر کوردستان لە رێگەی گرتنەبەری سیاسەتێکی کوردستانی، خوێندنەوەی واقیعیانەی مەترسییەکان و سازان لەسەر دوورکەوتنەوە لە لوتبەرزیی سیاسی کە سەرەکیترین هۆکارە بۆ بردنی کوردستان بەرەو تونێلە تاریکەکە و گەورەکردنی مەترسییەکان لەسەری.
