هەناسە

نهێنی بەهێزکردنی زەین

10:22 - 2024-03-27
مەحمود شێرزاد
148 خوێندراوەتەوە

زەینی ئێمە لە چوار رەهەند پێکهاتووە، هەست (خودئاگا) یادگە (نیوەئاگا) نەست (ناخودئاگا) هیچ (سەرووئاگا). سێ رەهەندی یەکەم جەستەیین و مرۆیین، خۆمان دروستییان دەکەین، بەڵام رەهەندی چوارەم، واتە رەهەندی هیچ (سەرووئاگا) گەردوونیی و خواییە، خۆی لە خۆیدا هەیە. هیچ بە مانای ئەو بۆشاییە هۆشمەند و بەهێزەیە کە سەرچاوەی هەموو شتێکە، ئێمە لەوەوە هاتووین و هەر بۆ ئەویش دەگەڕێینەوە و هەمیشەش پێوەی وەسڵین، بەڵام لەبەر ئەسیربوونمان لە سێ رەهەندە جەستەیی و دنیاییەکەدا ئاگامان لەو نییە و ونمان کردووە، سێ رەهەندە فیزیکییەکە لە دینەوە تا دنیا دەگرێتەوە، بەڵام رەهەندی چوارەم پەیوەندی بە هەقیقەت و پەیوەندی بە نەمریی و ئاگایی و شادی ئەزەلی و ئەبەدیی ئێمەوە هەیە، خۆناسیی پەتی و ئازاد سەر بەو رەهەندەیانە.
کەواتە زەین بەسەر دوو رەهەندی کاتی و هەتاهەتاییدا دابەش دەبێ. بەشە کاتییەکە لە ژێر دەسەڵاتی خۆماندایە، بەڵام بەشە هەتاهەتاییەکە لەژێر دەسەڵاتی خۆیدایە، ئێمە بەس دەتوانین لێی بەئاگا بین، ئێستا لێی بێ ئاگایین. سێ رەهەندە جەستەییەکە یەک لە یەک گرینگترن، کەرەستەیەکی زۆر سەرسوڕهێنەرن بەدەست ئێمەوە لە ژیانی جەستەیی و دنیاییدا، ئەگەر بزانین چۆن کار دەکەن و بە دروستی بەکاریان بێنین دەبنە هۆی بەختەوەرییمان، بەڵام ئەگەر نەزانین چۆن کار دەکەن و بە نادروستی بەکاریان بێنین دەبنە هۆی بەدبەختییمان، وەکو ئێستا، ئەو هەمووە کارەسات و شەڕ و زوڵم و زۆر و نادادپەروەرییە، هەمووی بە هۆی خراپ بەکارهێنانی سێ رەهەندە کاتییەکەی زەین و نەناسینی رەهەندی هەتاهەتایی زەینەوەیە هەن، یانی خۆنەناسیی پەتی و ئازاد سەرچاوەی بیر و قسە و کردارە خراپەکانە! 
ئێمە بە تێڕامانی ئازاد (مێدیتەیشن) بە رەهەندی هەتاهەتاییەوە وەسڵ دەبینەوە، یۆگییەکان بەمە دەڵێن سامادی (رووناکبوونەوە – ئیشراق). هەرکەس بیەوێ خۆی بناسێ دەبێ تێڕامانی ئازاد بکا.
چۆن وا بکەین سێ رەهەندی هەست و یادگە و نەستمان بەهێز بن و هاوکات لەخزمەت هەقیقەتی ئێمەدابن نەک بە پێچەوانەوە؟ لە رووی خۆراکەوە دەبێ کەمخۆر و خاوێنخۆر بین، ئەو خۆراکانەی بۆ مێشک باشن بریتیین لە سپیناخ، فاسۆلیای رەش، برۆکۆلی، بلوبێری، چەوەندەر، تەماتەی گێلاسی، زەنجەفیل و چوکلێتی تاڵ. هەروەها ئەو خۆراکانەی خراپن بریتیین لە فاست فوود (خۆراکە خێراکان) خۆراکی ناو قووتو، گۆشتی ئاژەڵی گەورە، زۆر خواردنی سوورەوەکراو، شەکری سپی، زۆرخواردنی ماست و دۆ و مزرەمەنی و سەرجەم ئەو خۆراکانەی میزاجیان ساردە و...هتد.
 لە بواری خواردنەوەدا ئاوی پاک لەهەموو خواردنەوەیەک باشترە، خواردنەوەی قاوە و چای رەش و خواردنەوەکحولییەکان بە تایبەت ئەگەر زێدەڕۆییان تێدا بکرێ زۆر خراپن، هەروەها جگەرە و نێرگەلە و...هتد.
جگە لە خۆراک و خواردنەوە، خەوی پێش سەعات یازدەی شەو و هەستانی پێش خۆرهەڵاتن، رۆژووی شازدە سەعاتی کە تەنیا ئاو بخۆیتەوە، خوێندنەوەی کتێب، راهێنانەکانی یۆگا و بە تایبەتی راهێنانی شێوەی کورسی (squat) پیاسە و چوونە ناوسروشتەوە، گەرمکردنی سەر و شێلانی سەر، شەربەتی هەنگوین و لیمۆی تازە، سێوی زەرد، مێوژ، زەنجەفیلی تەڕ کە لە هەنگویندا خووسا بێ، زۆر زۆر باشن بۆ مێشک.
ئەوانەی لەسەرەوە ئاماژەمان پێدان بۆ لایەنی جەستەیی مێشک و زەین زۆر باشن، بەڵام ئەگەر بتەوێ لایەنی ژیریی و ئاگاییت گەشە پێبدەی، جگە لە رەچاوکردنی ئەم خاڵانەی سەرەوە، دەبێ تێڕامان و یۆگا بکەی، بخوێنیتەوە، لە شتەکان تێبگەی و زەین و ئەقڵت هەمیشە کراوە بێ، ئاگایانە لە دینەوە تا دنیا لەهەموو روویەکەوە کراوە بی، واتە زەینییەت و عەقڵییەتێکی داخراوت لە هیچ بوارێکدا نەبێ. هەرگیز دەرگای درک و تێگەیشتنت دامەخە.   

وتارەکانی نوسەر