ئازاد چنارنەیی
کاتێک باس لە سنووری راپەڕین دەکەین، واتە سنووری فراوانی بیتوێن و پشدەر بە سەرجەم شار و شارۆچکە و گوندەکانیانەوە، وەرزش لەم ناوچەیە مێژوویەکی دێرین و پڕ دەستکەوتی هەیە، بەڵام لەدوای راپەڕینەوە کاروانی ئاوەدانی و بەرەوپیشچوونی وەرزش زۆر بە خێرایی هەنگاوی نا و گەشەیەکی بەرچاو و باشتری بەخۆیەوە بینیی بەراورد بە رابردوو، لەڕووی دروستکردنی یاریگا و ھۆڵی داخراوی وەرزش و یارییە تاکەکەسییەکانەوە.
ئێستا بەھۆی ئەوەی لە سنوورەکەدا پێنج یانەی وەرزشی لەئارادن و لەلایەن گەنجان و وەرزشکارانەوە پشتیوانییەکی گەورەیان لێ دەکرێت و خواستێکی زۆر و جەماوەرێکی زۆری وەرزشیش هەیە، بەڵام لەگەڵ ئەوەشدا هەموو ئەو یاریگایانەی کە لە رابردوودا دروستکراون، کۆنن و بچووکن، کێشە و قەیرانی بەرچاویان بۆ لایەنگران و پاڵپشتیکاران و ئارەزوومەندانی بینینی یارییەکان دروستکردووە، هاوکات حکومەتی هەرێمیش لە رێگەی وەزارەتە پەیوەندیدارەکانییەوە وەکو پێویست نەیتوانیووە خزمەت بە بواری وەرزش بکات و دەستی ئاوەدانی لەڕووی چاککردن و نوێکردنەوە و دروستکردنی یاریگای مۆدێرن رابکێشێت بە پشتبەستن بە دروستکردنی پرۆژە و ژێرخانی سەربەخۆ بۆ یانەکان بەمەبەستی خۆبەڕێوەبردن، یاخود لە دابینکردنی مینحەی تایبەتی ساڵانەی یانەکاندا ھاوکار و پشتیوان بێت، بگرە جیاوازییەکی زۆریش دەکات لە شوێنێکەوە بۆ شوێنێکی تر.
ئەم گرفتە بەرۆکی سەرجەم یانە وەرزشییەکانی سنوورەکەی گرتووە و ساڵانە لەڕێگەی ئەندامەکانیانەوە بۆ بەشداریکردن لە خول و پاڵەوانێتییە جۆراوجۆرەکان و نۆژەنکردنەوەی یاریگاکانیان، ھانا بۆ سەرمایەدار و کۆمپانیا بازرگانییەکان و حزب و لایەنەکان و دەستڕۆیشتوانی ناوچەکە دەبەن، لەکاتێکدا ئەگەر حکومەت یاریگای شیاو و شایستە و مۆدیرن بۆ یانەکان دروست بکات و ھاوکاریان بێت لە دروستکردنی پرۆژەی ئابووریی سەربەخۆدا بۆ خۆبەڕێوەبردن و پێدانی مینحەی ساڵانەی یانەکان بەبێ جیاوازی، ئەوکات یانە وەرزشییەکانی ناوچەکەش بەرەوپێشچوونی زیاتر بەخۆیانەوە دەبینن و کێبڕکێکانیان لە ئێستا زیاتر دەبێت و رۆڵ و حزوریشیان بۆ بەشداریکردن لە خول و پاڵەوانێتییە ناوخۆیی و دەرەکییەکان بەهێزتر دەبێت.
