کنێر عەبدوڵـڵا
(1)
گفتوگۆی درێژخایەنی نێوان مرۆڤەکان بابەتێکی زیندووی بەردەوامە لەنێو نەوەکانی کۆمەڵگەکاندا کە بە روونی دەردەکەوێت لەکاتی هەڵوێست و ساتە چارەنووسسازەکاندا.
لە ئاکامدا بەریەککەوتنی قووڵ دەکەوێتە نێوان دوو مرۆڤەوە یان زیاتر کە بەهۆی جیاوازییان لەرووی تەمەن یان بیرکردنەوەوە، دێتەئاراوە، واتە لە رووی ململانێی نەوە جیاوازەکانەوە کاردانەوە و ئەنجامی جیاواز دەخوڵقێت.
سوودوەرگرتن لەیەکتر، پێویستییەکی بابەتی و واقعییە و ناتوانرێت هیچ نەوەیەک پەرواێز بخرێت لەسەر حسابی ئەویتر
خودی ئەو کارلێک و نایەکسانییانە کە پەیوەستە بە مێژووی پەیوەندییە مرۆییەکانەوە و بەردەوامیی هەیە، بە ململانێی نەوەکان ناو دەبرێت.
ململانێکانیش، دیاردەیەکی سروشتیی مرۆییە کە هەریەک لە نەوەکان بەهۆی کەلتور و داب و نەریت و ژینگەی پەروەردەیی قۆناغەکەیەوە، یاسا و رێساکانی بوونەتە بەشێک لە هزریان و رەنگدانەوەی لە رەفتار و هەڵسوکەوتیاندا بەدی دەکرێت، دەرەنجام پێیانوایە دەرچوون لەو رێسا و نەریتانە نەنگییە و لادانە لە بەها کۆمەڵایەتی و ئاکارییەکان، ئیدی هەریەک لەوان خۆیان بە راست دەزانن و هەریەکەیان هەوڵ دەدەن یەکتر بەلای خۆیاندا رابکێشن.
ململانێی نەوەکان، دەستەواژەیەکە مێژوویەکی درێژخایەنی هەیە لە جیهاندا بە گشتی و خۆرهەڵاتی ناوەڕاست بەتایبەتی و لایەنی ئەرێنی و نەرێنی هەیە و وەک هەموو کۆمەڵگەکانیش، کۆمەڵگەی کوردی بەشێکی دانەبڕاوە لەو مێژووە و ئەو ململانێیانە کاریگەریی لەسەری هەیە.
ئەو جیاوازییانە پەیوەست نین بە بوارێک یان لایەنێکی دیاریکراوەوە، بەڵکو کۆی پەیوەندی و بوارەکانی ژیان دەگرێتەوە لە رووی سیاسی، کۆمەڵایەتی، ئابووری، دەروونی، و رۆشنبیری و ... هتد.
بە نموونە لە بواری خێزاندا، کاتێک باوان ئارەزوو و پێداگیری دەکەن منداڵەکانیان ببنە پزیشک یان ئەندازیار کە دەشێت پێچەوانەی خواستی ئەوان بێت، یان لە بواری پەروەردەدا، مامۆستایانی نەوەی رابردوو بەگشتی، پێیانوایە شێوازەکانی فێرکردنی تەقلیدی، وەک فێرکردن لە پۆل و پشتبەستن بە سەرچاوە چاپکراوەکان، باشترین رێگەیە بۆ وەرگرتنی زانیاری، لەکاتێکدا نەوەی ئێستا فێربوونی ئۆنلاین بە بەکارهێنانی پلاتفۆرمی دیجیتاڵی و کارلێک پەسەند دەکات و لەوانەیە شێوازەکانی فێرکردنی تەقلیدی بە بێزارکەر و بێ کاریگەر ببینن، یاخود تەکنۆلۆژیا و ئێنتەرنێت کە بۆتە بەشێکی گرنگی ژیانی رۆژانەی ئێستا لە بوارەکانی پەیوەندی، کار و کات بەسەربردن، لە کاتێکدا نەوەی رابردوو قورسایی بەدی دەکەن لە مامەڵەکردن لەگەڵ بەکارهێنانی شێوازە جۆربەجۆرەکانی تەکنۆلۆژیای هاوچەرخدا.
ئەوەی گرنگە چۆن بتوانرێت زمانێکی هاوبەش بە لێکتێگەیشتنێکی بابەتییانە بدۆزرێتەوە لەنێوان ئەو نەوە جیاوازانەدا، تا ببێتە ژینگەیەکی دروست بخوڵقێنێت کە هەموان بتوانن سوود بەیەکتر بگەیەنن و مۆدێلێکی سوودبەخش بە کۆمەڵگە پێشکەش بکەن.
«ململانێی نەوەکان» گۆشەیەکی هەفتانەیە کە ئامانج لێی نزیکردنەوە و بەیەکگەیشتن و ئاوێتەکردنی نێوان نەوە جیاوازەکانە، بە سوودوەرگرتن لە لایەنە ئەرێنییەکانی هەر نەوەیەک و دۆزینەوەی خاڵە هاوبەشەکانیانە بۆ گەیشتن بە کۆمەڵگەیەکی گەشەسەندوو و بنیاتنەر.
سوودوەرگرتن لەیەکتر، پێویستییەکی بابەتی و واقعییە و ناتوانرێت هیچ نەوەیەک پەرواێز بخرێت لەسەر حسابی ئەویتر.
هەوڵ دەدەم لە بابەتەکانی داهاتوودا، ووردەکاریی زیاتر باس بکەم بە تیشکخستنەسەر چەمکی ململانێی نەوەکان، هۆکارەکان، کاریگەرییەکان، ئاسەوارەکانی، وێڕای چارەسەرەکان و سوودوەرگرتن لە کارکردنی ووڵاتانی بە ئەزموون لەم بارەوە.
[email protected]
