د. یوسف گۆران
سەرژمێریی گشتیى دانیشتوانى ئەمساڵ ڕەنگە دوای سەرژمێری ساڵى (1957) گرنگترین سەرژمێری بێت لە مێژووی عیراق و هەرێمى کوردستان لەبەر چەندین هۆکار لە گرنگترینیان:
1- دوای ئازادکردنی عیراق و نەمانی دیکتاتۆرییەت و تەعریبی فەرمی گرنگە ئاماری وڵات بۆ مەبەستی گەشەسەندنی بەردەوام بەکار بێنین.
2- لە دەستووری عیراق لە ساڵی (2005) سەرژمێری لە ناوچە کوردستانییەکانی دەرەوەی هەرێمى کوردستان پێویستە دوای ئاساییکردنەوەو گێڕانەوی پێکهاتە جیاوازەکان بۆ زێدی باو و باپیرانی خۆیان ئەنجام بدرێت، ئەم پرۆسەیە دوای (19) ساڵ لە دەرچونى دەستوورى عیراق هێشتا کارێکی کەمی لەسەر کراوەو تەواو نەبووە.
3- بەپێچەوانەوە ئەوەی لە دەستووردا هاتوە لە ئێستا خەڵکانێکی زۆر لە پارێزگا جیاجیاکان نیشتەجێی کەرکوک کراون، لەوەش ترسناکتر لە دواهەمین هەمواری یاسای هەڵبژاردندا مانەوەی بەشێک زۆری ئەم هاوردە نوێیانە بەیاسایی کراون و مەترسی لەسەر خەڵکی رەسەنی شارەکەی دروستکردوە.
4- ئەو یاسایە بەحەزی کورد بێت یان نا گۆڕانکاری لە دیموگرافیای دەنگدەری خەڵکی رەسەنی کەرکوک و ئاسەوارە خراپەکانی لە هەڵبژاردنەکاندا بەدی دەکرێت.
5- پێکهاتەی کورد و تورکمان لە دۆخێکی هەستیاردان، پێویستە هەموو کوردە رەسەنەکانی کەرکوک بۆ سەرژمێری بگەڕێنەوە کەرکوک و ناوچە دابڕاوەکانی تر تاکو لەوە زیاتر باڵانسی دیموگرافی لەو ناوچانە تێک نەچێت و هەوڵی جیدیش لە ئایندە بۆ چارەسەری کێشەی ناوچە دابڕاوەکان بدرێت.
خەباتی ئەمجارەمان خەباتی مەدەنی و کۆمەڵگاییە، بۆ ئاسودەکردنی ویژدانی مێژوویمانە بەرامبەر بە شەهیدەکانمان و گۆڕ و یادەوەریی باب و باپیرانمان.
