نەورۆز بە سیما تەقلیدییەکەی، جەژنی رزگارییە لە ستەم و زۆرداریی و بەگوێرەی زۆر سەرچاوەی مێژووش گومان لەوەدا نییە کە جەژنی نەورۆز ئەگەر لە کوردیش وەک نەتەوە دزرابێت یان هەندێک لە گەلانی دیکەی خۆرهەڵاتی نزیک و ناوەڕاست خۆیان بە خاوەن یان شەریکی ئەو جەژنە بزانن، هیچ لەو راستییە ناگۆڕێت کە جەژنی کوردە و دژایەتیی داگیرکەران و ناحەزانی کوردیش بۆخۆی سەلمێنەری ئەو راستییەیە.
گریمان بەڵگەنامەی مێژوویی ئەوتۆمان بەدەستەوە نییە بتوانین ئەو نەورۆزە تەقلیدییە مێژووییە بسەلمێنین، بەتایبەتتریش کە ئێستا هەندێک گروپ و هێزگەلی سیاسیی – ئایینی سەریانهەڵداوە و دەیانەوێت دوای ئەوەی داگیرکەران و ناحەزانی کورد و کوردستان نەیانتوانیووە بە چەواشەکردنی مێژوو، سەرکوتکردن، رێگریی، خۆکردنە شەریک و بگرە خاوەنی نەورۆز، راستییەکە بگۆڕن و هەندێک گروپیش بە بیدعە و گومڕایی پێناسەی دەکەن.
گریمان نەورۆزە تەقلیدییەکە لە نێوان گومان و دڵنیاییدا گیریان خواردووە، بەڵام ئاخۆ دەتوانین نەورۆزی رزگاریی کەرکوک فەرامۆش بکەین؟ خۆ ئەمەیان تەنها 34 ساڵی بەسەردا تێپەڕیوە و هیچ کەسێک نەیتوانیوە ئەو راستییەمان لێ چەواشە بکات، هەموو نەوەی گەنج و پیری سەروەختی راپەڕین لەبیرمانە کە هەر یادی نەورۆزی 1991 بوو کە تێیدا کەرکوکی قودسی کوردستان تاجی سەرکەوتنی راپەڕینی لەسەرنا و بە تەنها (7) رۆژ لە ئازادیی و رزگاری توانرا بەستەڵەکی زیاتر لە 50 ساڵی تەعریب و گۆڕینی دیموگرافی و راگواستنی کورد و ترازاندنی خاکەکەی لە کوردستانی دانپێدانراوی ئۆتۆنۆمی کارتۆنی بتوێنرێتەوە و کورد لە هەموو شارەکانی کوردستانەوە خوێنی خۆیان بەخشییە ئەو ئازادییەی نەورۆزی رزگاریی کەرکوک و بینیشمان ئەوێ رۆژێ پێکهاتەکانی تورکمان و عەرەبە رەسەنەکان و کرستیانەکانی شارەکە هاوشانی کوردی شارەکە لە پێشوازیی پێشمەرگەدا بوون، دیارە هەر ئەو ماکی پێکەوەژیانەشە کە ئەمڕۆ سەرەڕای ئەو هەموو تەعریبەی پێش رووخانی رژێم و ئەو هەموو دەستوەردانە ئیقلیمی و دەرەکییانە و هەوڵدان بۆ نانەوەی پشێوی لەنێوان پێکهاتەکانی شارەکەدا، هێشتا هەر پێکهاتەی کورد براوەی هەڵبژاردنەکانە و هەمیش یەکێتی براوەی یەکەمی پارێزگاکەیە و سەرۆکی یەکەی ئیداریی پارێزگاکەش بە هەمان ئەو نەفەسی پێکەوەژیانەی پێشوازیی رزگاریی نەورۆزی 1991 و جیاوازی نەکردن لەنێوانیاندا، خزمەتی گەڕەکەکانی پارێزگاکە دەکات و ژیرانە مینەکانی شۆڤێنیزم و نانەوەی ناکۆکیی نێوان پێکهاتەکان پووچەڵ دەکاتەوە و لە جێیاندا پایەکانی ئاشتی و برایەتی دەچەسپێنێت.
