وەك نەتەوەی كورد یادەوەریمان زۆرە، بەشی زۆریان تاڵ و كەمێكیشیان شیرینن، جاروباریش یادمان بەسەردا زاڵدەكەن و دەیسەپێنن، رەنگە بتوانین ناوی لێبنێین یاد و یادەوەریی ناچاریی!.
لە شەشی كانوونی دووەمی ساڵی (1921ز)دا سوپای عیراق لەسەر دەستی كۆمەڵێك ئەفسەری ئازادیخواز و نیشتمانیی پلەبەرزی ئەو سەردەمە، كە زۆربەیان كورد بوون و بە دەستپێشخەریی جەعفەر عەسكەری، كە كوردێكی خەڵكی كەركوك بوو، دروستبوو. لەوساوە، لە سەردەمی پاشایەتییەوە تا ئەمڕۆ، هەموو ساڵێك لە (6)ی كانوونی دووەمدا لە سەرتاسەری عیراقدا، سەرەڕای جیاوازیی لە سیستم و شێوازی حوكمڕانی، ئەو یادە هەر دەكرێتەوە.
مێژووی ئەم سوپایە پڕە لە رووداوی تاڵ و شیرین، بەداخەوە ئەم سوپایە بەشداربووە لە بەشێك لە شەڕە جۆراوجۆرەكانی ناو عیراق و ناوچەكەش، ئەمە وێڕای كودەتا یەك لەدوای یەكەكانی ناوخۆی عیراق، هەروەها سەركوتكردنی شۆڕشەكانی كوردستانی باشوور. ئەم سوپایە نەبوو بە سوپایەكی نیشتمانی بۆ هەموو پێكهاتەكانی ناو عیراق، بەداخەوە بوو بە ئامرازێكی كوشندە بە دەست رژێمەكانەوە بۆ سەركوتكردنی خەڵكی عیراق.
بۆ ئێمەی كورد، رەنگە زۆرجار بەهۆی ئەو زوڵمە مێژووییەی لەسەرمان بووە، نازانم بۆ ئەم یادە چی بڵێم؟ بە بۆنەیەكی نیشتمانیی رەوای بزانین و شایی و خۆشیی بۆ ساز بكەین، یان رەشپۆش بین و شیوەنی بۆ بكەین و بە هاتنی؛ خەمی رۆژانی ستەمكاریی دامانبگرێت؟!.
بە كورتی و كرمانجی، ئاسان نییە ئەم یادە وەكو بۆنەیەكی شانازیی نیشتمانیی تەواو سەیری بكەین، هەر وەك چۆن ئاسانیش نییە بەتەنها لە روانگەی دڕندایەتیی رژێمەكان و پڕۆسەی جینۆساید و ئەنفال و كیمیاباران و سووتاندنی دێهاتەكانمان لە رۆڵی ئەم سوپایە بڕوانین و وەزیفەكەی تێكەڵ بە رەفتاری شۆڤێنیستانەی دەسەڵاتدارانی عیراق بكەین، كە لە دژی كۆمەڵانی خەڵكی كوردستان بەدرێژایی مێژوو هەتا رووخانی بەعس ئەنجامیانداوە!.
لێرەدا رەوایە پرسیارێك لە خۆمان بكەین، بۆچی رۆژێكمان بۆ یادی پێشمەرگە نییە؟! لەكاتێكدا پێشمەرگە سیمبولی شۆڕش و تێكۆشان و ئازادیمانە؟ ئایا ئەمەش هەر تاوانی دوژمن و داگیركەرانی كوردستانە، یان خەمساردیی و بێباكیی خۆمان و بەرئەنجامی ناكۆكییە ناوخۆییەكانی خۆمانە!؟.
لە كوردستاندا كەس نییە رۆڵی پێشمەرگە وەك فریادڕەس بۆ داكۆكی لە مافی رەوای گەلی كوردستان و وەكو بازووی بەرگریی كوردستان بەرامبەر دوژمنانی؛ نەزانێت، ئاخر هەر ئەوانن چرای رووناكی سەنگەری مقاوەمەت و هێزی بەرگریی گەلیش بوون لە رۆژگارە تاریك و سەختەكانی كوردستاندا. پێشمەرگە مێژوویەكی دوورودرێژ و پڕ سەروەریی هەیە لە خەبات و تێكۆشان. لەپێناوی مافی رەوای خەڵكی كوردستاندا هەزاران هەزار رۆحی بێگەردی بەختكردووە و رووبارێك خوێنی داوە و هەزارانیشی كەمئەندام بوون. كەواتە چ رەوای حەقە ئێستاش هێزی پێشمەرگەی كوردستان لەڕووی مووچە و ژیان و گوزەرانەوە، لە ژیانی كولەمەرگی و مەمرە و مەژیدا بێت؟!.
لێرەدا وێڕای رێزی تەواومان بۆ ئەو هەموو رۆژ و یادە هەمەچەشنانەی لەم رۆژگارانەدا و لە هەرێمی كوردستاندا بۆ چینوتوێژە جیاوازەكان دانراون، كەچی پێشمەرگە سیمبولی ئازادی و خەباتی پیرۆزی گەلی كوردستان، رۆژێكی نییە بۆ یادەوەریی لە فیداكاریی و تێكۆشان و قوربانییە زۆر و زەوەندەكانی؟!.
ئایا بەڕاستی رەوای حەق نییە، دوای زیاتر لە (30) ساڵ لە دروستبوونی قەوارە هەرێم و بوونی دەزگای سەرۆكایەتییەكانی هەرێم و دامەزراوەكانی دیكەی دەسەڵاتدارێتیمان، وەكو وەفا و پێزانین، رۆژێك بۆ پێشمەرگە دابنێین!؟ ئایا ئەركی ئەخلاقی و نیشتمانیی هەموو لایەنە سیاسی و رێكخراوەیی و كۆمەڵگەی شارستانیی سەر گۆرەپانی كوردستان بە گشتی و سەرۆكایەتییەكانی هەرێم بەتایبەتی نییە، كە ئەم ئاواتە بهێننەدی؟.
گرنگە زووبەزوو لەگەڵ دەستبەكاربوون و چالاكبوونی خولی شەشەمی پەرلەمانی كوردستان، دەستپێشخەریی بكرێت بۆ بەدیهێنانی ئەم ئەركە نیشتمانییە، بەمەش ئەم خولەی پەرلەمان دەبێتە خاوەنی سەروەرییەكی مێژوویی لە كاری یاسادانان لە كوردستاندا و رۆحی سەرجەم شەهیدان و دڵی پێشمەرگەی قارەمانیش شاد دەكات.
بێگومان ئومێدشمان وایە، ئەم كارە ببێتە زەمینەخۆشكەر بۆ یەكبوونی هێزی پێشمەرگەی كوردستان كە ئاواتی هەموو خەڵكی كوردستان و زامنی پاراستنی قەوارەی هەرێم و كۆڵەكەیەكی بنەڕەتییە بۆ سەركەوتنیش بەسەر پیلانی دوژمناندا.
