راپەڕینی هەولێر

(11)ی ئازاری هەموو ساڵێک، ساڵڕۆژی ئازادکردنی هەولێرە لە چنگی بەعس، هەموو هەولێرییەکان باش لەبیریانە ئەوکاتەی کاک کۆسرەت سەرپەرشتیاری ئازادکردنی هەولێر و لێپرسراوی بەرەی کوردستانی لە شارەکە لە ئێزگەی دەنگی گەلی کوردستانەوە بروسکەی «لە باوکی رێناسەوە بۆ شانە چەکدارەکانی بروسک، لێتانەوە نزیکین دەست بەکاربن»ی نارد، هەر زوو هەولێرییەکان راپەڕین و رژێمی بەعسیان لە شارەکە وەدەرنا. ئیدی هەر هەولێرییەکان بوون و لەپێش موحافەزە و دەوری قەڵا ئاهەنگی سەرکەوتن و رزگارکردنی شارەکەیان گێڕا و ڤیدیۆ و وێنە مێژووییەکان ماون، چۆن کاک کۆسرەتی سەرپەرشتیاری رزگارکردنی شارەکە بەجلی خاکیی پێشمەرگانەوە لەپێش موحافەزە پیاسە دەکات و بە هەولێرییەکان دەڵێت هەموومان لێرەین و پێکەوەین، هەولێر هی هەموومانە و لە خۆشی و ناخۆشیدا پێکەوەین.
ئەمڕۆ کە 34 ساڵ بەسەر رزگارکردنی شارەکەدا تێپەڕدەبێت، ئەگەر بەوردی سەیری دۆخی شارەکە بکەین و هەولێرییە رەسەنەکان بدوێنین، لێیان بپرسین لەدۆخی هەولێر رازیین؟ ئەوەی خەباتتان بۆ کردو لەپێناویدا راپەڕین هاتەدی؟ بەدڵنیاییەوە وەڵامەکان روونن:
هەولێرییەکان بۆ ئەوە راپەڕینیان نەکرد لە شارەکەی خۆیاندا ببنە بێگانە و بستێک زەوی بۆ خەڵکی شارەکە نەمێنێت!.
هەولێرییەکان بۆ ئەوە خەباتیان نەکرد شارەکەیان ببێتە دوو شار و لایەکی زۆنی زێڕین بێت و لایەکەی تر زۆنی فەقیر و هەژاران بێت.
هەولێرییەکان لە دڵەوە حەزدەکەن شارەکە و خێر و بێرەکەی بۆ هەمووان بێت، هیچ شتێک بە حزبی نەکرێت و لەسەر بنەمای حزبیبوون خزمەتی کۆڵان و گەڕەک و خەڵکەکەی نەکرێت.
هەولێرییەکان ئاواتەخوازن لێپرسراوانی شار لە بەرگە حزبی و پلە حزبییەکانیان بێنە دەرەوە و بۆ ساتێک وەک کوڕی شارەکە بە یەک چاو سەیری هەمووان بکەن و خزمەتیان بکەن.
داخی گرانم، چەندە هەست بە شەرم دەکەم کاتێک دەبینم لەو هەموو خەمەی شار، بێ مووچەیی، بێ کاری و قەیرانە جۆراوجۆرانە لێپرسراوانی شار خەریکی گۆرانی وتنن و هەموو پێکەوە هەڵدەپەڕن، بێئاگا لە خەمی قووڵی خەڵکی شارەکە.
ئەگەر ئاوڕێکی خێرا لە مێژووی پڕشنگداری هەولێر بدرێتەوە، پڕیەتی لە خەڵکی ئازا و قارەمان، هەمیشە هەولێرییەکان بەرامبەر ناحەقی و نادادی هاتوونەتە دەنگ و دەنگیان دلێر بووە، ئەمڕۆ کە بێدەنگن و بەدیار خەمەکانی شارەوە دەستەوەستانن، مانای وانییە رازین، ئەوە هەولێرییەکانن دەیانەوێت بەو بێدەنگییە بە هەمووان بڵێن تکایە وەرنەوە سەر خۆتان و چیتر ئەو هەموو زوڵم و ستەم و ناحەقییە ناچێتە سەر، بۆنە نیشتمانیی و نەتەوەییەکانمان لێ مەکەنە حزبی، چونکە باش لەبیرمانە کە ئێمە ئەو شارەمان رزگارکرد، ئێوە لەکوێ بوون و خەریکی چی بوون!.