كۆتایی گەشتەكەم

02:23 - 2024-05-16
شیرین. ک
208 خوێندراوەتەوە

بە سەد گۆشە و هەر گۆشەیەك لەنێوان 250 بۆ 260 وشە، باسی نزیكەی(80) نووسەر و زیاتر لە(115)كتێبم بۆ كردن، هەوڵمدا بە كەمترین وشە زۆرترین زانیاریتان پێبدەم، خۆ ئەگەر پانتایی گۆشەكە گەورەتر بووایە دەمتوانی زانیاری زیاتر باسبكەم، بەڵام لەبەرئەوەی زۆربەی خوێنەری گۆشەكە لە سۆسیال میدیا دەیبینن و دەیخوێننەوە، بابەتی درێژیش بۆ سۆسیال میدیا گونجاو نییە، خوێنەری ئەم سەردەمەش تاقەتی بابەتی درێژی نییە، منیش وەكو نووسەرێك مەبەستمە گۆشەكەم بخوێنرێتەوە.
بێگومان زۆر زیاتر لەو ژمارەیە كتێبم خوێندۆتەوە، بەڵام ناتوانم باسی هەموو ئەو كتێبانە بكەم كە خوێندوومنەتەوە، ئەو دەفتەرانە یارمەتیدەرم بوون بۆ باسكردنی بەشێك لەو كتێبانە، بەهۆی ئەو دەفتەرانەوە كتێبەكانم بیردەكەوتنەوە، بەڵام كتێبیش زۆرە لەو دەفتەرانەدا بەیەك وشەش باسم نەكردوون و هیچ كۆمێنێتێكم لەبارەیانەوە نەبووە، كتێب هەیە لەكاتی خۆیدا زۆر بەلامەوە گرنگ بووە بەڵام ئێستا وای نابینم و بە پێویستی نازانم باسی بكەم، بێگومان جگە لەرۆمان  و كۆمەڵە چیرۆك، زۆرم كتێبی توێژینەوەی ئەدەبی، مێژوویی، دەروونناسی، كۆمەڵناسی، فەلسەفە هەروەها توێژینەوە لەبارەی دۆزی ژنان و ئاین و ئەفسانە و گەلێكی تر خوێندۆتەوە، بەڵام زۆر كەم شیعرم خوێندۆتەوە، لەگۆشەیەكی وا بچووكدا ناتوانم ئەو جۆرە كتێبانە هەقی خۆیان بدەمێ، بۆیە زۆركەم لەبارەی ئەو بابەتانەوە دواوم، بەباشترم زانیوە لەبارەی رۆمانەوە زیاتر قسە بكەم كە رەنگە بەلای زۆربەی خوێنەرانەوە سەرنجڕاكێش تر بێت.
رەنگە خوێنەری بەردەوامی گۆشەكەم تێبینی ئەوەی كردبێت نووسەری وا هەیە زیاتر لەجارێك  و باسی زیاتر لەكێبێكیم كردووە، ئەوەش لە سەرسامبوونەوەیە بە بەرهەمەكانی ئەو نووسەرە، لەوانە ئیزابێل ئەلەندنی، ماركیز، ئەمین مەعلووف، جومانە حەداد، ساراماگۆ، ساباتۆ، عەلی بەدر، دۆبۆڤوار وهتد..
ئێستا خەریكی خوێندنەوەی كتێبێكم بەناوی (دوایین شەمەندەفەر لە هێرۆشیماوە.. رزگاربووەكان ئاوڕ بۆدواوە دەدەنەوە) 447 لاپەڕەیە، نووسینی چارلز بلگرینۆ.. ئەگەر بەیەك گەیشتینەوە بۆتان باسدەكەم.

وتارەکانی نوسەر