لە روانگەی یەک ئایینی و یەک نەتەوەیی بێت، یان هەستی مرۆیی، ئیمارات و هەموو ئەو وڵاتە دەوڵەمەندانە ئەرکدار دەکات بڕێکی زۆر لە داهاتی خۆیان پێشکەش بە خەڵکی غەززە بکەن
وڵاتانی کەنداو لەڕووی دەستکەوتنی پارەوە، جگە لە فرۆشتنی نەوت و غاز، خاوەن سەرمایەیەکی کۆکراوەی زۆرن، ئەگەرچی بۆ خۆیان بووەتە هۆکاری خۆشبەختی و لەوپەڕی خۆشگوزەرانیدا دەژین، بەڵام نەیانتوانیوە هێندە هاوکاریی خەڵک و وڵاتانی عەرەبی و ئیسلامیی هەژار بکەن کە کەمێک لە ئازار و ناخۆشی و هەژارییەکەیان کەمبکەنەوە.
بەپێی قسەی عەبدوڵڵا بن توق ئەلمری، وەزیری ئابووریی ئیمارات کە هاوکات سەرۆکی ئەنجومەنی گەشتیاریی ئیماراتە، داهاتی گەشتیاریی وڵاتەکەی زۆر زیادی کردووە و دەشیانەوێت زیاتریشی بکەن، ئەلمری دەڵێت «کەرتی گەشتیاریی ئیمارات بەردەوامە لە بەرەوپێشچوون، بەشێوەیەک داهاتی هۆتێلەکانی ئیمارات لە مانگی یەکەوە تاوەکو مانگی 10ی ساڵی 2024، نزیکەی 37.1 ملیار درهەم بووە کە دەکاتە نزیکەی 10.1 ملیار دۆلار، واتە بەراورد بە ساڵی 2023 رێژەی 4 % زیادی کردووە». ئەو داهاتە رێژەیەکی بەرزە و دەتوانرێت زۆر لە نەهامەتیی وڵاتانی هەژاری پێ لەناو ببرێت و بکرێتە دەروازەیەکی باش بۆ ئەوەی ئەوانیش لە دەرگای خوشگەزەرانی بدەن.
جگە لە ئیمارات هەریەک لە سعودیە، قەتەر، عومان و کوەیت، خاوەنی سەرمایە و داهاتی زۆرن و دەتوانن رۆڵی خۆیان لە ئاوەدانکردنەوەی وڵاتانی هەژار و داتەپیودا بگێڕن، بەڵام ئەوەی هەیە ئەو هاوکاری و رۆحییەتە نابینرێت بە رێژەیەکی کەم نەبێت. غەززەییەکان، بە خراپترین بارودۆخی مرۆییدا تێپەڕدەبن، نەبوونی و برسێتی، بێ ماڵی، ساردی و سەرما، بێ جلوبەرگی و سەدان پێداویستیی تریان هەیە.
لە روانگەی یەک ئایینی و یەک نەتەوەیی بێت، یان هەستی مرۆیی، ئیمارات و هەموو ئەو وڵاتە دەوڵەمەندانە ئەرکدار دەکات بڕێکی زۆر لە داهاتی خۆیان پێشکەش بە خەڵکی غەززە بکەن، ئەمە دەرگای باشتریان بۆ دەکاتەوە و دەبنە خاوەن شانازیی مێژوویی و مرۆیی خۆیان، بەپێچەوانەشەوە، مێژوو میهرەبان نابێت لەگەڵیان و رەنگە بەهۆی بێ دەربەستییانەوە کارەساتێکی سروشتی یان سیاسی و ئەمنی خۆشگەزەرانییەکەیان لێ تێک بدات.
بەروارد بەوەی کە دەوترێت غەززە بۆ ئاوەدانکردنەوەی پێویستیی بە 80 ملیار دۆلارە، دەگەینە ئەو فاکتەی ئەگەر ئەو وڵاتانە تەنها داهاتی کەرتی گەشتیاریی خۆیان پێشکەشیان بکەن، ئەوا پرۆسەی ئاوەدانی و بارودۆخی ناخۆشی ئەوان ئەگەر کۆتاییش نەیەت، ئەوا لە قەیرانێکی گەورەدا بەرەو دەربازبوون دەڕۆن و دڵی هەزارن خەڵکی هەژار و بێ ژیان خۆش دەکەن.
