سۆزان حەمەتاتە
چۆن دەبێت هەسەدە نەمێنێت و کۆتایی پێبهێنرێت، لە هەمانکاتدا رێگەدەدەن لەگەڵ ئۆجەلان لە زیندانی ئیمراڵی کۆبوونەوە بکرێت
دوو فاقییەکی سەیر لە سیاسەتی تورکیادا هەیە سەبارەت بە کورد و پارتی کرێکارانی کوردستان)، بەتایبەتی دوای ئەوەی هەیئەی تەحریر شام رژێمەکەی بەشار ئەسەدی رووخاند، ئیتر لەو کاتەوە بارودۆخی سوریا و کورد چووە قۆناغێکی نوێوە، تورکیا وەکو ئەوەی سوریا خاکی ئەو بێت و رزگارکەری راستەوخۆی گەلانی سوریاش بێت، کەوتۆتە جموجوڵی سەربازی و هانی هێزە ئۆپۆزسیۆنەکانیش دەدات بۆ ئەوەی هێرش بکەنە سەر ناوچە کوردییەکان و بە روونیش داوای کۆتایی هێزەکانی سوریای دیموکرات دەکات و پێیوایە ئەوانە لقی سوریای قەندیلن. لەلایەکی ترەوە، لەسەر ئاستی باڵا دەوڵەت باخچەلی، سەرۆکی مەهەپە لە بارەی ئەگەری کۆبوونەوەی شاندی دەم پارتی و عەبدوڵڵا ئۆجەلان، سەرۆکی پەکەکە، دەڵێت: کۆبوونەوەیان ئێمە خۆشحاڵ دەکات، پێموایە بڕیارەکان بۆ هەموو ئەوانەی لە تورکیادا دەژین، دەبنە مایەی خێر، ئەوە دوو فاقییەکی روونە لە سیاسەتی تورکیا بەرامبەر کورد و پەکەکە، ئەگینا چۆن دەبێت هەسەدە نەمێنێت و کۆتایی پێبهێنرێت، لە هەمانکاتدا رێگەدەدەن لەگەڵ ئۆجەلان لە زیندانی ئیمراڵی کۆبوونەوە بکرێت و داوای لێبکەن رۆڵی لە چارەسەرکردنی دۆزی کورد هەبێت.
خۆ لای تورکیا روونە، پەکەکە لەهەر حزبێکی دیکە خاوەن سیاسەتێکی یەکگرتووترە، ئیتر بۆچی تورکیا بەو شێوەیە دەیەوێت مامەڵەیان لەگەڵ بکات، یان رێگەدان بە دیداری ئۆجەلانیش بۆ مەبەستێکی تری تورکیایە و هیچ سوودی بۆ کورد نییە و نابێت؟
ئەگەر لەو جۆرە سیاسەتکردنەی ئەنقەرە وردببیتەوە، ئەوا دەگەیتە ئەو ئەنجامەی بارودۆخی وڵاتەکەی باش نییە و دەیەوێت پەکەکە بکاتە هۆکارێک بۆ داگیرکاریی زیاتر و دەستکەوتنی بەشە کێکی زیاتر لە قۆناغی دوای رووخاندنی رژێمەکەی بەشار ئەسەد، ئەو هێشتا چاوی لەسەر گەڕاندنەوەی ئەو خاکانەیە کە بەهۆی رووخاندنی دەوڵەتی عوسمانییەوە لەدەستیان چووە، خۆ بە ئاشکرا و لە دەیان گوتار و بۆنەی جیاوازدا ئەوەی وتووە، رەنگە ئێستا بە دەرفەت بزانێ و هەموو رێگەیەک بگرێتەبەر بۆ ئەوەی ویستی خۆی پێ تێر بکات.
بۆ رێگرتن لەو جۆرە سیاسەتە، یەکگرتوویی کورد لە هەموو شت گرنگترە، ئەوە وادەکات کوردستان پارێزراو و ویستەکانی ئەردۆغانیش بەدی نەیەت، ئەوە ئەرکێکی نەتەوەیی و مێژوویی گرنگە.
