عەلەوی رێبازێکی سۆفیگەرییە، تێکەڵەی بیر و باوەڕی جۆراوجۆرە، عەلەوییەکان لە مەزهەبی شیعەن، هەرچەندە کەمتر گرنگی بە رێوشوێنە ئاینیییەکان دەدەن و زیاتر گرنگی بە لایەنی مرۆیی دەدەن، مەڵبەندی گشتی نیشتەجێبوونیان لە وڵاتی شامە و بەشێکیان لە تورکیا دەژین.
کۆمەڵکوژیی لەناو عەلەوییەکان
عەلەوییەکان هەر کێ بن و هەر ئاینزاو بیروباوەڕێکی تایبەتیان هەبێت، دواجار مرۆڤن و دروستکراوی یەک خودان، لەو گرژی و ئاڵۆزی و پێکدادانانەی لە چەند رۆژی رابردوودا لە شارە کەناراوییەکانی سوریا روویاندا، دەسەڵاتی نوێی سوریا و هێزە ئەمنی و چەکدارییەکانی کۆمەڵکوژی و کوشت و بڕێکی زۆریان لە ناو عەلەوییەکاندا کرد، بە بیانووی ئەوەی، گوایە پاشماوەی رژێمی ئەسەدن، بەڵام راستی بابەتەکە ئەوە نییە، بەڵکو رقێکی ئەستوور لە ناخ و دڵی سەرۆکی تازەی سوریا هەیە بەرامبەر بەوان و لە بیانویەک دەگەڕی بۆ قڕکردنیان.
ئەو قەسابخانەیەی ئێستا لە سوریای نوێدا دروستکراوە و بەبەرچاوی هەموو جیهانەوە ئەنجام دەدرێت، لە سایەی بێدەنگی ئەمریکا و روسیا، گومانی زیاتر دروستکردووە بەوەی لەمەودوا ئەحمەد شەرع چی بووێت ئەنجامی دەدات، چونکە بێدەنگی دەوڵەتانی زلهێز دەقۆزێتەوە و زیاتر دەستکراوەتر دەبێت بۆ کوشت و بڕی عەلەوییەکان و رەنگە دواتر پێکهاتەی تریش بکاتە ئامانج !.
ئەو بێ منەتی و لە خۆبایی بوون و کوشت و بڕەی جۆلانی، ئەگەر رێگری لێ نەکرێت و بەردەوام بێت، ئەوا مەترسی بۆ سەر پێکهاتەکانی تریش دروست دەکات.
مەترسی بۆ سەر پێکهاتەکانی تریش هەیە
بەهەموو پێوەرێک و پێشبینیکردنێک، دوور نییە ئەوەی بەسەر عەلەوییەکانی سوریادا هات، دووبارە نەبێتەوە بەرامبەر هێز و لایەن و پێکهاتەکانی تری وەک، هەسەدەو دروزەکانیش، بەڵام هەڵوێستی ئیسرائیل بەرامبەر بە کورد، هۆکارە بۆ نەوێرانی جۆلانی لەوەی هێرش بکاتە سەر کورد، ئیسرائیل بە ئاشکرا رایگەیاندووە کە بەرگری لە کورد دەکات، خودی هەسەدەش دەست بەستراو نییەو هەزاران شەڕڤانی مەشقپێکراوی هەیە، توانای رووبەڕووبوونەوەی نەیارانی هەیە، بەڵام دەبێ مەترسی حکومەتی جۆلانی بەهەند وەربگیرێت، بە تایبەت کە ئەو لە ئێستادا دەیەوێ تەواوی هەژموونی خۆی بەسەر ئەو وڵاتەدا بسەپێنێت.
هێزە ئەمنیەکانی حکومەتی شەرع لە ناوچەی عەلەوییەکان
