بڕیاری پارێزگاری نوێی کەرکوک بەوەی دەبێت لەماوەی تەنها دوو هەفتەدا، شاری کەرکوک بەتەواوی خاوێن بکرێتەوە و وەکو ماڵەکانیان پاك بن، لەڕاستیدا بڕیارێکی تەواو چاکە و حەقە هەموو لایەک هاوکاریی بکەن، بەوپێیەی ژینگە بۆ ژیانی مرۆڤ و ستانداردی شایستەیی ژیان گرنگە و بەشێکیشە لە دوورکەوتنەوە لە نەخۆشی و ناخۆشی و هۆکارێکی باشە بۆ تەندروستبوون.
لەماوەی دەسەڵاتی حەوت ساڵەی رابردوودا لەسەر دەستی پارێزگاری بەوەکالەت، کەرکوک لەڕووی پاکوخاوێنییەوە تەواو فەرامۆشکرابوو، هەرکەس بە کوچە و کۆڵان یان شەقامێکی کەرکوکدا بڕۆیشتایە بەئاشکرا کۆبوونەوەی خۆڵ و خاشاک و پاشەڕۆی زیانبەخشی دەبینی، ئەو چونکە عەرەبی هاوردە بوو، نە دڵی بە شار دەسووتا نە بە خەڵکەکەی، بگرە هەر خەریکی پیلانگێڕی و رەخساندنی دەرفەت بوو بۆ تەعریبی نوێ، بڕیار لەدوای بڕیار بۆ تێکدانی پێکەوەژیان و سەقامگیریی شار دەریدەکرد و هەرچی دژی کورد بوایە ئەو دەیخستە بواری جێبەجێکردنەوە، بۆیە کەرکوکی دەوڵەمەند بە نەوت و کانزا سروشتییەکان و بەو هەموو خەڵکە باشەوە، رۆژ لەدوای رۆژ رووبەڕووی مەترسیی دەبووە ئیتر بە خەڵک و خاک و ژینگەکەیەوە.
جگە لە پاککردنەوەی ژینگەکەی، پێویستە کەرکوک لە بیرکردنەوە و سیاسەتی دوژمنکارانە پاکبکرێتەوە و بەکرداریش ئەوەی بۆ بسەلمێنرێ کەرکوکی برایەتی، ژینگە و سیاسەتی پیسی ناوێت
ئەحمەد عومەر، سەرۆکی شارەوانیی کەرکوک دەڵێت «رۆژانە لە کەرکوک 1200 تۆن زبڵ و خاشاک هەیە، لەو بڕە هەزار تۆنیان لێ کۆدەکرێتەوە، 200 تۆنیش دەمێنێتەوە.
ئەو داتایە تەواو مەترسییدارە، بیهێنە بەرچاوی خۆت رۆژانە 200 تۆن خاشاک لە شوێنی جیاواز جیاوازی شاردا فڕێ بدرێت، بزانە مانگانە و ساڵانە دەکاتە چەند هەزار تۆن و دەبێت چی کاریگەرییەکی نەرێنی لەسەر ژینگەی شارەکە هەبێ؟
ئیدارەی پێشووی کەرکوک هەر بەمەبەست ویستوویانە شارەکە پیس بکەن و خەڵکەکەی تووشی دەیان کێشەی تەندروستی و نەخۆشی ببن.
ئەوان هەر بیریان لای پەراوێزخستنی کورد بوو، سەرەنجام ژینگەی شارەکەیان پیس کرد.
ئێستاش جگە لە پاککردنەوەی ژینگەکەی، پێویستە کەرکوک لە بیرکردنەوە و سیاسەتی دوژمنکارانە پاکبکرێتەوە و بەکرداریش ئەوەی بۆ بسەلمێنرێ کەرکوکی برایەتی، ژینگە و سیاسەتی پیسی ناوێت، بەڵکو ژینگەی پاک و تەندروست و حوکمڕانیی بێ فرتوفێڵی دەوێت کە مرۆڤ و ژیانیانی لا گرنگ بێت و هەوڵی تەواو بۆ خوشگوزەرانییان بدات.
