راستە هەشتی مارسی هەموو ساڵێک، رۆژی جیهانیی ژنانە و دەکرێتە بۆنەیەک بۆ قسە لەسەر کردن و چالاکیی جۆراوجۆر و گردبوونەوە و زۆر شتی دیکەش، بەڵام دەکرێ ئەمساڵ هەشتی مارس بکرێتە بۆنەیەکی جیاواز و سەرەتای بەخۆداچوونەوەیەکی جددی بۆ ئەوەی دەستبخرێتە سەر خاڵە لاوازەکانی خەباتی ژنان و چارەسەریان بۆ بدۆزرێتەوە.
لە دوای راپەڕینەوە دەرفەتی باش بە قۆناغ بۆ ژنان هاتووەتە پێشەوە، ژنان وردە وردە ئاستی هۆشیاریی و بەشدارییان زیاتر بووە و رۆڵیان لە کایە جۆراوجۆرەکانی ژیانی رێکخراوەیی و سیاسی و تەنانەت دەوڵەتیشدا وەرگرتووە، بەڵام ئەمە بەس نییە و پێویستە رۆڵی ژنان زیاتر ئەکتیڤ بێت و بەڕا گەیشتن بە تەواوی مافەکان، هەنگاو بنێت.
بزووتنەوەی ژنان لە کوردستان بۆ چەندین ئاست و ئایدۆلۆژیا دابەش بووە. چەندین رەنگی جیاوازی هەیە، رەنگە هەندێکیش بیانەوێت بزنسی پێوە بکەن، لەگەڵ هەموو ئەوانەدا روونە کە هاوبەشییەك هەیە ئەویش: عەقڵی کۆن و بیرکردنەوەی پیاوسالارانە هەژموونیان بۆ دێنێت و مافەکانیان نەک پێ رەوا نابینێت، بەڵکو دەیانەوێت ئەو مافانەشی هەیە و بەدەستهاتووە لێیان زەوت بکەن.
بۆ بەگژداچوونەوەی ئەو بیرکردنەوە کۆنەپەرستانەیە، دەکرێت رێکخراوەکانی ژنان و یەکسانیخوازان، هەشتی مارس بکەنە دەرفەتێک بۆ کۆبوونەوەیان لە دەوری ستراتیژێکی ژنانە بۆ ئەوەی هەموو تواناکانی ژنان یەکبخرێن و رووبەڕووی ئەو عەقڵیەتە بۆگەن و دژە ژن و مرۆڤە ببنەوە.
چەند ژنان یەکگرتوو بن، ئەوا هێزی رووبەڕووبوونەوەی بیری کۆنەپەرستیی دژە ژنمان زیاتر دەبێت و ئاسانتر بەسەریاندا زاڵ دەبین، زیاتر خۆمان دەناسین و لە پیلانی کۆنەپەرستانیش باشتر تێدەگەین، دەبێت ژنان جیاوازییەکانیان بکەنە خاڵی بەهێز نەک لێکترازان و دوورکەوتنەوەیان لەیەکتر، جیاوازیی هێزە نەک خاڵی لاواز.
هەشتی مارس، دەتوانێت بکرێتە دەرفەتی یەکگرتوویی و خۆبەهێزکردن، دەکرێت بکرێتە خاڵی وەرچەرخان لە خەبات و بزووتنەوەی ژنان، دەکرێت بکرێتە کۆکبوون لەسەر خەبات و هەوڵ و پڕۆژەی هاوبەشی ژنانە دژی پیاوسالاریی و ژنکوژیی و تاریک پەرستیی. ژنان هێزی ئەوەیان هەیە ئەو کارە بکەن، دەرفەتیش زۆرن و ئەوەی هەیە وەلاخستنی جیاوازییەکان و رێککەوتنە لەسەر رێگەی خەباتی نوێ و گەیشتن بە ئامانجە هاوبەشەکانی ژنان.
دڵنیام ژنان دەتوانن ئەم کارە بکەن.
