لەدوای راپەڕین زۆركەس خەریكی دزی و تاڵانی و داگیركاریی شوێن و بیناكانی حكومەت بوون، كەسێك كە لە هەمووان زیاتر خەمی مانەوەی شوناس و ئاسار و رەسەنایەتی بوو لە سلێمانی، هێرۆخان بوو.
وەك چۆن لە شاخ دووربین بوو لەوەی شۆڕش ئەرشیف و دیكۆمێنت بكات و بەشێك لە ژیان و رەسەنایەتی لە گوند و ناوچەكان ئەرشیف بكات، ئاوەهاش لە شار خەمی پاراستنی شار و بینا و نازناوەكانی بوو.
مانەوەی ئەمنەسوورەكە و كارگەی كلتوور و هتد.. گەواهیدەری ئەو راستییەن، رووبەڕووبوونەوەی سوپایەك لە كارەكتەری چاوچنۆك لە سیاسی و بازرگان ئاسان نەبوو، بەڵام هێرۆخان ئازایانە توانی بەشێكی زۆری شوێن و شوناس و بیناكان بپارێزێت.
لەم رووەشەوە هەموومان دەزانین قوربانی زۆریدا، دژایەتی زۆركرا، بەڵام بوونی مام جەلال لەپشتی، توانی سەركەوێت بەسەر سوپای چاوچنۆكی سیاسی و بازرگان.
كەناڵی ئاسمانیی كوردسات، ئەم كەناڵە كە دامەزرێنەر و بیرۆكەی هێرۆخان بوو، وەك تێڕوانینی خۆی بۆ واقع و كلتوور و فەرهەنگ كاری كرد، گەرچی هەوڵی زۆردرا كوردسات بخزێننە ناو ململانێ سیاسییەكان و چەندینجار فشاركرا و بودجەیان بڕی، بەڵام هێرۆخان رێگربوو لەوەی كوردسات ببێتە سەكۆی ململانێ، بەپێچەوانەوە كوردسات بوو بە ماڵی هەموو كوردێك و خزمەتێكی گەورەی بە كلتوور و فەرهەنگ و رۆشنبیریمان كرد.
هێرۆخان بێ پیاهەڵدان و خۆنمایش، گەورەترین خزمەتی بە فەرهەنگ و وتاری كرداری كوردبوون كرد، سەرەڕای ئەوەی هەقە دان بەوەدابنێین ئەم ژنە شۆڕشگێڕ و رووناكبیر و فەرهەنگ دۆستە، ماندوو كرا و چەندین دژایەتی لابەلای كرا و دواجار بە سیفەتی لەسەرخۆیی و باوەڕبوون بە بیروبۆچوونی خۆی، توانی سەركەوێت بەسەر هەموواندا، ئەو وەك رەمزی خزمەت بە كلتوور و فەرهەنگ و رەسەنایەتی كورد دەمێنێتەوە، ئەوانی دیكەش لەژێر ناوی تاڵانچی دەمێننەوە.
هەموومان قەرزاری ئەم ژنەین لە شاخ و لە شار.
