رۆژێك بەر لە ئازادكردنی شارەكەیان لەگەڵ ژمارەیەك لە هاوڕێكانی لە باخچەیەكی نزیك چەقی شاردا، كۆبوونەوەو بڕیاری بەشداربوونیان لە ئازادكردنی شارەكەیاندا، رێوشوێن و كاتیان دەستنیشانكرد. بە ئاگابوون لەوەی هێزی پێشمەرگە لە دەوروبەری شارن، رۆژی دواتر پێشمەرگە دێنە ناو شار و بە هاوكاریی جەماوەریی ستەمدیدە، شارەكەیان ئازاد دەكرد.
ئەو گەنجێكی تازە هەڵچوو و خوێندەوار بوو سەرەڕای ئەوەی خوێندكاریش بوو، بەڵام زۆر بە نهێنی سەروكاری لەگەڵ كاری حزبی لە شاردا هەبوو، زۆرجار بەهۆی ئەوەی براكەی لە شاخ پێشمەرگە بوو، نامە و شتی قەدەغەكراوی لە شارەوە بۆ شاخ و لە شاخیشەوە بۆ شار دەهێنا و دەبرد! لە ئازادكردنی شاردا، لە سنووری ئەو گەڕەكە میللییەی تێیدا نیشتەجێ بوو، رۆڵی كارای گێڕا لە گرتنی تەوارییەكە، كە مۆڵگەی ئەمن و رەفیق حزبیەكان بوو.
دوای كۆڕەوەكە و گەڕانەوەی ئاوارەكان لەو دیو سنوورەوە بۆ ناو شارە ئازادكراوەكان، لیژنەیەكی هەماهەنگی لە پێشمەرگە و حكومەت پێكهێنرا، تا ناوەڕاستی تەمموزی هەمان ساڵ، رۆژ بە رۆژ دۆخی نێوان پێشمەرگە و رژێمی بەعس ئاڵۆزتر دەبوو و خەڵكی راپەڕیویش نەیاندەویست چەكداری رژێمێك ببینن كە پێشتر ئازاری خەڵكیان داوە.
هەمان ئەو كۆمەڵە گەنجەی لە ئازادكردنی شارەكەیاندا رۆڵیان هەبوو، جارێكی تر بۆ دەركردنی پیاوانی رژێم لە دامودەزگاكانی ناو شاردا بەشدار بوون، لە خۆپیشاندانێكی رێكخراو و كات و شوێنی دیارییكراودا، هێرشیان كردە سەر چەكدارانی رژێم لە تەلاری پارێزگادا. ئەو گەنجە خوێندكار و خوێندەوارە سەروكاری لەگەڵ رێكخستن و پێشمەرگە هەبوو، بۆیە لە ئازادكردنی شارەكەیدا رۆڵی خۆی گێڕا، لە هاوینی هەمان ساڵی راپەڕیندا لە گۆڕەپانی بەردەم پارێزگا، بە سەختی بریندار و دواتر كەم ئەندام دەبێ و دەكەوێتە سەر عارەبانە! لەوكاتەوە ساڵانێك هاوڕێی قەرەوێڵە و ساڵانێكیش هاوەڵی دارشەق دەبێت!
ئەو لە تەمەنی 22 ساڵیدا، تەنیا یەك فیشەك، 34 ساڵ بە قەرەوێڵەیەك و دارشەقێكی ئاشنا كرد! هەركاتێكیش حەز بكات بگەڕێتەوە چركەساتی پێش زامداربوونەكەی و تەمەنی پێش برینداربوون و تەمەنی دوای برینداربوونی كۆدەكاتەوە، هەناسەیەكی قوڵ هەڵدەكێشێ و لەیادی ئازادكردنی شارەكەیدا، چەند خولەكێك لەو شوێنە دەوەستێت و رامانێك بە چواردەوری خۆی دەكات، وەك فلاشباكێك دەگەڕێتەوە تەمەنی گەنجێتی و سەیری ئاڕاستەی گوللەكە دەكات، كە 34 ساڵ لەمەوبەر لە تەلاری پارێزگاوە، ئەمنەكانی سەر بە رژێمی بەعس ئاڕاستەی كردووە، ئەو ئێستا بە نیوە جەستەوە جارێكی تر لە ململانێدایە لەگەڵ ژیان و مەرگدایە!
ئەو ئێستا سەربەرزە بەوەی كە بە فیشەكی بەعسییەكان پێكراوە و بۆتە شەهیدی زیندوو!
