مەسعودی مەلا هەمزە
كابرای وەزیر ئومێدەوارە ئیشەكانی بە باشی بڕوات و مووچە بێت تا دابەشی بكات، جەنابی پارێزگار ئومێدەوارە بارانی بەرەحمەت ببارێ و لافاو دروست نەبێت، والی شار ئومێدەوارە كێشەی كەمئاوی و بێ كارەبایی چارەسەر بكرێت، جەنابی پارێزگار ئومێدەوارە پاڵاوگەكان دانەخات و هاووڵاتیانیش تەندروستیان باش بێ و كەس تووشی شێرپەنجە نەبێ، ئومێدەواریشە خوای گەورە ژینگەی شارەكە بپارێزێت.
هاووڵاتی ئومێدەوارە زستانێكی بێ كێشە بەڕێ بكات و حكومەت بەرمیلێك نەوتی بداتێ، مووچەخۆر ئومێدەوارە زوو مووچەكەی بێت و وەریبگرێت. دوكاندار ئومێدەوارە قەرزەكانی زوو وەربگرێتەوە، شوفێری تاكسی ئومێدەوارە بەنزین هەرزان بكرێت و زۆر لە سەرەی بەنزینخانە نەوەستێ! خەڵكی هەولێر ئومێدەوارن كەلتور و رەسەنایەتیی شارەكەیان و دابونەریتە جوانەكان بپارێزرێن و دوو زۆنییەكەی هەولێر چیتر تۆخ نەكرێتەوە.
هەولێرییەكانی گەڕەكە هەژارنشیینەكان ئومێدەوارن چیتر زۆنی زێڕینی شارەكە فەرزنەكرێت بەسەریاندا و ئاوڕێك لەوانیش بدرێتەوە. حزبەكان ئومێدەوان زوو حكومەت پێكبێت و كێشەكان چارەسەر بكرێن، حكومەت ئومێدەوارە بەغدا زوو بە زوو پارە بنێرێت. سەیرە، هەمووی ئومێدەوارەو وەك ئەوەی ئەم وڵاتە ئاشی نەزان بێ و خوا بیگێڕێ، ئاساییە هاووڵاتی و فەرمانبەر و مامۆستا ئومێدەوار بێ و ئومێدەكانی لە بەدیهاتنی مافە سەرەتاییەكانی بچووك بێتەوە، ئەی چی كارەساتە؟ كارەسات ئەوەیە حوكمڕانەكان، كاكی وەزیر، پارێزگار و بڕیاربەدەست، پلان و بەرنامە و ستراتیژی نەبێ و ئومێدەوار بێت، ئومێدەكانی لەسەر خەیاڵ هەڵبچنێ و چاوەڕێ بێ فریادڕەسێك بێت بۆی جێبەجێ بكات.
بەشێكی زۆری ئومێدەوارە كاربەدەستەكانی ئەم وڵاتە، چونكە خۆیان لە ئاستی مەسئولییەت نابینن، لایان وایە دەبێت ئومێدەوار بن و یەكێك بێت ئومێدەكەیان بۆ بكاتە راستی، قوڕ بەسەر ئەوەی چاوی لەم ئومێدەوارانەیە. ئەمانە لەبری بەرنامە و ستراتیژ و پلان بۆ كاركردن و خزمەتكردن، ئومێد دەكەن ئیشەكە بەدڵی ئەوان بێ و خۆشیان پێوەی ماندوو نەبن، بە كورتییەكەی بەدەستی ئەوان نەبێ، بەڵام بە دڵیان بێت.
