تیپە میللییەكان و پێگەیاندنی یاریزان

وەرزش لە شاری هەولێر بەتایبەتی تۆپی پێ، دەیان و سەدان ئەستێرەی ناوداری پێگەیاندووە، كە بەشێكیان هێندە ئاست بەرز و درەوشاوە بوون، تەنانەت لەسەر ئاستی هەولێر و كوردستان ناو و ناوبانگیان تێپەڕیبوو، لە ئاست هەڵبژاردەكانی عیراق و یانە ناودارەكان یارییان كردووە و كوردانە درێسەكانیان پۆشیووە.
گومان لەوەدا نییە لە پەنجا ساڵی رابردوودا، له شاری هەولێر ژمارەیەك تیپی میللی هەبوون كە هەر یەكەیان بەقەد یانەیەك و فێرگەیەك یاریزانیان پێگەیاندووە، وەك تیپە میللییەكانی(سكە، تەحریر، فەلەستین، شۆڕش، ئازادی، 8ی شوبات، ئەتڵەس، مەحەلە عەرەب) چەندانی دیكە.
لەكاتی بەڕێوەچوونی یارییەكانی ئەو تیپانە، جەماوەری وەرزشی بەرێژەیەكی بەرچاو بۆ سەیری یاریەكە ئامادە دەبوون و هانی تیپەكانیان داوە، ئەمانەش بە گوێرەی گێڕانەوەی یاریزانە دێریینەكان، ئەگەرچی لەو سەردەمانەدا پێداویستی و جلوبەرگی وەرزشی وەك پێویست نەبووە، بەڵام گیانی وەرزشی و ئاستی یاریزانەكان بەرز بووه.
زۆرێك لە ئەستێرەكانی تۆپی پێی شاری هەولێر، لە رێگەی تیپە میللییەكانەوە پەیوەندییان بە یانەی هەولێر و برایەتی و یانەكانی عیراق و هەڵبژاردە جیاوازەكانەوە كردووە، ئەمەش بێگومان بەهۆی تیپە میللییەكانەوە بووە.
فازیڵ عەباس و نەجات عەبدولواحید و تاریق عەبدولرەحمان و سەركار عەلی خان و عومەر سەلیم و كامەران محەمەد و مەسعود عوسمان و عەونی سەید ئەحمەد و خاڵس قۆجە و شاخەوان مەجید و هەڵۆ دزەیی و ...دەیانی دیكە، نموونەی ئەو یاریزانانەن كە لە رێگەی تیپە میللییەكانەوە بەرەو یانەكان چوون و ناویان بە پرشنگداری لە مێژووی تۆپی پێی هەولێر و كوردستان دەمێنتەوە.
ناكرێت نكۆڵی لەوە بكەین كە لە دوای راپەرینیشەوە لە رێگەی تیپە میللییەكانەوە، یاریزانی ئەستێرە و ناودار دەركەوتوون و بەشێكیان تا ئێستاش لە یارییكردن و راهێنەرایەتی بەردەوامن و بەشێكیان تا ئاستی هەڵبژاردەی یەكەمی عیراق و كوردستان گەیشتوون.
لەم چەند ساڵەی دواییشدا بەهۆی هاتنە كایەی یاریگای شەش یاریزانی، كەمتر یاریزان لە رێگەی تیپە میللییەكانەوە دەركەوتن، ناكرێت بڵێین نەبووە، بەڵام جاران زۆرتر بوو.
لە شاری هەولێر ژمارەیەكی زۆر یاریگای شەش یاریزانی بوونی هەیە، كە تیپە میللییەكان لەبەرامبەر بڕێك پارە، دەتوانن یاری تێدابكەن و بەشێك لەو یاریگایانەش قۆرخكراوە بۆ لایەنێك و دەبێت هەندێك لە تیپە میللییەكان، بە نرخێكی گرانتر بلیت بكڕنەوە، بۆئەوەی سەعاتێك یاری بكەن!
دەكرێت لایەنە پەیوەندییدارەكان، پەرەی زیاتر بە یاریگای 11یاریزانی بدەن و ببێتە هەوێنێك بۆ پێگەیاندنی یاریزانان، چونكە ئێستا دەرفەتەكە لەبارتر و ئاسانترە بۆ گەیشتن بە یانە و هەڵبژاردەكان.