مەسعودی مەلا هەمزە
ساڵێك تێپەڕی بەسەر كۆچی دوایی خارە حەمید، كە بەداخەوە بەرووداوی هاتووچۆ گیانی لەدەستدا. ئەمڕۆ هەموومان، خزم و كەس، دۆست و هاوڕێ، هەڤاڵ و كەسوكارەكانی لەسەر گۆڕەكەی دەبین و وەفا بۆ خاری خۆمان دەنوێنین، راستە ساڵێكە جێی هێشتووین، بەڵام خارە حەمید لەدری هەموومانە.
هونەرمەند و میدیاکار حەمید سابیر، سەرەڕای كارەكانی وەك هونەرمەند و میدیاکار، تا ئێستاش هەمووان بە سەعیدی كوڕی خدر لۆبیافرۆش دەیناسن، سەرباری ئەمە پیاوێكی قسەخۆش و دەم بە خەندە، هەمیشە لە خزمەتی هەموواندا بوو.
ئەو، یەكێك بوو لە كاراكتەرە سەرەكی و دڵسۆزەكانی راگەیاندنی یەكێتیی لە شاری هەولێر، شەو و رۆژی نەدەزانی و لەهەر شوێنێك كار و ئەرك هەبووایە ئەو لەوێ بوو، پەیوەندییە كۆمەڵایەتییەكانی فراوان بوون و لە هەموو جێگایەك دۆست و هاوڕێ و خزمی هەبوو، هەرگیز لە ئیشكردن نەدەوەستا و نەیدەزانی بەهیچ جۆرێك كەمتەرخەمی بكات.
كە كۆچی دوایی كرد و پرسەكەیمان بینی، هەموومان تێگەیشتین خارە حەمید بە تەنها بۆ راگەیاندنی یەكێتیی لە هەولێر نەبووە، بەڵكو دۆستی هەمووان بووە، تەنانەت كاسبكار و خەڵكی ناوبازاڕە میللییەكانیش بۆی بەداخ بوون و بەشدارییان لە پرسەكەی كرد، لەمەوە تێگەیشتین خارە حەمید خەمخۆر و دڵسۆزی هەمووان بوو بۆیە هەموو بۆی بەداخ بوون.
بەهیوام شێوازی ژیان و خەمخۆری و دڵسۆزی خارە حەمید بۆ ئیش و كارەكەی، بۆ خەڵك و هاوڕێكانی، بۆ كەسوكار، ببێتە دیاردە و هەموومان چاوی لێ بكەین.
