کرانەوە بە رووی وەبەرهێنان و ئاڵ و وێری دراو و کانزا گرانبەهاکاندا، دەرفەتێکی باشە بۆ ئەوەی سلێمانی جووڵەیەکی ئابووریی دیکەی بۆ زیاد ببێت و دەرگایەکی دیکە بۆ کەسابەتی خەڵک بکرێتەوە و ژمارەیەکی دیکە هەلی کار بڕەخسێنرێت.
جیهانی سەرمایەداریی خۆی سروشتی ئاوایە، پارەداریی دەسەڵاتدار دەیبات بەڕێوە، پارە بێ پاسەوانی دەسەڵاتدار ناژی و زۆر ناسک و ترسنۆکە، پێویستیی بە باڵەخانەی شووشەی و کۆشکی گەورە و رووناکی زۆرە.
پێویستە زانکۆکان خوێندکارەکانیان رایەڵە بکەن لەگەڵ بازاڕەکاندا، تا فێری کار ببن، لە چا فرۆشتن و گۆشتفرۆشتن و کەباب دروستکردنەوە تا دەگات بە دیزاینی باڵەخانە و چاککردنەوەی ئۆتۆمبێل و مامەڵەکردن بە پشک و دراوە بیانییەکانەوە
لە جیهانیشدا ئەو کەسانەی دەبنە ئەستێرە لە بواری پارە و سامان و ئابووریدا، لەگەڵ دەسەڵاتدارەکان هاوبەشی نەکەن زوو دەتوێنەوە، بۆ نموونە ئایلۆن ماسک و دۆناڵد ترامپ دوو پیاوی خاوەن پارە بوون، دەستیان بە ململانێی سیاسی کردووە بۆ ئەوەی پێگە ئابوورییەکەیان باشتر بپارێزن.
ئەمریکا بەشیان ناکات
خانەوادەی کۆمارییەکان، بە تایبەتی باڵی هەڵۆکانی ناو کۆمارییەکان فرە دەوڵەمەندن، ئەوان سەرمایەکانیان ئەوەندە گەورەیە تەنها ئەمریکا بەس نییە کاری تێدا بکەن، دەیانەوێت جیهان تەخت بکەن و ئاشتی تێدا بێت بۆ ئەوەی پارە لە خۆرئاواوە بنێرن بۆ خۆرهەڵاتی زەوی و هیچ گرفتێکیان بۆ دروست نەبێت.
ئەم بیرۆکەیە رەت دەکەیتەوە و دژی سەرمایەداریی دەبیت و باوەڕت بە ئایدۆلۆژیایەکی دیکە هەیە، دەبێت وەک ئێران و لیبیای موعەمەر قەزافی و سەدامی نەوەدەکان، و هەندێک وڵاتانی ئەمریکای باشوور و کۆریای باکوور، ژیانی سادە و داخراو و دابڕاو لە جیهان هەڵبژێریت و ململانێ لەگەڵ زلهێزەکانی جیهاندا بکەیت، تا ئەو رۆژەی فڕۆکەی هاوپەیمانان دێنە سەر وڵاتەکەت و دەسەڵاتەکەت دەگۆڕن.
یان دەبێت، هەناسەیەکی واقیعی بدەین و هەر کەس بە ئاستی خۆی بەشداریی لە کاردا بکات ئیدی یەکێک بە کرێکاری و یەکێک بە پاسەوانی و یەکێک بە بەڕێوەبەری و یەکێک بە فەرمانبەری و یەکێک بە خاوەن پڕۆژە و ..هتد.
باڵەخانە و پرۆژەکان
لە بنەڕەتدا ئەگەر زەوی و بینا تەرخان نەکرێت بۆ وەبەرهێنان، خۆ لە خێمەدا وەبەرهێنان ناکرێت، پێوستە زەویەکانمان تەرخان بکرێت بۆ باڵەخانەی کەشخە و چراخان، تا دۆلار و یۆرۆ و پاوەن ژوانی خۆیانی تێدا ببەستن.
هەر شارێک، کۆمەڵگەیەک، خێزانێک، مرۆڤێک، خۆی یەکلایی نەکاتەوە، هەرگیز ئارامی دەروونی وەرناگرێت و توشی کێشەی دەروونی دەبێت و دواجاریش کۆمەڵگەیەکی نەخۆش دروست دەبێت.
پێویستە، ئەوەی هیچ پارەی نییە، ئێستا پشتگیری لە وەبەرهێنان بکات و باڵەخانە و پڕۆژەکان وەک نیشتیمان و شوێن کەسابەتی خۆی بزانێت و بیانکاتە زانکۆ و قوتابخانە و ماڵ، تا لەوێ فێری وەبەرهێنان ببێت و خۆی دەوڵەمەند بکات، تا لە کوچەیەک یان کەلێنێکی ئەو باڵەخانە گەورانە لە سفرەوە کارێکی دەستبکەوێت و دواڕۆژ بگاتە ئاستە باڵاکان، لە جیهانی سەرمایەداریدا هیچ شتێک مەحاڵ نییە، تەنها بە دەرونێکی ئاسوودەوە بەیانیان لەخەو هەستە و دەست بە کارکردن بکە.
ئەگەر بیرۆکەیەکی دیکەت هەیە، فەرموو
دوبارە دەچینەوە سەر بەشێکی دیکە و دەپرسین ئەوانەشی، ئارەزوو دەکەن وەک، سەدامی ساڵی نەوەدەکان و کۆریای باکوور و ئێران و لیبای موعەمەر قەزافی و بەشێک لە ئەمریکای لاتین بن، پڕۆژەی خۆیان تەرح بکەن بۆ هەڵبژاردن ئەگەر خەڵک دەنگی پێدان، پیرۆزیان بێت با کۆتایی بە سەرمایەداریی بهێنن.
کاتی ئەوەیە، رۆشنبیریی وەبەرهێنانی بچووکیش لە شارە بچووکەکانی دەوروبەری سلێمانی بڵاوبکرێتەوە، هەزاران گەنجی بێکارمان هەیە، قوتابخانەکان و زانکۆکانیش خەریکی ئامادەکردنی هەزاران بێکاری ترن بۆ ساڵانی ئایندە، با ئەم قەیرانە بە سنگی فراوان و گۆڕینی مێشک و بیرکردنەوەمان و کەلتورەکەمان کۆتایی پێبهێنین.
کاتی گۆڕینی قوتابخانە و زانکۆکانیشە، لەبری خوێندەوارییەکی کۆن، کە پەیوەندیی بە جیهانی ئێستامانەوە نییە، پێویستە خوێندکارەکانیان رایەڵە بکەن لەگەڵ بازاڕەکانی سلێمانیدا، تا فێری کار ببن، هەموو جۆرە کارێک، لە چا فرۆشتن و گۆشتفرۆشتن و کەباب دروستکردنەوە تا دەگات بە دیزاینی باڵەخانە و چاککردنەوەی ئۆتۆمبێل و مامەڵەکردن بە پشک و دراوە بیانییەکانەوە لە بازاڕە داراییەکانیاندا.
رێوڕەسمی کردنەوەی ناوەندی دارایی نێودەوڵەتیی سلێمانی
